ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 декабря 2015, 10:07

Сунтаарга алмаастаах Мииринэй күннэрэ ситиһиилээхтик ыытылыннылар


Быйыл Мииринэй оройуона тэриллибитэ 50 сыллаах үбүлүөйүн киэҥник бэлиэтиир. Ол чэрчитинэн ахсынньы 4 - 5 күннэригэр Сунтаарга алмаастаах Мииринэй күннэрэ бэрт тэрээһиннээхтик ыытылыннылар.

Ыаллыы улууспут 200-тэн тахса киһилээх улахан делегациятын оройуон баһылыга Ришат Юзмухаметов салайда.

Ахсынньы 3 күнүгэр Мииринэй делегацията уруккуттан шефтэһэр Тойбохойдооҕу оҕо дьиэтигэр, орто оскуолаҕа, Г.Е. Бессонов аатынан музейга сылдьыбыта.

Онтон ахсынньы 4 - 5 күннэригэр улуус киинигэр бииртэн биир араас кэрэхсэбиллээх тэрээһиннэр тиһигин быспакка ыытылыннылар. 

photoByWidth&id=51672&width=1000

Бастакы күн

Күннэр бастакы тэрээһиннэринэн Айыы Арчытын дьиэтигэр аһыллыбыт А.С. Гольдман аатынан минераллар музейдарын арыйыы уонна «Призвание» диэн кинигэ сүрэхтэниитэ буолла.

Музей аһыллыытыгар А.С. Гольдман кыыһа Мииринэйдээҕи политехническай институт директора, Сунтаар улууһун бочуоттаах гражданина Альбина Гольдман, Мииринэй оройуонун дьаһалтатын баһылыгын үпкэ уонна экономикаҕа солбуйааччы Георгий Башарин, улуус баһылыга Анатолий Григорьев, о.д.а. кыттыыны ыллылар.

Бу музей аһыллыытыгар биир улахан оруоллаах киһинэн В.А. Кондаков аатынан СӨ норуот эмчиттэрин ассоциациятын президенэ, ЮНЕСКО иһинэн норуот эмчиттэрин магистра А.И. Яковлева буоларын бэлиэтиир тоҕоостоох.

Онтон Сунтаардааҕы политехническай лицей-интернат базатыгар «История алмазного региона» научнай-практическай конференция сыалын-соругун ситэрдии ыытылынна. Манна ХИФУ-тан, Мииринэйдээҕи политехническай институттан экспертэр кэлбиттэр.

Оҕолор 6 араас секциянан дакылааттарын, бырайыактарын көмүскээтилэр. Экспертэр кинилэргэ араас сүбэни-аманы биэрдилэр. Конференция түмүгүнэн инникитин олохтоох кадрдары бэлэмнииргэ өрөспүүбүлүкэ үрдүнэн политехническай үөрэхтээһини олохтуурга, сайыннарарга үлэни ыытар туһунан эттилэр.

Ити күн оройуон киин библиотекатыгар уруккута улуус айар талааннаахтарын чугас доҕордоро, Сунтаар улууһун, Мииринэй оройуонун бочуоттаах гражданиннара Мэри Софианиди сырдык кэриэһигэр «Слова мои – жемчужины» диэн ахтыы биэчэрэ элбэх киһи интэриэһин тарта. Мииринэй оройуонун киин библиотекатын директора А.В. Никифорова 4 саҥа кинигэни бэлэх уунна. Көрсүһүүгэ икки оройуон баһылыктарын үпкэ уонна экономикаҕа солбуйааччылара Георгий Башарин уонна Михаил Прокопьев кыттыылара биэчэри өссө үрдүк таһымнаата.

«Добун» КК биир дойдулаахпыт, Суруйааччылар норуоттар икки ардыларынааҕы сойуустарын холбоһугун чилиэнэ, поэтесса А.М. Григорьева-Сандаарыйа үбүлүөйдээх сааһыгар аналлаах «Музыка сфер» диэн литература биэчэрэ бэрт сэргэхтик барда. Биэчэргэ Дьокуускайтан суруйааччылар Дмитрий Наумов, Саргылаана Гольдерова-Саргы Куо, Мииринэйтэн Андрей Шушминцев, улууспут айар талааннаахтарын бэрэстэбиитэллэрэ кыттыыны ыллылар.

photoByWidth&id=51671&width=1000

Иккис күн

Субуота күн Мииринэй оройуонун баһылыга Ришат Юзмухаметов салайааччылаах официальнай делегацияны биһиги улууспут баһылыга Анатолий Григорьев салайааччылаах улуус дьаһалтатын эппиэттээх үлэһиттэрэ, Кириэстээх олохтоохторо алмаас таас аан бастаан көстүбүт историческай сиригэр - Кириэстээххэ көрүстүлэр. Хардарыта эҕэрдэлэһии кэнниттэн Аҕа дойду Улуу сэриитин кыттыылаахтарыгар аналлаах обелиска сибэкки уурдулар. Онтон араас массыына колонната Сунтаар диэки айанныыр.

Делегация чилиэннэрэ Сунтаарга кэлээт, Айыы Арчытын дьиэтигэр анал алгыһы ыллылар, А.С. Гольдман аатынан минераллар музейдарын көрдүлэр.

Ити күн Олоҥхо дьиэтигэр Мииринэй оройуонун «Алмазные грани таланта» диэн декоративнай-прикладной ойуулуур искусство маастардарын, худуоһунньуктарын уонна уран тарбахтаахтарын быыстапкатын элбэх киһи сэргии көрдө.

Улуус библиотекатыгар «50 алмазных лет. История алмазного края» диэн кинигэ быыстапката олус интэриэһинэй буолла. Оройуон баһылыга Ришат Юзмухаметов бэйэтэ 20-чэ кинигэ автора, историческай наука кандидата эбит. Ришат Нургалиевич бэйэтин айымньыларын билиһиннэрэн туран, «Новые грани алмазной истории» диэн бэртээхэй кинигэни бэлэх уунна. Быыстапканы Т.Н. Иванова директордаах биһиги библиотекабыт үлэһиттэрэ бэрт тэрээһиннээхтик ыыттылар.

Күннэри ыытыы аҥардас култуурунай эрэ өттүгэр охтубата. Ол курдук, биир сонун тэрээһининэн хапсаҕайга уонна мас тардыһыытыгар улуустартан 5-тии киһи күөн көрсүүлэрэ буолла. Түмүккэ икки көрүҥҥэ иккиэннэригэр олохтоохтор кыайыыны ситистилэр.

Мииринэй күннэрин биир чыпчаал тэрээһининэн киэһэ 5 чаастан «Добун» КК буолбут «Золотой юбилей алмазного края» диэн мииринэйдэр үйэ аҥардаах үбүлүөйдэригэр анаан бэлэмнээбит концертара буолла диэххэ сөп. «Добуммут» саалатын иһэ өтөрүнэн туолбатаҕын туолла. Мииринэй курдук улахан оройуон айар талааннаахтарын концера да онно эппиэттиирдии бэрт өрө көтөҕүллүүлээхтик, биир тыынынан барда диэтэххэ, омун буолбата буолуо. Эйэ, дьол куоратыгар Мииринэйгэ үгүс араас омук бэрэстэбиитэллэрэ, өрөспүүбүлүкэ үгүс улуустарыттан тыһыынчанан студеннар баалларын туоһутунан бииртэн биир араас омуктуу ырыалар, үҥкүүлэр көрөөччүлэр куттарын тутуохтарын туттулар. Мииринэй сириттэн сахалыы тойук дуорайара, эһиэкэй эҥсиллэрэ, дьэ, истиэххэ чахчы астык буолла. Ити курдук, мииринэйдэр айар талааннара алмаас таас араас өҥүнүү күлүмүрдүү оонньоото.

photoByWidth&id=51670&width=1000

Түмүк оннугар

Икки күн устата ыытыллыбыт Мииринэй оройуона төрүттэммитэ үйэ аҥардаах үбүлүөйүн тэрээһиннэрин чэрчитинэн ыытыллыбыт Күннэр түмүктэ-ригэр Мииринэй оройуона уонна Сунтаар улууһа бииргэ үлэлиир туһунан сөбүлэһиилэригэр улуустар баһылыктара Ришат Юзмухаметов уонна Анатолий Григорьев үөрүүлээх быһыыга-майгыга илии баттаатылар.

Түмүк мунньахха икки улуус нэһилиэктэрин баһылыктара, тэрилтэлэр салайааччылара, оройуон Сэбиэтин депутаттара кыттыыны ыллылар.

Биһиги улууспут баһылыга Анатолий Григорьев бу саҥа түһэрсиллибит сөбү-лэһии саҥалыы тыыннанан саҥалыы күүһүнэн үлэлиэҕэр эрэлин эттэ. Оттон Мииринэй оройуонун аҕа баһылыга Ришат Юзмухаметов өссө уруккута биир улуус буола сылдьыбыт түөлбэлэр билигин туох да атыҥыраһыыта суох бииргэ үлэлииллэригэр саарбахтааһын суох диэтэ.

Дьэ, ити курдук алмаастаах Мииринэй оройуонун күннэрэ Олоҥхо дойдута Сунтаар сиригэр сүрдээх өрө көтөҕүллүүлээхтик аастылар.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 622 Источник: ЯСИА Автор: Борис Николаев Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ