Слет саха народнай суруйааччы Андрей Кривошапкин 75 сааһыгар ананна. Манна Таас Тумустан төрүттээх поэт Владимир Федоров Андрей Васильевич «Земля предков» хоһооннорун хомуурунньугун нууччалыы тылбааһын ааҕыыга күрэс ыытылынна.
Слекка 20 үөрэнээччи уонна 41 улахан дьон кыттыннылар. Оҕолорго бастакы миэстэни Сангаар бастакы нүөмэрдээх оскуолатын 10-с кылааһын үөрэнээччитэ Настя Косицына ылла. Сииттэ оскуолатын 6-с кылааһын үөрэнээччитэ Слепцова Диана, Сангаар гимназиятын 1 кылааһын үөрэнээччитэ Егорова Дайаана иккис, үһүс буоллулар.
Улуустааҕы библиотека үлэһиттэрэ Андрей Кривошапкин олоҕун уонна айар үлэтин туһунан ыыппыт викторина-ыйытыктарыгар Куокуй орто оскуолатын 8-с кылааһын үөрэнээччитэ Соловьева Рая ситиһиилээхтик кытынна.
Слет иккис чааһа Саха сиригэр гаас промышленноһа төрүттэммитэ 60 сылын көрсө «Кэбээйи улууһа – «күөх төлөн» дойдута» бырайыак көмүскээһинигэр ананна. Бу сырыыга Куокуй уонна Сииттэ оҕолоро үлэлэрин түмүгүн билиһиннэрдилэр.
Быйыл Литература сылынан сибээстээн, улуус дьаһалтатын көҕүлээһининэн Таас Тумуска суруйааччыларга анаан эбээн ураһата тутуллуута былааннаммытын туһунан иһитиннэриини слет кыттыылаахтара махтал-уруй тылынан көрүстүлэр. Биһиги Таас Тумуспут, улууспут саха, нуучча, эбээн литературатын көрдөрөр-кэпсиир ытык сиринэн буоларыгар эрэллээхпит.
2016 сылга гаас промышленноһа төрүттэммитэ 60 сылын көрсө гаас фонтана аан бастаан уһуурбут сиригэр историяны көрдөрөр-кэпсиир иккис мемориальнай комплексы оҥоруу саҕаланна.
Комментарии
Авторизация на сайте через социальные сети