Петр Алексеев аатынан уулусса 97/1 нүөмэрдээх дьиэтигэр баар Оҕо анал дьиэтэ 5 664 кв. м иэннээх уонна 150 миэстэлээх. Саҥа дьиэни туһаҕа киллэрии үөрүүлээх түгэнигэр СӨ Судаарыстыбаннай Мунньаҕын (Ил Түмэн) спикерэ Александр Жирков, СӨ Бырабыыталыстыбатын бэрэссэдээтэлин солбуйааччы Алексей Дьячковскай, РФ Президенигэр Саха сирин бастайааннай бэрэстэбиитэлэ Алексей Стручков, куорат мээрэ Айсен Николаев сылдьан эҕэрдэлэрин эттилэр.
СӨ доруобуйа харыстабылын миниистирэ Александр Горохов Оҕо дьиэтигэр иитиллээччилэр ахсааннара сыллата аҕыйаан иһэрин тоһоҕолоон бэлиэтээтэ. «Бырайыак быһыытынан, биһиги 100 миэстэҕэ суоттаммыппыт. Ол гынан баран, Оҕо куораттааҕы анал дьиэтигэр 60-тан тахса оҕо баар. Ахсаан аҕыйыыра үөрдэр. Оҕо төрөппүттэригэр иитиллиэхтээх. Кинилэр бары дьиэ кэргэттэригэр төнүннэхтэринэ да, саҥа дьиэ кураанахсыйыа суоҕа. Тоҕо диэтэххэ, Оҕо дьиэтэ медицинскэй тэрилтэнэн буолар. Онон манна, баҕар, паллиативнай көмө отделениета аһыллыан сөп», – диэтэ.
Биллэрин курдук, Оҕо дьиэтэ тулаайах оҕо ахсаанын аҕыйатыыга, төрөппүт көрүүтэ-истиитэ суох хаалбыт оҕолор балаһыанньаларын тупсарыыга туһуламмыт социальнай политиканы олоххо киллэриигэ үлэлэһэн кэллэ. Тэрилтэ үлэтин өссө биир дьоһун соругунан оҕону дьиэ кэргэнигэр төнүннэрии буолар.
Кэнники уон сылга Оҕо дьиэтигэр 2 тыһыынчаҕа чугаһыыр кырачаан олордо. Кинилэртэн 320 оҕо төрөппүттэригэр төнүннэ, 125 оҕо уонна үөрэх тэрилтэлэригэр көһөрүлүннэ, 250 кырачаан саҥа төрөппүттэрдэннэ.
123 үлэһиттээх кэлэктииби 2014 сылтан кылаабынай быраас э.т., үрдүк категориялаах педиатр-быраас, СӨ доруобуйа харыстабылын туйгуна Лена Бубякина салайар.
– Биһиги сүрүн сорукпутунан оҕолорго ийэлии кыһамньыны олохтооһун, ону сэргэ биир кэлим медицинскэй-педагогическай, реабилитационнай көмөнү оҥоруу, кинилэр бырааптарын уонна интэриэстэрин көмүскээһин буолар, – диэн эттэ Лена Васильевна мустубут ыалдьыттарга тэрилтэтин үлэтин-хамнаһын билиһиннэрэригэр.
Кини эппитинэн, биир ыал оҕолоро тутуспутунан Оҕо дьиэтин иитиллээччилэрэ буолар дьылҕаланаллара олус хомолтолоох. Кинилэр бары кэриэтэ араас утумнуур ыарыылаах, ыарыыны утары охсуһар күүстэрэ мөлтөх буолар. Манна кинилэргэ анаан эмтиир физкультура, уунан эмтээһин, массаас, физиотерапия, музыкаҕа уһуйуу кабинеттара үлэлииллэр. Үрдүк технологиялаах медицинскэй көмөҕө наадыйааччылары суһаллык эмтээри регионнааҕы уонна федеральнай кииннэргэ ыыталлар.
Кэлэктиип инники былаана киэҥ. Холобур, кыра саастаах оҕолор уйулҕаларын үөрэтии саҥа арыйыыларыгар олоҕуран «Оҕо дьиэтин модернизациялааһын» бырайыагы олоххо киллэрэргэ былаанныыллар. Бу бырайыак тулаайах уонна төрөппүт көрүүтэ-истиитэ суох хаалбыт оҕолорго өссө үчүгэй усулуобуйаны тэрийиигэ уонна ыарыыны аҕыйатыыга туһуланар.
Комментарии
Авторизация на сайте через социальные сети