ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
18 сентября 2015, 12:20

А.Е. Евстафьев хартыыналарын быыстапката турда


Балаҕан ыйын 15 күнүгэр СР Национальнай художественнай музейын быыстапкатын саалатыгар Нам улууһун Аппаанытыттан төрүттээх, РФ Худуоһунньуктарын сойууһун чилиэнэ, график Алексей Егорович Евстафьев төрөөбүтэ 60 сааһын көрсө «Графика — вечное сопротивление материала...» диэн уруһуйдаан хаалларбыт хартыыналарын быыстапкатын аһыллыыта буолла.

Алексей Егорович Саха сирин кэрэ көстүүлээх айылҕатын, дьөһөгөйүн, тыа сирин үлэһит дьонун ойуулаан хаалларбыт график худуоһунньук быһыытынан республикаҕа киэҥник биллэр. Ону туоһулаан быыстапка аһыллыытыгар биллэр худуоһунньуктар, уруһуйу сэҥээрээччилэр, атастара, биир дойдулаахтара, бииргэ үлэлээбит доҕотторо мустубуттар. Кинилэри сэргэ Алексей Егоривиһы күн сирин көрдөрбүт тапталлаах ийэтэ Пелагея Николаевна Евстафьева кыттыыны ылла.

photoByWidth&id=44795&width=1000

Быыстапкаҕа национальнай художественнай музей фондатыгар уонна дьонугар баар коллекциялартан туруоруллубуттар. Кини республикаҕа акварельнай живопиһы киллэрбит өҥөлөөх, онон манна эмиэ ол матыыбынан уруһуйдаммыт хартыыналары көрөн ааһаҕын. Бииргэ алтыспыт доҕоттордоро сорох уруһуйдары саҥа көрбүттэрин туһунан сөҕө-махтайа бэлиэтээтилэр. Тэрээһиҥҥэ искусствовед Ия Покатилова Алексей Егорович олорон ааспыт олоҕун, айар үлэтин туһунан сырдатта. Онтон бииргэ алтыспыт, үлэлээбит дьоно — Саха искусствотын үтүөлээх деятелэ, Саха сирин Художниктарын союһун председателэ Юрий Спиридонов, СР народнай худуоһунньуга, живописец Виктор Петров, СР народнай худуоһунньуга, живописец Артур Васильев — табаарыстарын, биир идэлээхтэрин кытта  алтыспыт, үлэлээбит кэмнэрин сылаастык, истиҥник ис сүрэхтэриттэн ахтан-санаан аастылар. Маны таһынан «Нам улууһа» МТ дьаһалтатын аатыттан Владислав Касьянов, И.Е.Винокуров аатынан Намнааҕы пед. колледжтан Сергей Колесов, «Хатыҥ-Арыы нэһилиэгэ» МТ баһылыгын солбуйааччы Герман Марков, Кыһыл Дэриэбинэ сынньалаҥ киинин директора Айталина Винокурова, ХИФУ ректора Евгения Михайлова быыстапка аһыллыбытынан эҕэрдэлээтилэр, тэрийбит дьоҥҥо махтал тылларын эттилэр уонна Пелагея Николаевнаҕа, Ия Володаровнаҕа сэмэй бэлэхтэрин туттартаатылар.

Үгэс быһыытанан быыстапка аһыллыбытын бэлиэтиир кыһыл аалай лиэнтэни мустубут дьон ытыс тыаһын доҕуһуолугар Пелагея Николаевна, Ия Володаровна уонна Артур Дмитриевич быспыттарын кэннэ, мустубут дьон Алексей Егорович Евстафьев үйэлэр тухары хаалларбыт сүппэт-симэлийбэт уруһуйдарын көрдүлэр. Маны сэргэ, быыстапка аһыллыытыгар анаан искусствовед Ия Покатилова худуоһунньук уруһуйдарын түмэн альбом оҥорон таһааттарбыта дьон-сэргэ сэҥээриитин ылла. 

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 815 Источник: ЯСИА Автор: Семен Аргунов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ