- Манна Александра Цыпандина, Максим Андреев, Светлана Тарабукина, Алексей Пестерев кыттыыны ыллылар. Кинилэри кытта «Саха» НКИКАмматааҕы филиалын үлэһиттэрэ тэҥҥэ сылдьыһан телевидениеҕэ уһуллулар. Бөлөҕү улуус кылаабынай зоотехнига Ион Кононов салайда.
- Бастакы күн Бөтүҥ, Абаҕа, Соморсун уонна Сэргэ Бэс, иккис күн Болугур, Чакыр хайысханан сайылыктарга сырыттылар. Пиэрмэ үлэһиттэрин - ыанньыксыттары, ньирэй көрөөччүлэри көрсөн кэпсэтэн, санааларын истэн, кыракый музыкальнай нүөрмэрдэри бэлэхтээн сэргэхситэн кэллилэр. Ион Семенович үлэһиттэргэ улууска эдэр ыччаты тыа хаһаайыстыбатын үлэтигэр көҕүлүүр агитбригада тэриллэн үлэтин саҕалаабытын иһитиннэрдэ. Салгыы оттооһун хаамыытын, үүтү ыаһыҥҥа былаан туолуутун, хаһаайыстыбалар уонна биирдиилээн ыанньыксыттар үүтү ыаһыҥҥа куоталаһыыларын усулуобуйатын билиһиннэрдэ.
- Тыа хаһаайыстыбатын үлэһиттэригэр тутууга көрүллэр субсидия туһунан сырдатта.
- Максим Андреев ыччаты пиэрмэ үлэтигэр хайдах көҕүлүөххэ сөбүн туоһуласта, Ыччат министиэристибэтэ35-гэр диэри саастаах ыалга дьиэ тутталларыгар анал көмө оҥорорун сырдатта.
- Көрсүһүүлэр Алексей Пестерев нууччалыы, сахалыы ылбаҕай ырыаларынан түмүктэннилэр.
- Туйаара Иванова ,„Липпэлээх“ пиэрмэ ыстаарсайа:
- -Пиэрмэ 10 үлэһиттээх, ыанньыксыттар алтыабыт: Ирина Христофорова, Евдокия Платонова, Екатерина Кузьмина, Екатерина Кузьмина, Егор Осипов уонна бэйэм эмиэ ыанньыксыттыыбын.Үүппүтүн Клавдия Христофорова тутар. Розалия Константинова осеменатардыыр. Бостуугунан Николай Павлов уонна Айаал Иванов үлэлииллэр. Пиэрмэҕэ 120 ынахтаахпыт, күҥҥэ 1400 киилэттэн тахса үүтү ыыбыт. Былааммытын толорон иһэбит, - диэн кэпсээтэ.
- Татьяна Павлова, „Тас Хочо“ пиэрмэ ыстаарсайа:
- - Мин манна 1985 сылтан үлэлиибин. Пиэрмэ 10 үлэһиттээх ( 4 ыанньыксыт, 1 осеменатор, 2 бостуук, 3 ньирэй көрөөччү), 80-тан тахса ынаҕы ыыбыт уонна 167 ньирэйи көрөбүт. Күҥҥэ 700-800 киилэ үүтү ыыбыт. Сорох ынахтарбыт атырдьах ыйыгар диэри төрүү тураллар, бачча күөх сайыҥҥа элбэх үүтү ыабакка хааллыбыт диэн айманабыт. Биричиинэтэ - былырыын суола суох олороммут, племхолбоһуктан сиэмэ кэмигэр аҕалыллыбатаҕа, ол үлэ түмүгэр охсуулаах буолла. Урукку курдук хаһаайыстыбаҕа бэтэрэнээр баара буоллар. Билигин сүөһүлэри сыныйан көрүү оҥоһуллубат. Туспа тэрилтэ буолан, бэтэрэнээр ыҥырыы ыыттахха эрэ кэлэр. Артур Таппыров, Эдуард Пермяков, Мария Уварова ыанньыксыттыыллар. Мария Уварова осеменаторынан үлэлиир. Василий Павлов бостууктуур. Артур Патриотович „Болугур“ ТХПК хамаандатыгар киирсэн Мэҥэҕэ массыынанан ыаһыҥҥа күрэхтэһэн кэллэ. Онно хамаандабыт үһүс миэстэни ылары ситистэ. Агитбригада кэлэрэ туһалаах, биһиэхэ информация бытааннык кэлэр, элбэҕи биллибит, иһиттибит", - диэн бэлиэтээтэ.
- Светлана Григорьева, „Кэскил“ хаһаайыстыба ыанньык сүөһү уонна субан сүөһү пиэрмэлэрин биригэдьиирэ:
- Бу „Тураҥ Үрдэ“ сайылыкка Чакыр уонна Покровка ыанньык сүөһүтэ баар. Хаһаайыстыбаҕа барыта 450-чэ сүөһүлээхпит, онтон ыанар ынаҕа - 180, ньиирэйэ - 170 уонна 100-чэкэ субан сүөһүлээхпит. Манна 8 ыанньыксыт үлэлиир. Пиэрмэни уопуттаах үлэһит Амгалита Кириллина салайар. Күҥҥэ 1500 киилэ үүтү ыыбыт. Сэттэ ый түмүгүнэн былааммытын толорон иһэбит.", - диэтэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети