Гонорея – венерическэй ыарыылартан биир саамай тарҕаммыттара. Эр киһи уонна дьахтар сылдьыһар кэмнэригэр гонореялаах ыарыһах доруобай киһиэхэ сыһыарар. Гонореянан хаһан ыалдьалларый?
– Үксүгэр арыгылааһын, итириктээһин кэнниттэн билбэт киһини кытары сылдьыһан, араас инфекциялары хабаллар;
– Гонореялаах ийэ оҕо төрөтөр кэмигэр кырачааныгар сыһыарыан сөп;
- Көннөрү сылдьан сыстыы түгэнэ аҕыйахтык бэлиэтэнэр. Холобур, кыыс оҕо ыарыһах ийэтин кытары биир соттору, түүҥҥү горшогу, утуйар таҥаһы уо.д.а. туһанар буоллахтарына.
х х х
Гонореяҕа ииктиир органнар сүһүрэллэр. Сэдэхтик да буоллар, айах салыҥнаах бүрүөтэ (орогенитальнай сылдьыһыыга), көнө оһоҕос (гомосексуальнай сылдьыһыыга) уонна харах салыҥа кирдээх илииттэн сүһүрүөхтэрин сөп.
Ыарыы кистэлэҥ (инкубационнай) кэмэ, ол эбэтэр ыарыыга сыстыыттан бастакы клиническэй бэлиэлэр биллиэхтэригэр диэри 3-7 хонук ааһар. Бу сыыппара ардыгар 1 хонуктан 3 эбэтэр онтон уһун нэдиэлэҕэ халбаҥныан сөп.
Гонорея сибиэһэй уонна ааһан-араҕан биэрбэт (хроническай) көрүҥнэрэ бааллар. Сибиэһэй көрүҥэ олус сытыытык эбэтэр, төттөрүтүн, сэниэтэ суохтук, биллэрбэккэ киириэн сөп. Ыарыы уһаан бардаҕына, «хроническай гонорея» диэн диагноз туруоруллар.
Сытыы гонореяҕа эр киһиэхэ иик тахсар сүмэтэ сүһүрэр – ириҥэлээх уретрит быһыта тыытан, аһытан, ииктииригэр ыалдьан, иһэн уонна кытаран (гиперемия) биллэрэр. Аан бастаан кэмчитик, онтон элбэх салыҥнаах ириҥэ кэлэр.
Ардыгар гонорея бэлиэлэрэ суох буолаллар. Ааһан араҕан биэрбэт гонореяҕа маннык сыыстарыылар баар буолаллар: простатикка – предстательнай былчархай, эпидидимиккэ – сымыыт чорбоҕо сүһүрэллэр.
Дьахталлар гонореяҕа сыстыбыттарын, эр дьону кытары тэҥнээтэххэ, үксүгэр улаханнык билбэккэ хаалаллар. Сытыы гонореяҕа быһыта тытыы, аһыйыы курдук бэлиэлэр биллиэхтэрин сөп. Сотору-сотору ииктиэн баҕарар, сылдьыһар органнара кыһыйаллар, иһин түгэҕин уонна курданарын таһынан ыалдьар курдук буолар.
Эр киһини кытары сылдьыһыыттан бэриллэр инфекциялары хабыы кэнниттэн дьахталлар элбэхтик сыыстараллар. Тоҕо диэтэххэ, гонорея бэлиэлэрэ күүскэ биллэрбэттэр, ол иһин, бырааска хойутаан көрдөрөллөр. Холобур, ааспат-арахпат гонореяҕа оҕо хаатын шейката сүһүрэн, цервицит, эндометрит, сальпингоофорит уо.д.а. үөскүөхтэрин сөп. Ууһуур органнар сүһүрүүлэрэ саҥа төрүөх оҕо хаатын таһыгар үөскээһинин, оҕо куотуутун, болдьоҕун иннинэ төрөөһүн, оҕо үөскээбэт буолуутун уо.д.а. ыарыылар биричиинэлэринэн буолуохтарын сөп.
Ыарыыны хайдах сэрэтиэххэ?
- Кэргэҥҥин хаһан да таҥнарыма, эйигин таптыыр, доруобай, эрэллээх эрэ киһигин кытары сиэкистээ. Бу – гонореяҕа сыстар кутталтан куотар бастыҥ уонна эрэллээх ньыма.
- Инфекция сыстыбытын биллэххинэ, сылдьыһар киһигэр биллэрэ охсоруҥ улахан суолталаах, кини эмиэ доруобуйатын бэрэбиэркэлэтэрин уонна эмтэнэрин ситис (туга да ыалдьыбатаҕын да иһин).
- Сылдьыһыыттан бэриллэр инфекциялартан харыстыыр хаачыстыбалаах эрэ презервативы туһаныҥ.
- Чөл олоҕу тутуһуҥ. Арыгылаах утахтартан аккаастаныҥ.
- Ыарыы бастакы бэлиэлэрин биллигит да, дерматовенеролог-бырааска кэлиҥ.
Комментарии
Авторизация на сайте через социальные сети