- «Куоһаҕас» сайылыкка сарсыардааҥы ыам бүтэн ынахтар мэччирэҥҥэ бараары кэбинэ тураллар. Алаастара курааннаан халтаҥнаабыт да буоллар, үүккэ былааннарын толорон иһэллэр. «Куоһаҕас» сайылык ыстаарсай ыанньыксыта Валентина Трофимова маннык кэпсээтэ:
- - Кыстыкпыт үчүгэйдик ааспыта, ынахтарбыт алтынньыттан-сэтинньиттэн төрөөннөр, үүккэ былааммытын 110 % толорон иһэбит. Биһиги бэһиэ буолан 132 ынаҕы ыыбыт. Осеменаторбыт эдэр үлэһит Светлана Васильева үлэтин бэркэ толорор. Үүппүтүн-аспытын учуоттааччы Мария Климентова, бостууктарбыт Валентин Яковлев уонна Александр Афанасьев ынахтары ыамҥа хойутаппакка хомуйан аҕалтыыллар, Ыанньыксыттарынан Анастасия Тапыева, Саргылаана Осипова, Мотрена Данилова, Саргылаана Иванова буолан үлэлии сылдьабыт.
- «Уу Көхсө» сайылык үлэһиттэрэ ыалларыттан эмиэ хаалсыбаттар. Манна 4 ыанньыксыт 23 ынаҕы ыыр эбит, сарсыардааҥы ыам кэнниттэн титииги сууйан-сотон кэбиһэллэр. «Бөртө» сылгы собуотун салалтата үлэһиттэрин үчүгэйдик хааччыйарын, хамнастарын кэмиттэн кэмигэр ыла олороллорун, этинэн-килиэбинэн быспаттарын туһунан үөрэ-көтө кэпсииллэр.
- Самаан сайын үтүөтэ-кэрэтэ түмүктэнэрэ чугаһаан, алаас кытыытыгар лаглаһа үүммүт хатыҥнар сэбирдэхтэрэ номнуо саһаран көмүс дуйдаммыт.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети