ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
30 ноября 2015, 10:38

«Саха Липснеле» уонна "Теплокомфорт" тыа сиригэр олох таһымын үрдэтиигэ үлэлэһэллэр

«Саха Липснеле» уонна "Теплокомфорт" хааччахтаммыт эппиэтинэстээх тэрилтэлэр аныгы технологияны олоххо киллэрэр соругу туруорунан, дьоҕус бизнескэ бэйэлэрин миэстэлэрин бигэтик булуннулар. СӨ инновационнай бэлиитикэтин судаарыстыбаннай кэмитиэтин уонна СӨ ОДьКХ министиэристибэтин кытта бииргэ үлэлэһиилэрин түмүгэр үлэлэрэ таһаарыылаах. Тэрилтэлэр үлэлэрин туһунан "Теплокомфорт" ХЭТ салайааччыта Егор Слободчиковы кытта көрсөн кэпсэттибит.

photoByWidth&id=50668&width=1000

-- Егор Гаврильевич, аныгы технологияны туһанан инновация бырайыактарын олоххо киллэрии туох эрэ силистээҕэ-мутуктааҕа буолуо?

-- 2009 сыллаахха СГУ инженернэй-техническэй факультетын бүтэрбитим. Идэбинэн гаһынан, сылааһынан хааччыйыы инженерэбин. Дьоҕус бизнескэ көһүөм иннинэ ОДьКХ министиэристибэтигэр үлэлии сылдьыбытым. Уопутуран баран, дьоҕус тэрилтэ тэринэргэ санаммытым. Бу толкуйум ХИФУ-ну кытта ыкса сибээстээх. 2011 СГУ Хотугулуу-Илиҥҥи университет статуһун ылбыта. Онно бэрт улахан хамсааһыннар буолбуттара. Ол курдук, университет биир сонун хайысхатынан инновациянан дьарыктанар тэрилтэни арыйыы этэ. Эдэр исписэлиистэр, аспираннар уонна устудьуоннар университет иһинэн чааһынай тэрилтэ тэриммиппит. Хас биирдии эдэр киһи, биллэн турар, олоххо киллэриэн баҕарар, өйүгэр-санаатыгар иитиэхтии сылдьар идиэйэлээх этэ.

- Эн тус бэйэҥ туох толкуйдаах этигиний?

- Тыа сиригэр дьиэлэри ититиигэ бырайыактардаах этибит. Сүрүн болҕомто туох саҥа технологияны олоххо киллэриэххэ сөбүй диэҥҥэ туһуламмыта. Сүрүннээн септиктэри оҥорууга полиэтилен, пропилен уонна пластик матырыйааллары туттар буолбуппут.

photoByWidth&id=50669&width=1000

-- Кыһыҥҥы тымныыга ити пластиккыт хайа тоҥмот дуо?

-- Суох, төттөрүтүн, тимирдээҕэр саамай бөҕө тэрил. Хайдар кыаҕа суох, өҕүллүөн эрэ сөп. Иһэрдиитэ эмиэ эрэллээх. Ол иһин инженернэй хааччыйыыга итинник хаачыстыбалаах тутуу матырыйаалын туһанан барбыппыт.

-- Ханнык дойдулар матырыйааллара биһиги тыйыс усулуобуйатыгар ордук сөп түбэһэрий?

-- Үксүгэр Европа уонна Арассыыйа киин куораттарыгар туттуллар матырыйааллары туһанабыт. Биллэн турар, биһиги усулуобуйабытыгар барыта барсыбат. Сылааһы тутар ханнык матырыйаал ордугун анаан үөрэтэн талабыт.

-- Ол ону бастаан ханнык нэһилиэккэ боруобалаан көрбүккүтүй?

-- 2011 сыллаахха университет иһинэн үлэлиир хас да тэрилтэ холбоһон, Нам Аппаанытыгар анал бырайыак оҥорон, үс дьиэни туппуппут. Мин онно прорабынан үлэлээбитим. Ол дьиэлэрбитин билигин салгыы кэтээн көрөбүт. Билиҥҥитэ куһаҕана суох көрдөрүүлээхтэр. Холобура, гаһы туһаныы иһин төлөбүр сылга ортотунан уонча тыһ. солк тэҥнэһэр.

photoByWidth&id=50670&width=1000

-- "Саха Липснеле" Литваттан аҕалар оһохторун Өймөкөөҥҥө туруордугут. Онно сылдьан көрдөхпүнэ, оттук быһыытынан туттуллар хардаҕастар кээмэйдэрэ олус кыра дии. Туох сылааһы биэрэр үһү диэх курдук.

-- 2013 сыллаахха тэрилтэ бастакы оһохтору туруорбута. Бу иннинэ Хаҥаласка биир учуутал киһи бэйэтэ Интернетинэн сакаастаан дьиэтигэр туруорбут этэ. Ити оһох көдьүүстээҕин билэн, "липснелилэр" киин уонна Бүлүү эҥэр уулуустарга туруоран барбыттара. Биһиги хочуоллары научнай уонна практическай өттүнэн кэтээн көрбүппүт. Ити курдук үһүс сылбытын оһохтору кэтээн үөрэтэ сылдьабыт: төһө маһы сиирин, ханнык оттук ордук көдьүүстээҕин. Бырабыытылыстыбаҕа бу кэтээн көрүү түмүгүнэн анал отчуот суруйбуппут.

-- Субсидия кыаммат эрэ араҥаҕа көрүллэрин анаан учуоттаабыккыт дуо?

-- ОДьКХ министиэристибэтэ уруккуттан маннык толкуйдаах этэ. Ол иһин биһиги туруорсуубутун бары өттүттэн өйөөн, СӨ Нэһилиэнньэ социальнай харысхаллаах буолууга министиэристибэтэ үбүлээһинин оҥорон, салгыҥҥа сылдьыбыт идиэйэбит пилотнай бырайыак быһыытынан олоххо киирбитэ.

Мин санаабар, бырабыытылыстыба нэһилиэнньэлээх пууннары пилотнайга киллэриигэ бэрт муударай быһаарыыны ылыммыта. Уһук хоту Булуҥ Сииктэтигэр уонна Тымныы полюһугар -- Өймөкөөн Хара Тумулун кытта Биэрэк Үрдүгэр дьон олорор дьиэлэрэ хочуолунайдаах сиртэн тэйиччилэр. Ону учуоттаан Өймөкөөн нэһилиэгин баһылыга Рустам Кривошапкин улуус баһылыгын кытта бииргэ үлэлэһэн, ол кэннэ аны улуус баһылыга Михаил Захаров бырабыытылыстыбаны кытта сөбүлэсиһии ыыппытын түмүгэр бу үлэ олоххо киирдэ. Булуҥнар Сииктэлэрин баһылыга Раиса Кривошапкина эмиэ "Липснеле" оһох, биһиги таҥар хочуолларбыт туһунан эмиэ эрдэттэн истибит-билбит, үөрэппит буолан, нэһилиэнньэ кыаммат араҥатын дьиэлэрин толору хааччыыллаах оҥорору ситистэ.

«Саха Липснеле» уонна "Теплокомфорт" хааччахтаммыт эппиэтинэстээх тэрилтэлэр "Якутия" Технопарк ГАУ "Кангалассы" урутаан сайдар территория резиденнэринэн буолаллар. Онон өрөспүүбүлүкэҕэ кэскили түстэһиигэ улахан оруоллаахтар.

При частичном или полном использовании материалов гиперссылка на сайт ysia.ru обязательна.
Категория: Инвестник Просмотров: 691 Источник: Газета "Саха Сирэ" Автор: Елена Потоцкая Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ