ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
20 ноября 2015, 14:50

Муҥурдаахтар кооперативтара сайдарыгар бары биир киһи курдук үлэлэһэр, көмөлөһөр санаалаахтар


Абый улууһун Муҥурдаах нэһилиэгэр сэтинньи 14 күнүгэр “Муҥурдаах” кооператив хотоно үөрүүлээх быһыыга-майгыга арылынна. Тэрээһиҥҥэ нэһилиэк дьоно бары - кырдьаҕастарга, оскуола улахан кылааһын оҕолоругар тиийэ кытыннылар.

Саҥа хотону аһар кыһыл лиэнтэни “Муҥурдаах” кооператив толорооччу дириэктэрэ, нэһилиэккэ тыа хаһаайыстыбатын исписэлииһэ Светалана Жиркова, нэһилиэк баһылыга Олег Корякин, “Бочуот Знага” уордьан кавалера, бэтэрээн ыанньыксыт Елена Никулина быстылар. Уокка алаадьылаах үрүҥ ас кээһэн, айах тутан, саҥа дьиэни Василий Ребров алҕаата. Кооператив саҥа ыанньыксыта Дария Томская хотон түөрт муннугун буруолатан, үүт кутан, сиэри-туому ситэрдэ. Елена Николаевна бу үөрүүлээх күҥҥэ анаан-минээн бэлэмнээбит алаадьытынан, үрүҥ аһынан мустубут дьону күндүлээтэ. Тэрилтэлэр салайааччылара хотон үлэтигэр наадалаах туттар маллары, иһити-хомуоһу бэлэх туттардылар. Тэрээһини кулууп дириэктэрэ Людмила Новикова иилээн-саҕалаан ыытта.

Хотон тутуутун үлэтэ сааскыттан саҕаламмыта. Миэстэтэ эрдэ көрүллэн, быһаарыллан, панеллары, профилиистэри кыһыҥҥы суолунан аҕалбыттара. Сир үчүгэйдик ирбитин кэннэ турар сирин ыраастатан, тутааччылары кытта дуогабар түһэрсэн, ТХПК салайааччыта Светлана Георгиевна элбэхтэ сүүрдэ-көттө. Туттар матырыйааллары, инструменнары кэлин самолетунан барытын бэйэтэ аҕалтарда. Андрей Чирков салайааччылаах биригээдэ: Николайй Бессонов, Спартак Дохунаев, Леонид Новиков, Олег Собакин кылгас кэмҥэ үтүө суобастаахтык үлэлээн, хотону кыстыкка туттардылар.

Хотон миэстэтин ыраастааһыҥҥа Висса, Ганя Полушкиннар, Артем Дохунаев үлэлээбиттэрэ. Кинилэргэ Николай Чирков сүбэ-ама буолан көмөлөспүтэ. Пилорамаҕа Евгений Ефимов, Гурий Тимофеев, Гаврил Полушкин, Игнат Сорокоумов, Алексей Бабиченко мас астарбыттара. Хотон маһын кэрдиигэ Ростислав Черкашин, Дмитрий Соломов, Владимир Аммосов, киллэриитигэр Юрий Стручков, Валерий Ефимов, Василий Федоров үлэлээбиттэрэ. Өссө биир үчүгэйэ - панеллары, профилиистэри Үрүҥ Хайа олохтооҕо, чааһынай урбаанньыт Юрий Гурьев оҥортордо. Панеллары бэйэтэ аҕалбыта. Профилиистэри Сыаҥааннаах олохтооҕо Семен Бочкарев босхо аҕалан көмөлөспүт. Тутуу ыытыытын кэпсэтиитигэр ТХПК урукку исписэлииһэ Валерий Никулин элбэх үлэни ыыппыта. Онон хотон тутуута элбэх киһи үлэлэһэн түмүктэннэ. Бэлэмнэнии үлэтигэр ити кэмҥэ үлэлээбит нэһилиэк баһылыгын И.И.Ефимов оруола улахан.

Павлов Ф.А., “Эркин” тыа хаһаайыстыбатын кирэдьииттиир кооперативын салайааччы:

Билигин тыа хаһаайыстыбатын кооператива бэйэтэ бас билэр 26 хороҕор муостаах. Ол иһиттэн 10-на ыанар ынах. Аны үчүгэйкээн саҥа хотоннонно. Кооператив инники соруга - сүөһү ахсаанын элбэтии. Сүөһү ахсаана аччыыр, тоҕо диэтэххэ ыччат дьон сүөһүгэ сыстыбат. Дьэ манна кооператив сүрүн оруолу ылыахтаах. Кыайан сүөһүлэрин көрбөт кырдьаҕастартан, бюджет үлэһиттэриттэн уо.д. а. дьоннортон арендаҕа дуогабарынан ылан, сүөһүнү көрүүнү күүскэ практикалыахтаах. Саха Республикатын саҥа “Тыа хаһаайыстыбатын сайыннарыы туһунан” сокуонун барылыгар этиллэринэн, государствоттан көмөнү аны тэрээһиннээх хаһаайыстыбалар эрэ ылар буолуохтара. Ону өйдөөн, нэһилиэк олохтоохторо бары биир киһи курдук кооперативпыт сайдарыгар туох баар күүспүтүн ууран үлэлэһиэхтээхпит, төһө кыалларынан көмөлөһүөхтээхпит.

Никулина Елена Николаевна, сопхуос чемпион-ыанньыксыта:

- XXXI уобаластааҕы партийнай конференцияҕа кыттыбытым. Онно саҥа хотон тутуутун туруорсубутум. Ол кэнниттэн 250 миэстэлээх хотон тутуллубута. Сыаҥааннаах эдэр-кырдьаҕас бары мустар киинэ буолбута. Ол саҕана киһи барыта үлэҕэ наһаа көхтөөҕө. Үүтү ыаһыҥҥа республикаҕа үһүс миэстэҕэ тахсыбыппыт.Эдэр ыччат оскуола кэнниттэн сопхуоска үлэлээччи. Саҥа хотон ол миэстэтигэр тутуллубут буолан саныырга да астык.

Бу саҥа кооператив атаҕар тура сатыыр кэмэ. Урукку буолбатах. Кооперативка үп-харчы көрүллүүтэ кыра. Сүөһү аһа кырыымчык. Онон ынах сүөһү көрүүтүгэр элбэх кыһалҕаны көрсөллөр. Ол да буоллар сүөһүлэр туруктара үчүгэй соҕус. От-мас дэлэйэ, бурдук баара буоллар, олох да үчүгэй буолуохтар эбит. Быйыл наар ардахтаах дьыл буолан, муус-хаар буола тоҥмут от туох иҥэмтэлээх буолуой?!

Билигин кооператива суох кыайан олорор кыахпыт суох. Нэһилиэнньэ кырдьаҕас эрэ өттө сүөһү-ас ииттэр. Эдэрдэр тыа хаһаайыстыбатынан анаан дьарыктамматтар.

Бары түмсэн көмөлөстөхпүтүнэ, сайдар суолбутун тобулуохпут, сүөһүбүтүн эспэккэ хаалларыахпыт. Оччоҕо эрэ астаах-таҥастаах буолуохпут. Онон ыччат, нэһилиэк олохтоохторо өйдүөхтэрин наада. Биир-икки салайааччы тугу да кыайар кыаҕа суох. Биирдиилээн дьон сүөһүтүн аҕыйата турар кэмигэр кооператив эрэ биһиэхэ күүс-көмө буолуо дии саныыбын. Сайдар суолбут кини эрэ.

Кооператив хотонугар билигин ыанньыксытынан Дария Томская үлэлиир. Кини илиитигэр ханнык да үлэ умайар. Оннук кыахтаах үлэһит. Оттон оробуочайынан - Сергей Слепцов. Иккиэн элбэх оҕолоох дьиэ кэргэн ийэтэ, аҕата. Хайа да үлэҕэ оҕолоро күүс-көмө буолаллар. Бэйэлэрэ эмиэ сүөһүлээх-астаах, кэтэх хаһаайыстыбалаах буоланнар, оҕолор кыраларыттан сүөһүгэ олус сыстаҕастар, соло эрэ буллаллар хотон диэки сүүрэллэрэ саарбаҕа суох. Оттон Светлана Георгиевна үһүс кылааска үөрэнэр кыыһа саҥа төрүөҕү хайыы-үйэ кэтэһэр. Торбосторун ким диэн ааттыахтааҕын билиҥҥэттэн толкуйдуур. Онон саҥа саҕахтары арыйар кооператив үлэтэ-хамнаһа сайдыытынтүстэһээччилэр бааллар.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 755 Источник: ЯСИА Автор: Анастасия Сорокоумова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ