Ол иһигэр, «Дьиибэ-дьээбэ хомпулар» диэн ааттаах көр-күлүү бөлөҕүн туруоруулара күүстээх ытыс тыаһынан доҕуһуолланна. Күннээҕи олохтон-дьаһахтан ылыллыбыт көрдөөх сценкаларга идэлээх артыыскалар буолбакка, күннэтэ алтыһар биир дойдулаахтара көрү-нары көҕүлүттэн тута сылдьалларын көрөр ордук соһуччу уонна үөрүүлээх буолла.
Сынньалаҥ кэмигэр бөлөх салайааччыта Сардаана Сергеева маннык кэпсээтэ:
– 2010 с. «Дьиибэ-дьээбэ хомпулар» диэн ааттаах көр-күлүү бөлөҕүн тэриммиппит. Сценкаларбытын олохтоох ааптарбыт Людмила Петрова айбытын бэйэбит туруорабыт. Бөлөхпүтүгэр араас идэлээх дьон баар. Холобур, Люция Устинова – түөлбэ салайааччыта, чабырҕахсыт, волейболистка, кыраҕы харахтаах ытааччы. Наталья Денисова – үҥкүүһүт бастыҥа, волейболистка. Мария Яковлева – кылаабынай оруоллары толорооччу. Анна Попова – ырыаһыт, хомусчут, хаартысканан дьүһүйэр, гобеленынан дьарыктанар. Анна Макарова – биир саамай тутаах киһибит. Сахая Борисова – олус үчүгэй уобарастары арыйар эдэр артыыскабыт. Елена Никитина – өрөспүүбүлүкэҕэ киэҥник биллэр Майатааҕы «Көөчөөн көрө» народнай мини-театр артыыһынан ситиһиилээхтик үлэлээбитэ. Билигин олорор нэһилиэгэр кэлэн, оскуолаҕа үлэлии сылдьар. Биһиги бөлөхпүтүгэр сүбэ-ама биэрэр, туруорууларбытын дьүүллээччи киһибитинэн буолар. Аксинья Игнатьева — Кэбээйи улууһуттан кэлбит кийииппит, саҥа саҕалаан эрэр артыыскабыт. Людмила Петрова – хас да кинигэ, ол иһигэр биһиги үгүс сценкабыт, монологтарбыт ааптардара, чабырҕахсыт.
Көр-күлүү бөлөхпүтүнэн улуус, нэһилиэк кэнсиэрдэригэр, көр-күлүү күнүгэр айар киэһэлэрбитин ыытабыт. Хаста да Аркадий Новиков көҕүлээһининэн куоракка киирэн улахан театрдар сценаларыгар кыттыбыппыт. Репертуарбытын бэйэбит айарбытын, толкуйдуурбутун сөбүлүүбүт. Ардыгар атын кэлэктииптэр туруорууларын бэйэбит дьоммутугар туруоран көрдөрөбүт.
Бу бөлөхпөр кыттар, артыыстыыр дьоннорум нэһилиэк ыалларын мааны ийэлэрэ, эбэлэрэ, бары олус көхтөөхтөр. Араас талааннаах, идэлээх, биир интэриэстээх дьахталлар кыттыһан, бэйэ-бэйэлэрин ситэрсэн биэрэллэр.
Артыыстарбыт бары кэтэх хаһаайыстыбалаахтар, туруу үлэһит ыаллар, таптыыр идэлэринэн үлэлии сылдьаллар. Олоххо актыыбынай көрүүлэрин ыһыктыбаттар. Быыс-арыт буллаллар да, кулууп аанын саппаттар. Бары сотору-сотору мустабыт. Норуоттан тахсар көрү-күлүүнү көҕүлүүрбүтүттэн, саҥаттан-саҥаны айарбытыттан бэйэбит дуоһуйууну ылабыт уонна көрөөччүлэрбитигэр үчүгэй настарыанньаны бэлэхтиибит дии саныыбыт.
х х х
2010 с. – «Сааскы сирэйдэр» куонкурус-фестивальга 2-с степеннээх дипломант, Илин эҥэрдээҕи «Сааскы сирэйдэр» фестивальга – 3 степеннээх дипломант;
2011 с. – «Колобуок» остуоруйанан (ааптар Л.Петрова) улууска гран-при хаһаайына, Илин Эҥэргэ 2-с степеннээх дипломант, Люция Устинова «Киһи эриэнэ иһигэр» авторскай монологунан Аркадий Новиков анал аатын ылбыта;
2012 с. – Илин Эҥэрдээҕи «Сааскы сирэйдэр» III фестивальга – 3 степеннээх дипломант;
2014 с. – VII фестивальга 1 степеннээх лауреат.
Комментарии
Авторизация на сайте через социальные сети