«Олоҥхо дойдутун искусствота» диэн ааттаах улахан бырайыак Кытайга Россия култуурытан фестивалын чэрчитинэн олоххо киирэн, икки дойду култуураҕа сибээһэ сайдарыгар, доҕордуу сыһыан бөҕөргүүрүгэр улахан суолталанна. Манна даҕатан эттэххэ, Россия президенэ Владимир Путин ахсынньы 9 күнүгэр Мариинскай театр попечительскэй сэбиэтин мунньаҕын ыытарыгар Азия-Тихэй акыйаан регионун дойдуларын кытары хардарыта гастроллары тэрийии үлэтин кэҥэтиэххэ диэн ойуччу бэлиэтээбитэ тоҕоостоох.
Саха сирин делегациятын Ил Түмэн бэрэссэдээтэлэ Александр Жирков салайан илдьэ сырытта, элбэх тэрээһиннэргэ кытынна. Олортон сорохторун кытта билиһиннэрдэххэ, Пекиҥҥэ тиийээт, делегация салайааччыта КНР-га РФ суһал ыҥырыылаах уонна боломуочуйалаах посола Андрей Денисовы кытары боротокуол быһыытынан көрүстэ. Александр Жирков өрөспүүбүлүкэ экономикаҕа уонна инвестицияҕа көрдөрүүлэринэн дойду уон бастыҥ регионугар киирбитин иһитиннэрдэ. Кэпсэтии кэмигэр Кытай уонна Саха Өрөспүүбүлүкэтин икки ардыларыгар экономикаҕа, култуура эйгэтигэр бииргэ үлэлээһин кэскилин, сайдар өрүттэрин дьүүллэстилэр.
Салгыы Посольство дьиэтигэр Саха сирин делегациятын аатыттан буолбут үөрүүлээх тэрээһиҥҥэ Россия КНР-га посола Андрей Денисов: “Маннык көрсүһүүлэр сүрүн сыаллара – Россияны уонна дойду регионнарын кытта билсиһиннэрии, ол быһыытынан бүгүн Кытай киинигэр хатыламмат баай култууралаах саамай бөдөҥ өрөспүүбүлүкэни уруйдаан-айхаллаан көрсөбүт. Бу күннэргэ Пекин олохтоохторо уонна ыалдьыттара Саха сирин култууратын үгүс өрүтүн бастыҥ холобурдарын кытта билсэр, көрөр кыахтаннылар", - диэн эттэ.
Делегация салайааччыта Александр Жирков Россия Кытайы кытта экономикаҕа уонна култуураҕа сибээһин сайыннарыы дьоһун суолталааҕын бэлиэтээтэ. Спикер Кытайы кытта дьыалабыай сибээс өрөспүүбүлүкэҕэ эрэ буолбакка, улуустар таһымнарыгар эмиэ олохтонорун аҕынна. Итиэннэ регионнар уонна норуоттар икки ардыларыгар култуурунай ситим бөҕөргүүрүгэр кылаатын иһин Андрей Денисовка Ил Түмэн бэрэссэдээтэлин Махтал суругун туттарда.
Бу күн Александр Жирков Россия култуурунай киинигэр Саха сирин норуодунай суруйааччыта Николай Лугинов "Улуу Хууннар" («Граница») кинигэтин сүрэхтэниитигэр кыттынна. Александр Николаевич Николай Лугинов Бүтүн Россия таһымнаах личность буоларын, суруйааччы айымньыларыттан биир бастыҥнара кытай тылынан тылбаастаммыта дириҥ суолталааҕын, улахан ситиһии буоларын ыйда. Биһиги норуоппут историята кытай историческай суругар-бичигэр ахтылларын, олортон сорохторо күн бүгүнүгэр диэри чинчийээччилэргэ толору арылла иликтэрин туһунан эттэ. "Улуу Хууннар" кинигэ кытай тылынан тахсыбыта элбэҕи кэрэһилиир уонна эрэннэрэр – кытай айымньытын нууччалыы, сахалыы бэчээттээн таһаардахпытына, норуоттарбыт былыргы историялырын дириҥэтэн өйдүүргэ улахан кыахтары арыйыахпыт», -- диэн бэлиэтээтэ спикер.
Цинхуа театрыгар Саха Өрөспүүбүлүкэтин Култууратын күннэрин үөрүүлээх арыллыытыгар Александр Жирков Саха сирин Ил Дарханын Егор Борисов махталын Даляннааҕы технологическай университет профессора, поэт, Николай Лугинов айымньытын кытайдыы тылынан тылбааһын литературнай эрэдээктэрэ Чэнь Вейгэ уонна Куньцюй театр президенэ Янг Феҥҥэ туттарда.
Саха сирин култууратын күннэрин кэмигэр Кунцюй театр артыыстара "Туналҕаннаах ньуурдаах Туйаарыма Куо" олоҥхоҕо олоҕурбут туруорууну, Олоҥхо театра "Пионовай беседка" кытай классическай драматын, Cаха театра «Ойуун түүлэ» спектаклы, Опера уонна балет театра “Кинээс Игорь” операны көрдөрүүлэрэ -- норуоттар култуураларын, искусстволарын өрөгөй чыпчаалларынан буоллулар.
Комментарии
Авторизация на сайте через социальные сети