Көрсүһүү саҕаланыыта Егор Борисов кэлиҥҥи сылларга саха спордугар элбэх ситиһии баарын бэлиэтээн эттэ: «Умнулла быһыытыйбыт үтүө үгэспитин эдэр тустууктарбыт сөргүтэллэр. Аан дойду таһымыгар эдэр уолаттарга аан дойду чемпионун аатын Илларион Федосеев 50 сыл аннараа өттүгэр ылбыта».
Соторутааҥҥыта Сараево куоракка ыытыллыбыт аан дойдуга бастыыр иһин күрэхтэһиигэ Саха сирин эдэр тустууктара икки кыһыл көмүс уонна биир боруонса мэтээллэри ылбыттарын санатан ааһар тоҕоостоох. Орто Халыма улууһуттан төрүттээх Иван Оконешников 42 кг. ыйааһыҥҥа кыайыы көтөллөммүтэ. Өлүөхүмэттэн төрүттээх Алексей Копылов 46 кг. ыйааһыҥҥа кыһыл көмүс мэтээли кэппитэ. Бүлүү бөҕөһө Петр Константинов боруонса мэтээли ылбыта.
Степанида Артахинова кыайыыта уонна аан доду рекордун олохтооһуна Саха сирин олохтоохторун барыларын сүргэлэрин көтөхпүтүн Егор Борисов бэлиэтээн эттэ.
«Эһиги ситиһиигитинэн Саха сирин аата-суола үрдүүр. Соторутааҕыта РФ спортка миниистирэ Виталий Леонтьевич Муткону кытта көрсүһүүбэр инбэлииттэр 6% спордунан дьарыктаналларын туһунан эппиппэр кини олус сөхпүтэ. Онон, адаптивнай физкультура уонна спорт киинин тутары федеральнай былаас уорганыттан туруорустум. Саха сирин спортсменнара Паралимпийскай оонньууларга кытталларыттан үөрэбит», - диэтэ Егор Борисов.
Степанида Артахинова харда тылыгар Саха сиригэр дьарыктанарга анаан тэриллибит усулуобуйа үчүгэйин, «Дохсун» спорт комплексыгар күҥҥэ сарсыарда уонна киэһэ дьарыктанарын, күҥҥэ 400-кэ тиийэ оҕунан ытарын туһунан кэпсээтэ.
С. Артахинова Сочига балаҕан ыйын 26 күнүгэр ыытыллар аан дойдутааҕы IWAS күрэхтэһиитигэр кыттар былааннааҕын уонна онно күүрүүлээхтик дьарыктанарын эттэ.
2012 сыллаахха Лондоҥҥа ыытыллыбыт аан дойду чемпионатыгар боруонса мэтээли ылары ситиспит Степанида Артахинова Швеция спортсмена Зандра Реппены кытта киирсиитигэр150-тан 147 очкону ылбыта уонна аан дойду рекордун олохтообута. Ону таһынан Степанида немец спортсмена Карина Границаны хоппута, уопсайа сэттэ кыттааччы инники күөнүгэр тахсан, кыайыылаах үрдүк аатын ылбыта. Кини бу кыайыыта Россия сүүмэрдэммит хамаандатыгар киирэн, 2016 сылллааҕы Паралимпиадаҕы кыттар кыаҕы биэрэр.
Комментарии
Авторизация на сайте через социальные сети