Ыалдьыттары колледж ректора Чжань Хун истиҥник көрүстэ, үөрэх кыһатын 65 сыллаах историятын кэпсээтэ. Саамай долгутуулааҕа -- делегация чилиэннэрэ Саха сириттэн колледжка үһүс сылын үөрэнэ сылдьар оҕолору кытта көрүстүлэр. Александр Николаевич эдэр циркачтартан хайдах үөрэнэ сылдьалларын туоһуласта. Оҕолор үөрэхтэрин сөбүлүүллэрин, биллэн турар, дьиэлэрин, төрөппүттэрин ахталларын, ордук дьиэтээҕи бэрэскилэрин суохтуулларын эттилэр. Онон биир дойдулаахтарын көрөн ахтылҕаннарын таһаардылар, итиэннэ акробатическай нүөмэр көрдөрөн сөхтөрдүлэр. Бу көрсүһүүгэ СӨ култуураҕа, духуобунай сайдыыга миниистрэ Владимир Тихонов, СӨ Судаарыстыбаннай циркэтин уус-уран салайааччыта Сергей Расторгуев, СӨ Судаарыстыбаннай циркэтигэр оҕо устуудьуйатын дириэктэрэ Марфа Расторгуева, о.д.а. кыттыннылар.
Оҕолорбутун ректор үчүгэйдик үөрэнэллэрин, талааннаахтарын, кыһаллымтыаларын, бэрээдэктээхтэрин хайҕаата. Саха сириттэн сылдьар иитээччи-педагогтар Мария Голокова, Ольга Григорьева кэпсии-кэпсии колледж устун экскурсия ыыттылар. Биһиги үөрэнээччилэрбит үүнэллэригэр-сайдалларыгар колледжка бары сөптөөх олорор, үөрэнэр усулуобуйа тэриллибитин көрөн, ыалдьыттар астыммыттарын бэлиэтээтилэр.
Пекиннээҕи искусство колледжа аан дойдуга бастыҥ цирковой оскуолалар ахсааннарыгар киирсэр. Бу сыллар тухары колледж биһиги өрөспүүбүлүкэбит циркэтин каадырынан хааччыйан кэллэ. 1997 сыллаахха бастакы сүүмэрдээһини 20 оҕо ааспыта. Бу оҕолор 2004 сыллаахха үөрэхтэрин бүтэрэн, үрдүк таһымнаах артыыстар буолбуттара. Өссө устудьуоннуур сылларыгар кинилэр аан дойду, Бүтүн Россия таһымнаах куонкурустарга кыайыылаах тахсыбыттара. Бүгүҥҥү күҥҥэ саха циркэтин артыыстара өрөспүүбүлүкэ аатын аан дойду циркэтин аренатыгар ааттаталлар. Билиҥҥи кэмҥэ Пекин колледжыгар Саха сириттэн үһүс көлүөнэ устудьуоннар үөрэнэ сылдьаллар.
Ил Түмэн спикерэ Александр Жирков саха циркэтин историятыгар сыһыаннаан манныгы бэлиэтээн эттэ: "Өрөспүүбүлүкэҕэ циркэ саҥа тэриллэрин саҕана, оччолорго элбэх дьон Саха сиригэр циркэ таһаарыылаахтык үлэлиэҕин итэҕэйбэт этэ. Онуоха эһиги биир идэлээххит Сергей Расторгуев Россия циркэлэриттэн чыҥха атын хотугу циркэни төрүттүүргэ улахан сыратын уурбута, хамсатар күүһүнэн буолбута. Ол саҕана Саха сирин циркэтигэр кытай илиҥҥи оскуолатын олохтуур санаа үөскээбитэ. 1997 сыллаахха Саха сирин бары улуустарыттан дьоҕурдаах, имигэс оҕолору талар үлэ хайдах курдук көдьүүстээхтик барбытын күнбэҕэһээ курдук өйдүүбүн. Пекиҥҥэ барбыт кырачааннар сэттэ сылынан циркэ искусствотын толору баһылаабыт маастардар буолан кэлбиттэрэ уонна саха көрөөччүтүгэр умнуллубат өйдөбүлү хаалларбыттара. Итинэн өрөспүүбүлүкэҕэ циркэ төрүттэммитигэр ким да саарбахтаабатаҕа».
Колледж ректора Чжань Хун: "Саха сирин кытта үчүгэй доҕордуу сыһыаннаахпыт. Өрөспүүбүлүкэҕит салалтатыгар биһиэхэ итэҕэйбиттэрин иһин махтанабыт. Биһиги үөрэхпит кыһатыгар эһиги оҕолоргутуттан бастыҥнары иитэн таһаарар усулуобуйа барыта баар. Саха оҕолорун өйдөрүн-санааларын, эттэрин-сииннэрин хайдах сайдан иһэрин учуоттаан, онно анал ньыманы оҥорон уһуйабыт", - диэтэ.
Колледж салайааччыта бу үөрэх кыһатын бүтэрбит оҕолор саха циркэтин оскуолатын сайдыытыгар төһүү күүс буолуохтарын бэлиэтээтэ уонна Марфа, Сергей Расторгуевтарга айымньылаахтык бииргэ үлэлэһэллэрин иһин махтанна. Итиэннэ икки өттүттэн бииргэ үлэлээһин түмүктэрин чинчийэн, илиҥҥилии-хотугу синтез үөскэтэргэ санаатын эттэ.
Маныаха Ил Түмэн бэрэссэдээтэлэ: "Циркэ артыыһа аренаҕа уһуннук үлэлээбэт, ол эрээри циркэ искусствотын төрүт үгэһэ үйэлэринэн чочуллан оҥоһуллар. Бу ситим быстыбатын туһугар Пекиннээҕи искусство колледжын кытта инникитин бииргэ үлэлэһиэхпит. Саха сиригэр циркэ олохтоноругар бастаан ыарахаттары көрсүбүт эбит буоллахпытына, биһиги сөптөөх суолга үктэнэн, сайдыыга баран иһэрбитигэр ким да саарбахтаабат", -- диэн бэлиэтээн эттэ.
Чжань Хун уонна Сергей Расторгуев бииргэ үлэлэһии түмүктэрин кэтээн көрүү туһунан санааларын Александр Жирков өйөөтө.
Түмүккэ Ил Түмэн спикерэ Саха сирин циркэтин искусствота сайдыытыгар сүҥкэн кылааттарын иһин СӨ Судаарыстыбаннай Мунньаҕын Махтал суругун колледж ректора Чжань Хуҥҥа, дириэктэри солбуйааччы Сунь Лилигэ туттарда.
Комментарии
Авторизация на сайте через социальные сети