«Анаабыр улууһун сэрии уонна тыыл бэтэрээннэрэ» кинигэ күн сирин көрдө

Анаабырга ааһан эрэр сылга элбэх араас хабааннаах тэрээһиннэр ыытылыннылар. Олортон биирдэстэрэ – Улуу Кыайыы 70 уонна улуус үбүлүөйдээх 85 сылларыгар анаммыт «Анаабыр улууһун сэрии уонна тыыл бэтэрээннэрэ» кинигэни билиһиннэрии бу дьыл ахсынньы 18 күнүгэр буолла.


Улуустааҕы гимназияҕа ыытыллыбыт тэрээһин туһунан сиһилии кинигэ күн сирин көрүүтүгэр быһаччы өҥөлөөх, улуустааҕы кыраайы үөрэтэр уонна этнография музейын директора Андросова Екатерина Васильевна кэпсээтэ.
- Быйыл улуус 85 уонна Улуу Кыайыы 70 сылларыгар анаан улуус дьаһалтатын көҕүлээһининэн «Анаабыр улууһун сэрии уонна тыыл бэтэрээннэрэ» кинигэ бэчээттэннэ. Кинигэ «Якутия» медиа-холдинг кинигэ кыһатыгар оҥоһулунна. Кылгас бириэмэ иһигэр холдинг редактора Л.Н. Малышева кинигэ матырыйаалларын редакциялаан, «Якутия» медиа-холдинг типографиятыгар 500 экземплярынан бэчээттэннэ.

Кинигэни бэлэмнээһиҥҥэ анал редакция коллегията үлэлээтэ. Ол курдук, бэтэрээннэр тустарынан матырыйааллары хомуйууга уонна хаартыскалары булууга, суруйууга-бичийиигэ Мордовская М.С., Сокольникова Х.Н., Туприна Т.А., Кылтасова В.М.. Сыроватская С.В., Константинова А.И.. Толбонова Н.Н., Петрова А.В., Туприна А.С. уонна мин үлэлээтибит. Редколлегия бэрэссэдээтэлинэн улуус баһылыгын солбуйааччы Зедгенидзев В.В. сүбэ-ама буолла.

Санатан эттэххэ «Анаабыр улууһун сэрии уонна тыыл бэтэрээннэрэ» кинигэ улууска бэтэрээннэргэ аналлаах элбэх ахтыылартан таҥыллан оҥоһуллубут бастакы кинигэбит буолар. Урут, Улуу Кыайыы 50 сылын көрсө «Хоту дойду хонноҕуттан» диэн кинигэ-брошюра аҕыйах тираһынан Дьокуускай куоракка бэчээттэнэн тахсыбыта. Онно 4 сэрии бэтэрээнэ уонна 48 тыыл бэтэрээнэ сырдатыллыбыттара. Оттон быйыл бэчээттэммит кинигэҕэ уопсайа 157 үлэ уонна тыыл бэтэрээннэрин ахтыыта уонна 10 сэрии кыттыылааҕын туһунан суруйуулар киирдилэр. Онон Улуу Кыайыы 70 сылынан бэтэрээннэргэ, кинилэр тыылга дьаныардаах үлэлэрин, уоттаах сэриигэ хорсун быһыыларын туһунан кэрэһилиир баай ис хоһоонноох кинигэ күн сирин көрдө. Матырыйааллары хомуйууга бэтэрээннэр оҕолоро, сиэннэрэ көмөлөстүлэр. Хаартыскалар музей архыыбын фондатыттан туһанылыннылар.
Бу үлэбитигэр кэккэ ыарахаттары көрүстүбүт. Сорох бэтэрээннэр тустарынан кыра да ахтыы уонна хаартыскалара суоҕа үлэбитин атахтыы сырытта. Ону ол диэбэккэ кырдьаҕас дьону кытта атах тэпсэн олорон кэпсэтэн, оҕолоругар сыа-сым курдук харалла сытар бэтэрээннэр тус архыыптарын хасыһан, күүскэ үлэлэһэн кинигэбит матырыйааллара хомулуннулар.

Инньэ гынан улуус үбүлүөйдээх 85 уонна Улуу Кыайыы 70 сылларын баттаһа кинигэ күн көрбүтүттэн үөрэн-көтөн ахсынньы 18 күнүгэр, улуустааҕы гимназияҕа кинигэ сүрэхтэниитэ буолла. Тэрээһиҥҥэ үлэ уонна тыыл бэтэрээннэрэ, улуус бэтэрээннэрин сэбиэтин салайааччы Борисов Г.Г. , улуус баһылыга Семенов И.И., баһылык солбуйааччыта Зедгенидзев В.В., кинигэ сурулларыгар үлэлэспит редколлегия чилиэннэрэ уонна оскуола оҕолоро кэлэн кыттыыны ыллылар.
Улуус баһылыга Семенов И.И. эҕэрдэ тылы кытта кинигэ сүрэхтэниитигэр анал сакааһынан оҥоһуллубут иһит сервиһин уонна «Анаабыр улууһун сэрии уонна тыыл бэтэрээннэрэ» кинигэлэри бэтэрээннэргэ бэлэх уунна. Туприн Н.Л., Сокольникова Х.Н., Дьяконов Н.М., Борисов Г.Г. эҕэрдэ тыл эттилэр.
Тэрээһини гимназия «Тэбэй» уонна «Хоһуун» ансаамбыллара ыллаан-туойан, оскуола алын сүһүөх кылаастарын үөрэнээччилэрэ хоһоон ааҕан киэргэттилэр.