Бу нэһилиэккэ бастакы таас дьиэ. "Хаарбах дьиэлэртэн көһөрүү" программанан улууспут нэһилиэктэригэр быйыл хас да дьиэ тутуллан үлэҕэ киллэрилиннэ, өссө да тутулла тураллар. Олортон бу биирдэстэрэ.
Үөрүүлээх тэрээһиҥҥэ "Нам улууһа" МО баһылыгын 1 солбуйааччы Инна Сивцева, Үөдэй нэһилиэгин баһылыга Семен Ядреев, тутааччылар, саҥа дьиэлэнэн эрэр ыаллар, нэһилиэк олохтоохторо сырыттылар. Кыһыл лиэнтэни Инна Сивцева, Семен Ядреев, Вадим Кутуков, Анатолий Павлов кырыйан мустубут дьону дьиэҕэ ыҥырдылар.
Норуот алгысчыта, СР культуратын туйгуна Филипп Соловьев аал уоту оттон, айах тутан алгыс сиэрин-туомун толордо. Инна Иннокентьевна уонна Семен Владимирович бу сылаас-сырдык, киэҥ-куоҥ дьиэни туппут "Намстрой" ТМУ генеральнай директорыгар Вадим Кутуковка, Сергей Семеновка, тутуу учаастагын начальнигар Марк Уваровка, нэһилиэк баһылыгын солбуйааччытыгар Игнат Свинобоевка уонна Таджикистантан сылдьар 6 тутааччыга улуус, нэһилиэк баһылыктарын Бочуотунай грамоталарын, Махтал суруктарын, сэмэй бэлэхтэри туттардылар. Саҥа квартиралар хаһаайыттарын аатыттан махтал тылы үлэ, БАМ тутуутун ветерана Анатолий Павлов эттэ.
Комментарии
Авторизация на сайте через социальные сети