ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 августа 2015, 11:06

Нам улууһа саҥа тутууларынан киэркэйиэ


Тутуу — нэһилиэк сайдыытын тэтимин көрдөрөр, оҕолорбутун, сиэннэрбитин билиигэ кынаттыыр, ыччаттарбытын эт-хаан өттүнэн сайдалларыгар, специалистар олохсуйан үлэлииллэригэр — көдьүүстээх, таһаарыылаах үлэ бигэ акылаата буолар. Онон Нам улууһугар араас хабааннаах тутуу сыллата ыытыллар.

photoByWidth&id=41493&width=1000

Нам улууһугар билигин инвестиционнай программанан, «Үтүө дьыала» хамсааһын чэрчитинэн, улуус дьаһалтатын үбүлээһининэн — уопсайа 26 объект тутулла турар. Ол курдук, атырдьах ыйын 5 күнүгэр «Нам улууһа» МТ баһылыга Александр Атласов, улуус баһылыгын тутууга солбуйааччы эбээһинэһин толорооччу Александр Спиридонов уонна «Служба единого заказчика» МКУ директора Александр Алексеев быйыл үлэҕэ киириэхтээх объектарга сырыттылар, тутааччылары кытта кэпсэттилэр.

photoByWidth&id=41494&width=1000

Ол туһунан Александр Спиридонов бу курдук билиһиннэрдэ: «Үтүө дьыала» программа чэрчитинэн быйыл үлэҕэ киириэхтээх 7 объект тутуута саҕаламмыта. Ол эрээри, Кыһыл Дэриэбинэҕэ тутулла турар элбэх функциялаах киин эһиил үлэҕэ киирэр буолла. Онтон алтата хайаан да быйыл үлэҕэ киирэрэ былааннанар. Ол курдук, 1 Хомустаахха уонна Көбөкөҥҥө спортивнай саала, Никольскайга административнай-культурнай киин, Ленскэй нэһилиэккэ уонна Граф Биэрэгэр 50 миэстэлээх таас оҕо саада, Бөтүҥ оскуолатыгар спортивнай саала үлэҕэ киириэхтэрэ.

photoByWidth&id=41488&width=1000

Үөдэй нэһилиэгэр 2014 сыллаахха СР правительствотынан үп-харчы көрүллэн 550 миэтэрэ усталаах халаан уутуттан көмүскүүр даамба оҥоһуллубута. Быйыл эмиэ үп көрүллэн 880 миэтэрэ эбии тутуллан — даамба уһуна 1 км. 430 м. тэҥнэстэ. Бу саас даамба үөдэйдэри ууттан көмүскээтэ. Онон даамба оҥоһуутугар үлэ салгыы өссө барыаҕа - 700-кэ миэтэрэ эбэн биэрдэхпитинэ ууга барар куттал суоһаабат буолуоҕа.

«Хаарбах дьиэттэн көһөрүү» программанан «Намстрой» МУП ХЭУо 6 квартиралаах таас дьиэни тута сылдьар. Бастакы этээһэ бүтэн турар, иккис этээһи оҥорууга үлэ тэтимнээхтик барар. Олохтоохтор күһүн дьиэҕэ кыстыы киириэхтээхтэр.

photoByWidth&id=41489&width=1000

Салгыы Партизан нэһилиэгэр тутулла турар 165 миэстэлээх таас оскуолаҕа сырыттыбыт. Бэдэрээтчигинэн «Адгезия» ХЭУо үлэлиир. Билиҥҥи туругунан бастакы этээһэ барыта бүтэн, иккис этээһигэр үлэ барар. Матырыйаал тиһигин быспакка кэлэ турар, онон тутааччылар үлэлииллэригэр туох да харгыс суох. Ахсынньы ыйга Партизан олохтоохторо, үөрэнээччилэрэ, учууталлара киэҥ-куоҥ, сырдык, сылаас саҥа таас оскуолалара үлэҕэ киириэҕэ.

photoByWidth&id=41490&width=1000

Никольскайга «Үтүө дьыала» программанан административнай-культурнай киин тутуллубута үһүс сыла буолла. Быйыл түмүктэниэхтээх. Билиҥҥи туругунан каркааһа туран, ис үлэтэ хаалла, муостатын тэлгииллэр.

Ленскэй нэһилиэккэ «Обеспичения жильем детей сирот и детей, оставшихся без попечения родителей» диэн программанан СР Үөрэҕин министерствотыттан 25 мөл. 500 тыһ. солк. көрүллэн 14 квартиралаах 2 этээстээх таас дьиэ тутулла турар. Дьиэни «Намстрой» МУП ХЭУо тутар. Сваялара түһэн, нулевой циклэ оҥоһулла сылдьар. Ахсынньы ыйга үлэҕэ киирэрэ былааннанар. Маны таһынан, «Хаарбах дьиэттэн көһөрүү» программа чэрчитинэн «Ленскэй нэһилиэк» МТ сакааһынан «Авангард» ХЭУо 17 уонна 15 квартиралаах 2 таас дьиэни тута сылдьар. Тутуу график быһыытынан барар. Ахсынньы ыйга 32 дьиэ кэргэн саҥа дьиэ күлүүһүн тутуохтара.

Граф Биэрэгэр «Үтүө дьыала» чэрчитинэн саҥа технологиянан 50 миэстэлээх таас оҕо саада тутуллубута иккис сыла буолла. Бу Нам улууһугар «легкие стальные конструкции» диэн саҥа технологиянан тутуллар бастакы объект буолар. Дьиэ үрдүн сабыытын, кырыыһа атахтарын бу технологиянан оҥордулар. Маннык ньыма үлэни түргэтэтэр, мастааҕар ыйааһына чэпчэки, баһаартан куттала суох уонна үйэлээх буолар. Объегы «Регион-Строй» ХЭУо тутар. Былаан быһыытынан, ахсынньыга үлэҕэ киириэхтээх, ол эрэн тутааччылар объегы үлэҕэ болдьоҕун иннинэ киллэрэргэ кыһаллаллар.

photoByWidth&id=41492&width=1000

Бөтүҥ оскуолатыгар «Үтүө дьыала» программанан «Альта-Трейд» ХЭУо спорт саала тутар. Билиҥҥи туругунан көҥдөйө туран, сылытар тиһигин таҥа сылдьаллар. Былаантан хаалыы суох. Онон Бөтүҥ олохтоохторо өр кэтэспит объектара быйыл үлэҕэ киирэрэ былааннанар.

Көбөкөҥҥө 2014 сыллаахха административнай-культурнай киин тутуллан үлэҕэ киирбитэ. Онно сыһыары культурнай-спортивнай комплексы «Мас-2000» ХЭУо тутан быйыл үлэҕэ киллэриэҕэ. Тутуу матырыйаала барыта кэлэн турар.

Маны таһынан быйыл СР Тутууга министерствота «Үтүө дьыала» программаҕа эбии үп көрдө. Онон биһиги эбии 4 объегы тутар буоллубут. Ол курдук, эдэр специалистар дьиэнэн хааччыллалларыгар анаан муниципальнай квартиралар Хатырыкка (2 кв.), Салбаҥҥа (2 кв.) тутуллан быйыл үлэҕэ киириэхтэрэ уонна 2 Хомустаахха 4 квартиралаах дьиэ тутуллан эһиил бүтүөҕэ. Маны сэргэ Модут нэһилиэгэр 50 миэстэлээх оҕо саада тутуллара былааннанар. Нэһилиэк бэйэтин күүһүнэн вертикальнай планировкатын оҥордо. Мантан күһүн ленточнай фундаменын оҥоруу саҕаланыаҕа, объект 2017 сыллаахха үлэҕэ киириэхтээх.

Улууспут бюджетыттан харчы тыыран инникитин Арбын, Искра оскуолаларыгар уонна Хамаҕатта саха-французскай лицейыгар анаан эһиил саҥа технологиянан спорт саала тутуллуохтаах. Матырыйаала барыта аҕылыллан бэлэм».

Бу тутуулар силиктэрэ ситэн, кэмигэр үлэҕэ киирэн улуус дьонун үөртүннэр, нэһилиэктэр кэрэ көстүүлээх дьиэлэрэ буолан дьэндэстиннэр.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 770 Источник: ЯСИА Автор: Семен Аргунов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ