Улуус баһылыга Борис Попов салайааччылаах бөлөх, ол иһигэр Ньурба куорат баһылыга Алексей Иннокентьев, Маалыкай, Дьиикимдэ, Маар, Хорула нэһилиэктэрин баһылыктара куоракка олорор биир дойдулаахтарын үөрэ-көтө көрүстүлэр, кыынньар кымыһынан, үтэһэлээх этинэн, алаадьынан күндүлээтилэр. Ыһыахха ыраахтан-чугастан ыалдьыт тоҕуоруһа муһунна.
«Уруй-айхал ыһыаҕын» баһылык Борис Попов эҕэрдэ тылынан аста, быйылгы ыһыах Аҕа дойду Улуу сэриитигэр кыайыыны уһансыбыт бэтэрээннэрбитигэр, ытык кырдьаҕастарбытыгар сүгүрүйүү, кэриэстэбил, кинилэр олорбут олохторун, ааттарын үйэтитии ыһыаҕа буолар диэн эттэ. Салгыы үөрүүлээх быһыыга баһылык ньурбалар биир киэн туттар кыыстарыгар, Сергей Зверев аатынан национальнай үҥкүү театрын артыыскатыгар, СР култууратын туйгунугар Алевтина Лукинованы – Ньурба Күөрэгэйин «СР үтүөлээх артыыһа» үрдүк ааты ылбытынан эҕэрдэлээн туран, Бочуот бэлиэтин, Ньурба ыччатын «Баай Тиит» түмсүүтүн актыбыыс оҕолоругар Бочуотунай грамоталары туттарда. Ил Түмэн дьокутааттара Антонина Григорьева, Владимир Прокопьев биир дойдулаахтарын саха Саҥа дьылынан – Ыһыаҕынан эҕэрдэлээтилэр, ситиһиини, табыллыыны баҕардылар.
Ньурбаттан төрүттээхтэр түһүлгэнэн мустан сахалыы астаах мааны остуол тула олорон сонун-нуомас үллэһиннилэр, ирэ-хоро кэпсэттилэр. Бэтэрээннэргэ, ытык кырдьаҕастарга эҕэрдэ үтүөтэ, алгыс мааныта ананна.
Ыһыах араас тэрээһинин, күрэстэрин Ньурба оройуонун Дьокуускай куоракка бэрэстэбиитэлэ Валентин Никифоров салайааччылаах тэрийэр бөлөх иилээн-саҕалаан үрдүк таһымҥа ыытта. «Күөх Ньурба тойуктаах оһуохайа», сахалыы таҥас, «Сэрии сылын оҕото» ырыа-тойук күрэстэрэ, «Ньурба Ньургуна» нэһилиэктэринэн уолаттар күөн күрэстэрэ, нэһилиэктэр түһүлгэлэрин көрүү, мас тардыһыыга, хапсаҕайга, атах оонньуутугар спортивнай күрэстэр көрөөччүлэр болҕомтолорун тартылар. Эстрада сулуһа, биир дойдулаахпыт Игорь Егоров кыттыылаах «Кыайыы сулуһа» кэнсиэр күүскэ биһирэннэ. Атыы-тутуу, хорчуопка киэҥник тэрилиннэ.
Бэс ыйын чаҕылхай, сайаҕас күнүгэр, Үрдүк Айыылар Орто бараан дойдуга муҥутаан чугаһыыр кэмнэригэр, чээлэй күөххэ үктэммит үөрүүнү үксэтэ, алгыс иҥэринээри кэлбит Ньурба үтүө-мааны дьоно тоҕуоруһа мустубут түһүлгэтэ сомоҕолоһуу тыынынан, өрө көтөҕүллүүнэн бэлиэтэннэ, чөл-чэгиэн, сылаас-сайдам олох түстэнэр тыынынан туолла.
Комментарии
Авторизация на сайте через социальные сети