Петр Михайлович үөрэҕин бүтэрэн кэлиэҕиттэн, 20-чэ сыл тренеринэн харыс да сири халбарыйбакка төрөөбүт-үөскээбит Нөмүгүтүгэр үлэлээн ситиһиитэ элбэх этэ. Араас сылларга, Саха өрөспүүбүлүкэтин, Россия таһымнаах күрэхтэһиилэрин чемпионнарын уонна призердарын иитэн таһаарбыта. Кини үөрэнээччитэ Максим Заморщиков 2014 сыллаахха, Словакия Снина куоратыгар оҕолорго көҥүл тустууга Аан дойду чемпионатыгар 42 кг ыйааһыҥҥа үрүҥ көмүс мэтээл хаһаайынынан буолбута. Хомойуох иһин, тренерэ үтүө сонуну истибэккэ эрэ, бу орто дойдуттан барбыта.
Турнир тэрийээччилэрэ, П.М.Каженкин иитиллээччилэрэ Хаҥалас улууһун спортка управлениетын салайааччыта Ю.Ю.Никифоров, Хаҥалас улууһун оҕо спортивнай оскуолатын дириэктэрин солбуйааччы В.Д.Громов, «Нөмүгүтээҕи килиэп собуота» генеральнай дириэктэрэ В.А.Нестеров, П.М.Каженкин кэргэнэ В.А.Каженкина, улахан эдьиийэ А.М.Беляева, ыраахтан-чугастан кэлбит доҕотторо ахтан-санаан аастылар. Турнир аһыллыытыгар Саха эстрадатын чаҕылхай толорооччута Аскалон Павлов бэйэтинэн кэлэн, эрчимнээх ырыаларын бэлэхтээн ааста. А.В.Дмитриев аатынан Ой орто оскуолатын IV кылааһын үөрэнээччилэрэ тэтимнээх сахалыы үҥкүүнү толордулар. Турнир үгүс-элбэх ыалдьыттара тэрийээччилэргэ уонна чуолаан П.М.Каженкин кэргэнигэр В.А.Каженкинаҕа олус махтаннылар. Манна даҕатан, кэргэнин туһунан аҕыйах тылы этэригэр Варвара Александровнаттан көрдөстүм:
- Кэргэним 1992 сыллаахтан Хаҥаластааҕы оҕо спортивнай оскуолатыгар тренеринэн тиһэх күннэригэр диэри үлэлээбитэ, олоҕун бүтүннүү спортка анаабыта. Бу сыллар устата кини тустуунан олорбута, оҕолору эрчийэн, күрэхтэһиннэрэн уонна үгүстүк айанныыр этэ. Кини, «50 сааспын туоларбар улахан түһүлгэни тэрийиэм” диэн баҕа санаалааҕа. Бу күрэхтэһиини эрчийбит-дьарыктаабыт оҕолоро, иитиллээччилэрэ үлэтин сыаналаан, убаастаан олус үчүгэйдик тэрийдилэр. Тэрээһин сүрүн ороскуотун «Нөмүгүтээҕи килиэп собуота» генеральнай дириэктэрэ В.А.Нестеров уйунна, сүүрдэ-көттө.Тэрийээччилэргэ махталым муҥура суох, - диэтэ кэргэнэ олус долгуйан туран.
Күрэхтэһии кылаабынай судьуйатынан, сахабыт сирин киэн туттуута, улахан ааттаах-суоллаах, көҥүл тустууга Аан дойду кубогын 1998 сыллаах кыайыылааҕа, Андрей Вячеславович Яковлев, кылаабынай сэкирэтээринэн Василий Васильевич Уйгуров, өрөспүүбүлүкэтээҕи категориялаах судьуйалар үлэлээтилэр. Күрэхтэһии быыһыгар Андрей Яковлевтан тустуу туһунан туоһуластым:
- Манна Горнай, Нам, Чурапчы, Уус-Алдан, Мэҥэ-Хаҥалас, Хаҥалас улуустарыттан Дьокуускай куораттан Р.М.Дмитриев аатынан “олимпийскай эрэллэр” училищетыттан уонна 3 №-дээх Оҕо спортивнай оскуолатын хамаандалара кэлэн кытта сылдьаллар. Ыйааһын аайы састаап күүстээх, күрэхтэһии таһыма үрдүк. Судьуйалары эттэххэ, норуоттар икки ардыларынааҕы кылаастаах судьуйа Николай Николаев үлэлии сылдьар. Бастакы турнир буолан кыттааччы арыый аҕыйах соҕус. Ол да буоллар, сылтан сыл кыттааччыта элбиэ уонна өрөспүүбүлүкэбитигэр оҕолорго биир саамай бастыҥ турнир буолуо дии саныыбын. П.М.Каженкин иитиллээччилэрэ олус үрдүк таһымнаахтык тэрийбиттэр, бу кинилэр уһуйааччыларыгар уһулуччу убаастабыллара, сүгүрүйүүлэрэ, ытыктабыллара көстөр, - диэн санаатын үллэһиннэ кылаабынай судьуйа, бэйэтин кэмигэр охтубатах бөҕөс.
Турнирга, этэн аһарбытым курдук Россия, өрөспүүбүлүкэ призердара, чемпионнара баар буоланнар уонна анал тустуу оскуолаларыгар эрчиллэр-үөрэнэр оҕолор кэлэннэр, тустуу хара маҥнайгыттан олус сытыытык барда. Бары ыйааһыннарга уонтан тахсалыы оҕо күөн көрүстүлэр. Эдэр бөҕөстөр кэтэмэҕэйдээн турбакка, уҥа-хаҥас бырахсан истилэр. Ол иһигэр кыайан иһэн кыайтарааччы эмиэ баар. Биһиги Хаҥаластар саамай кыра ыйааһыҥҥа күннээтибит, манна 35 кг. барыта 14 кыттааччы баара, бөҕөстөрбүт үһүөн миэстэлэстилэр. Ол иһигэр, кэлиҥҥи сылларга педьестал үрдүттэн түспэт тустуук Кирилл Дорожкин буоларын курдук бастаата. Иккис дьоһуннаах миэстэҕэ Саша Пастухов таҕыста уонна үһүс бочуоттаах үктэлгэ өрүү бииргэ эриһэн хачымахтаһан тустар Олег Давыдов тиксэн дьоһун ситиһиилэннэ. Бу ыйааһыҥҥа, өссө биир үһүс миэстэни Дима Григорьев (Дьокуускай к. Р.М.Дмитриев аатынан “олимпийскай эрэллэр” училищета) ылла.
Тэрийээччилэр хапсаҕайдаһан тустууга сүрүн бириис быһыытынан мотоциклы, уонна ЖК телевизоры туруорбуттара. 50 кг дылы ыйааһыннаах бөҕөстөргө аҕыс эдэр хапсаҕайдьыт сүрүн бириис иһин бэйэлэрин тургутан көрдүлэр. Манна II Дьөппөн үүнэн иһэр тустууга Павел Прокопьев барыларын охторон кыайыылааҕынан таҕыста уонна ЖК телевизоры илдьэ барда. Оттон 50 кг үөһэ ыйааһыннаахтарга, 22 хоһуун уол суруттаран тустубутуттан, ордон тахсан эмиэ II Дьөппөн тустууга оскуолатын уолана билигин Р.М.Дмитриев аатынан “олимпийскай эрэллэр” училищетыгар 11 кылааска үөрэнэр Стас Филиппов кыайан-хотон, тренер П.М.Каженкин иитиллээччилэрин турнирын бастакы хапсаҕайга муҥутуур кыайыылааҕын аатын ылла уонна сүрүн улахан бирииһи мотоциклы ылла. Маны сэргэ, бастыҥ бөҕөстөрү бэлиэтээтилэр, ол курдук Христофор Потаповка (Чурапчы), автошкола бэрэстэбиитэлэ Е.С.Никифоров массыына ыытар көҥүлгэ үөрэнэригэр анаан 30000 солк. сертификат туттарда. “Бастыҥ тренер” аатын уонна 15000 солк. Артур Константинов (Амма) наҕараадаланна. Кирилл Дорожкин «Турнир кэскиллээх бөҕөһө» ааты ылла уонна 15000 солк. бириэмийэлэннэ. Итини тэҥэ Каженкиннар дьиэ кэргэттэрэ өссө тахсыылаахтык тустарыгар анаан “борцовка” бэлэхтээтилэр. Быйылгы турнир үрдүк таһымнаахтык тэрээһиннээхтик барбытын бэлиэтиир наада. Сылын аайы бу кэмҥэ П.М.Каженкин иитиллээччилэрин турнира өссө элбэх эдэр бөҕөстөрү түмэригэр, кэскиллээх оҕолор үүнэн тахсалларыгар баҕарабыт.
Ааптар хаартыскаҕа түһэриитэ.
Оҕолорго көҥүл тустууга П.М.Каженкин иитиллээччилэрин өрөспүүбүлүкэтээҕи аһаҕас турнирын кыайыылаахтара
42 кг 9 кыттааччы
1 миэстэ – Агаев Эльшад (Дьокуускай к. 3-с №-дээх О5о спортивнай оскуолата)
2 миэстэ – Ефимов Костя (Уус-Алдан)
3 миэстэ – Иванов Дьулус (Чурапчы)
3 миэстэ – Винокуров Мичил (Чурапчы)
50 кг 10 кыттааччы
1 миэстэ – Васильев Миша (Горнай)
2 миэстэ – Иган Александр (Дьокуускай к. Р.М.Дмитриев аатынан “олимпийскай эрэллэр” училищета)
3 миэстэ – Каженкин Михаил (Уус-Алдан, Хаҥалас)
3 миэстэ – Стручков Саян (Уус-Алдан)
55 кг 13 кыттааччы
1 миэстэ – Иванов Вилюян (Чурапчы)
2 миэстэ – Неустроев Дьулус (Чурапчы)
3 миэстэ – Туприн Михаил (Уус-Алдан)
3 миэстэ – Сивцев Юрий (Дьокуускай к. Р.М.Дмитриев аатынан “олимпийскай эрэллэр” училищета)
58 кг 9 кыттааччы
1 миэстэ – Тотонов Дьулусхан (Дьокуускай к. Р.М.Дмитриев аатынан “олимпийскай эрэллэр” училищета)
2 миэстэ – Архипов Сергей (Чурапчы)
3 миэстэ – Сивцев Станислав (Чурапчы)
3 миэстэ – Максимов Сергей (Чурапчы)
65 кг 12 кыттааччы
1 миэстэ – Потапов Христофор (Чурапчы)
2 миэстэ – Романов Айсен (Дьокуускай к. Р.М.Дмитриев аатынан “олимпийскай эрэллэр” училищета)
3 миэстэ – Овчинников Богдан (Уус-Алдан)
3 миэстэ – Кривошапкин Владислав (Чурапчы)
65 кг үөһэ 7 кыттааччы
1 миэстэ – Перов Иван (Дьокуускай к. Р.М.Дмитриев аатынан “олимпийскай эрэллэр” училищета)
2 миэстэ – Голиков Юрий (Дьокуускай к. Р.М.Дмитриев аатынан “олимпийскай эрэллэр” училищета)
3 миэстэ – Диодоров Ньургун (Чурапчы)
3 миэстэ – Аммосов Семен (Чурапчы)
Комментарии
Авторизация на сайте через социальные сети