"Гастроллар кэмнэригэр уопут атастаһыахпыт, араас ис хоһоонноох көрсүһүүлэри тэрийиэхпит. Саха театра билигин саамай муҥутуур кыаҕар, бэйэтин чыпчаалыгар сылдьар. Бу тоҕоостоох кэми мүлчү тутуо суохтаахпыт ", – диэтэ Анатолий Николаев.
Гастроль - урукку, умнулла быһыытыйбыт үгэс сөргүтүллүөхтээҕин туһунан кини чиҥэтэн эттэ.
«Театр үлэһиттэрэ икки биригээдэҕэ хайдыһан, Ленскэй уонна Горнай хайысхаларынан айанныахтара. Көрөөччүлэр биһигини билэллэр уонна күүтэллэр ", – диэтэ кини.
Алтынньы саҕаланыыта, театр үлэһиттэрэ гастролларга сылдьар кэмнэригэр Нерюнгритааҕы куукула уонна артыыс театра испиктээкиллэрин көрдөрүөҕэ.
Театр 110-с кэмигэр "Бэрт киhи Бэриэт Бэргэн" олоҥхонон туруоруллубут испиктээкили дьон-сэргэ болҕомтотугар аан бастакытын таһаарыаҕа. Олоҥхону 1906 сыллаахха тохсунньу 3 күнүгэр көрдөрбүттэрэ историяттан биллэр. "Ол кэмтэн 110 сыл буолан баран олоҥхо саҥалыы тыыннанан дьоҥҥо-сэргэҕэ тиэрдиллиэҕэ ", – диэтэ театр дириэктэрэ.
1906 сыл театр историятыгар бэлиэ кэм. Бу сыл "Манчаары" сахалыы бастакы пьесаны Василий Никифоров-Күлүмнүүр суруйбута. Саха театрыгар бу испиктээкил, ону таһынан Василий Никифоров дьылҕатын кэпсиир "Бастыҥ хатыыта" туруоруллуохтара. Итилэри таһынан саха бастакы бырааһа Прокопий Сокольников олоҕун сэһэргиир испиктээкили театр үлэһиттэрэ былаанныыллар.
Гранд-гастроллар ыам ыйыгар Москва куоракка Маяковскай аатынан театрга түмүктэниэхтэрэ. Гастроль кэмигэр – үс ый устата театр дьиэтин өрөмүөннүөхтэрэ.
Анатолий Николаев театр урукку артыыстара Алексей Егоров – Өркөн уонна Дмитрий Шадрин өрөспүүбүлүкэ бөдөҥ тэрилтэлэрин салайар буолбуттарыттан киэн туттарын эттэ.
Комментарии
Авторизация на сайте через социальные сети