- Ыҥырыылаах ыалдьыттары Бүлүү улууһун баһылыга Сергей Винокуров көрүстэ. Билиҥҥи уустук кэмҥэ уран тыл маастардара бэйэлэрин айымньыларынан дьону-сэргэни үөрдэ сылдьалларын иһин махтанна.
- Салгыы суруйааччылар Г.И. Чиряев аатынан орто оскуолаҕа, Бүлүүтээҕи педколледжка, улуустааҕы библиотекаҕа уонна олохтоох айар түмсүү «төгүрүк остуолугар» сырыттылар. Иван Мигалкин, Уйбаан Ойуур, Надежда Егорова уонна Борис Гоголев айар үлэлэрин кытта билиһиннэрдилэр, ааҕааччылар ыйытыыларыгар эппиэттээтилэр уонна бэйэлэрин кинигэлэрин илии баттаан бэлэхтээтилэр.
- Сарсыныгар суруйааччылар Бороҕоннооҕу орто оскуола үөрэнээччилэригэр кэтэһиилээх ыалдьыт буоллулар. Онтон библиотекаҕа тиийэн, олохтоохтору кытта атах тэпсэн олорон айар үлэлэрин туһунан кэпсээтилэр, инники былааннарын кытта билиһиннэрдилэр, ыйытыыларыгар хоруйдаатылар, саҥа хоһооннорун ааҕан иһитиннэрдилэр. Нэһилиэк баһылыга Андрей Иванов кинилэр ыҥырыыларын ылынан Дьокуускайтан кэлбит ыалдьыттарга айар үлэлэригэр ситиһиини баҕаран, нэһилиэк олохтоохторун аатыттан махтанна уонна бэлэхтэрин туттарда.
- Ытык кырдьыҕас Прокопий Колтовской ыалдьыт суруйааччылар айымньылара тыа сирин айар дьоҕурдаах дьонугар үтүө холобур буоларын бэлиэтээтэ, инникитин да маннык көрсүһүүлэр тиһигин быспакка салҕанан бара туралларыгар баҕарда. Саха тылын учуутала Наталья Мальцева суруйааччыларга ааҕааччыларын саҥа айымньыларынан үөрдэ туралларыгар баҕарда.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети