- Руслан Еремеевич, дьэ быйылгы күрэхтэһиибит уруккулартан туох уратылаах буолуоҕай?
- Күрэхтэһиибитин сыл аайы республикабытыгар ыытыллар тэрээһиннэри кытта ситимниибит. Бары билэргит курдук, быйыл Улуу Кыайыы 70 сыллаах өрөгөйдөөх үбүлүөйэ. Онон хайдах даҕаны сүүрүүбүтүн атыҥҥа аныырбыт табыллыбат. Бу уоттаах сэриигэ аҕаларбыт, убайдарбыт Ийэ дойдуларын көмүскүү ат көлөлөөх аттаммыттара. Саха ата барахсан хас киһи тыынын онно өрүһүйбүтэ буолуой, тыылга да, сэриигэ да...
Быйылгы күрэхтэһиигэ бииргэ үлэлиир Россия, Белоруссия собуоттарын, фабрикаларын, компанияларын бэрэстэбииллэрин ыҥырбыппыт. Кинилэр бэйэлэрэ да бу күрэхтэһиигэ кэлиэхтэрин баҕарбыттара ыраатта. Дьэ быйыл тоҕоостоох кэм көстөн көрө кэлэр буолбуттара биһигини барыбытын үөрдэр. Кинилэр аҥардас көрө эрэ диэн буолбакка, бу сүүрүү официальнай спонсордарынан, партнердарынан буолаллар.
Уопсайа 6 дистанцияҕа 9 сүүрүү буолуоҕа. Бириис фондата 2,5 мөл. солкуобай буолара чопчуланна. Ол курдук, "Лээги Кубога" 1 мөл. солкуобай. Онтон атын дистанцияларга 1,5 мөл. солкуобай көрүлүннэ. Манна партнердарбыт туруорар бириистэрэ эмиэ киирэллэр: Ульяновскайтан УАЗ микроавтобус, Новосибирскайтан "Тайга", "Кедр" пилорамалар. Аны бэртээхэй бириистэрдээх лотерея оонньонуо. Манна сүрүн бириис - квадроцикл уонна партнердарбытыттан араас инструменнар, бытовой техникалар бааллар. Онон быйылгы "Лээги Кубога" ааспыт сүүрүүлэртэн уратылаах буолуо дии саныыбын.
- Дьэ кырдьык оннук эбит. Аны аттар туһунан ыйыттахха, ханнык биллэр-көстөр сүүрүүктэр кыттыахтарай уонна ханнык улуустар кэлиэхтэрэй?
- Сүүрдүү кылаабынай судьуйатынан республикабыт акка спордун федерациятын толорооччу директора Александр Афанасьевич Капитонов үлэлиэҕэ уонна иилээн-саҕалаан ыытыаҕа. Быйыл эмиэ ааттаах-суоллаах аттар кыттыахтара. Ол курдук, Рашен Дэй, Неарх, Карасун, Коментант, Лангорьер, Дружина, Турбо-Дансер, Вершитель, Санта Лючия, Пардус, Ноу-Билдинг, Фурт Элли уонна Балтимор. Маны сэргэ саха аттара 7 уонна 10 км сүүрүөхтэрэ.
Улуустар туһунан этэр буоллахха, Иван Иванович Ушницкай тренердээх Хаҥалас, Сергей Петрович Ядреев тренердээх Нам, Дмитрий Семенович Осипов тренердээх Чурапчы, Константин Валентинович Иванов тренердээх Сунтаар, Николай Николаевич Платонов тренердээх Мэҥэ-Хаҥалас уонна Анатолий Анатольевич Баишев тренердээх Аммабыт улуустара кыттыахтара. Быйылгы тэрээһиммит бу иннинэ ыытыллыбыт күрэхтэһиилэрбитинээҕэр саамай чаҕылхайдара буолуо диэн саарбахтаабаппын.
Сүүрүү кэмигэр саха эстрадатын сулустара ылбаҕай ырыаларын көрөөччүлэргэ бэлэхтиэхтэрэ. Түмүккэ "Күн эргиирэ - Алгыстаах оһуохай" үҥкүүлэниэ уонна бырааһынньыктааҕы салют ньиргийиэ. Онон бука барыгытын кэлэн дуоһуйа сынньанаргытыгар ыҥырабын.
- Руслан Еремеевич, кэпсээнин иһин махтал. Саха дьоно буоларбытынан, ат сүүрүүтүн бэркэ сэҥээрэн көрөбүт, тулуйбакка-тэһийбэккэ кэтэһэбит. Эн дойдугун ааттата маннык күрэхтэһиини, бар дьоҥҥун сынньата көстүүлээх улахан сүүрүүнү тэрийэрин кэрэхсэбиллээх уонна махталлаах дьыала дии саныыбын.
Комментарии
Авторизация на сайте через социальные сети