2015 сылга Россия Улуу Кыайыы 70 сылын бэлиэтээтэ. Дойдуга Литература, өрөспүүбүлүкэҕэ Предпринимательство сыллара биллэриллэн ыытылыннылар. Ааһан эрэ сыл Саха сиригэр кэрэ-бэлиэ дааталарынан баайа, уонна кэккэ боччум кыайыыларынан арыалланна. Ол барыта хотугу сирбит үлэһит, сайаҕас, барыга бары көхтөөх олохтоохторун үлэлэринэн ситиһилиннэ.
Күндү биир дойдулаахтарым, эһиэхэ барыгытыгар Сахабыт сирэ чэчирии сайдарын туһугар ахсаабат сыраҕыт, төрөөбүт сиргитигэр бэриниилээххит, уҕараабат тапталгыт иһин ис сүрэхпиттэн махтанабын.
Биллэн туран, дьоллоох, ситиһиилээх буоларбытыгар эрэли саҕар, сүрэхпитин саҥаны арыйыы үөрүүтүнэн толорор Саҥа дьыл – хас биирдиибитигэр ураты бырааһынньык. Күүтүүлээх Саҥа дьылы кытта үтүөнү ыралааһыммытын, олохпут тупсуоҕар баҕа санаабытын ситимниибит.
Бу кэрэ бырааһынньыгы хатыламмат дьикти, алыптаах эйгэтин иһин сөбүлүүбүт. Дьикти чахчы туоларыгар, Тымныы Оҕонньор бары баҕа санааны толороругар итэҕэйэр кырачааннарбыт үөрүүлэринэн-көтүүлэринэн сылаас дьиэбит иһэ сырдыы туоларын иһин.
Оҕолорбут ыралара туоларын, олохпут тупсарын туһугар хас биирдиибит бары күүһүн ууруоҕар эрэнэбин. Барыта бэйэбититтэн тутулуктаах.
Эһиги дьиэ кэргэҥҥитигэр дьолу-соргуну, или-эйэни, этэҥҥэ буолууну ис сүрэхпиттэн баҕарабын!
Егор Борисов, Саха Өрөспүүбүлүкэтин Ил Дархана
Комментарии
Авторизация на сайте через социальные сети