ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
20 ноября 2015, 16:08

«Киэргэ» ювелирнай фирмаҕа Ымыы саҥа үлэлэрин билиһиннэрдилэр


Сэтинньи 19 күнүгэр «Киэргэ» ювелирнай фирма камернай саалатыгар Саха сиригэр эрэ буолбакка, өрөспүүбүлүкэ таһыгар киэҥник биллэр дизайнер, «Ойуу – билгэ бэлиэ» кинигэ ааптара Саргылана Барахова-Ымыы айар киэһэтэ буолла.

photoByWidth&id=49893&width=1000

Айар биэчэр кыттыылаахтара Ымыы Санк-Петербург ювелирнай фирматын кытары оҥорбут саҥа кэллиэксийэтин биир бастакынан көрдүлэр. Ону тэҥэ ааптар кэлэр сылга уйгуну-быйаҥы түстүөхтээх харысхалларын, «Киэргэ» фирма үлэлэригэр көстөр үрүҥ көмүс дьэрэкээн оҥоһуктарын өҥнөөх хаартыскалара киллэриллибит «Үйэлэри уҥуордаан» буклеты билиһиннэрдэ. Маны барытын илэ харахтарынан көрөн астыммыт дьон дизайнер саҥа үлэлэрэ тирии, мамонт аһыытынан, сылгы кылынан, күндү таастарынан уонна үрүҥ көмүһүнэн өссө эбии байытыллан биэрбиттэрин сэргээтилэр.

Дизайнер «Үргэл» арт-галереяҕа быйыл саас ыыппыт «Икки дьахтар – икки эйгэ» быыстапката ситиһиилээхтик ааспыта. Ювелирнай оҥоһуктар дизайнердарын быһыытынан үлэтэ Монголияҕа улахан биһирэбили ылбыта. Кэнники кэмҥэ кини үлэлэрин Казахстан уонна Кытай ювелирдара интэриэһиргээтилэр.

Саргылаана Барахова билигин «Киэргэ» ювелирнай фирмаҕа үлэлиир. Талааннаах киһи хомуһуннаах оһуордара, киэргэ ойуулара, хартыыналара «киэргэлэр» дьикти кэрэ оҥоһуктарыгар кутуллаллар, алыптаах хартыыналара «Көмүлүөк» фирма иһиттэригэр-хомуостарыгар уруһуйданаллар.

Айар киэһэни тэрийэн ыытааччы суруналыыс, прозаик Айталина Никифорова (Шадрина) бэлиэтээн эппитинэн, Саргылаана бэйэтин өйдүүр буолуоҕуттан уруһуйдуур. Кыысчаан кыһыҥҥы тымныыларга оһоххо мас умайан таһыргыырын истэ-истэ эбэтин аттыгар олорон уруһуйдуура. Кыыс дьоҕурун маҥнайгынан эбэтэ Степанида Герасимовна таба көрбүтэ. Оччолорго кыыс оһуор-мандар суолтатын билбэтэр да, араастаан сахалыы оһуору таһаарар буолбута.

Учуутал идэлээх кыыс соло буоллар эрэ, харандааһын ылан уруһуйдаатаҕына эрэ санаата сааһыланар курдуга. Кэлин аны уруһуйдуу олорон биттэнэр, буолуохтаах чахчыны билэр идэлэммитэ. Ити курдук, аны кистэлэҥ ис күүһэ аан бастаан чугас дьүөгэлэрин дьылҕатын билгэлииргэ көмөлөспүтэ. Кистэлэҥ күүһэ оҥорор оһуордарыгар да көстөр. Ол да иһин, Ымыы ымыылаах уруһуйдара хас биирдиилэрэ тус туһунан ураты суолталаахтар, хас биирдии киһиэхэ чопчу ананаллар.

Киэргэ» фирма генеральнай дириэктэрэ Александр Павлов Саргылаана Барахова кинилэр фирмаларыгар улахан кылаатын киллэрэрин, кини толкуйунан оҥоһуллубут көмүс оҥоһуктар үс төгүл аан дойду быыстапкатыгар кыайыылаах тахсыбыттарын махтана кэпсээтэ уонна фирма бочуоттаах наҕараадатын туттарда.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 721 Источник: ЯСИА Автор: Надежда Егорова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ