Итиннэ биир сүрүн тирэҕинэн, 2000 сыллаахтан оскуола иһинэн үлэлиир “Пламя” байыаннай-патриотическай кулууп буолар. Бу күннэргэ “пламялар” Москва куоракка “Часовой у Знамени Победы” диэн Бүтүн Россиятааҕы акцияҕа кытыннылар.
Биһиги ОБЖ учууталын, СР үөрэҕирии туйгунун, “Патриот России” мэтээл кавалерын, “Пламя” кулууп салайааччыта Владимир Протопоповы кытта кэпсэттибит.
“Кулуупка сүрүннээн 9-11 кылаас үөрэнээччилэрэ сылдьаллар. Быйыл республикатааҕы байыаннай-патриотическай күрэхтэһиигэ бастааммыт, Севастополь куоракка Улуу Кыайыы 70 сылыгар анаммыт Бүтүн Россиятааҕы “Победа” оонньууга баран күрэхтэспиппит. 44 хамаандаттан 7-с бириистээх миэстэҕэ тиксэммит, балачча тахсыылаахтык кытынныбыт диэн үөрэбит. Онно “Огневой рубеж” диэн сыал ытыытыгар оҕолорбут тэҥнээхтэрин булбатахтара. Строевой хаамыыга 2-с миэстэни ылбыппыт. “Севастополь – Герой куорат” этапка билиини-көрүүнү тургутуһан 5-с миэстэҕэ тахсыбыппыт. Онтон да атын күрэстэһиилэригэр барытыгар ситиһиилэммиппит, ол түмүгэр инники күөҥҥэ тахсыбыппыт. Бу кыттыыбыт түмүгүнэн Москваҕа ыҥырыллыбыппыт, -- диир Владимир Владимирович.
“Пламя” кулууп тэриллиэҕиттэн оҕолор улуустааҕы, республикатааҕы, Россиятааҕы күрэхтэһиилэргэ балачча тахсыылаахтык кытталлар. 2002 сыллаахха Новороссийскай куоракка “Защитник Отечества” күрэхтэһии кыайыылаахтарынан буолбуттара. “Победа” Бүтүн Россиятааҕы күрэстэһиигэ 3-с бочуоттаах миэстэлээхтэр. Казань, Рязань куораттарга инники күөҥҥэ тахсан, биир дойдулаахтарын үөрдүбүттэрэ.
Бу күннэргэ Москваҕа РФ Общественнай палатата Кыайыы 70 сылынан тэрийбит “Часовой у Знамени Победы” Бүтүн Россиятааҕы акциятыгар кытыннылар. Акция кэнчээри ыччат Ийэ дойдутун таптыы, харыстыы, бэриниилээх буола, историяны билэ-көрө улаатарыгар туһаайыллыбыт. Манна “пламялар” “Тыа сирин усулуобуйатыгар ыччаты гражданскай-патриотическай иитии” диэн тиэмэҕэ дакылаат оҥорбуттар, санаа үллэстиитигэр кыттыбыттар, бойобуой албан аат умнуллубат миэстэлэригэр сылдьыбыттар.
Комментарии
Авторизация на сайте через социальные сети