Бөлөхтөрү улуус баһылыга Борис Попов, кини солбуйааччылара Иннокентий Васильев уонна Юрий Николаев салайдылар. Отчуокка үлэ сүрүн хайысхаларын бэрэстэбиитэллэрин сэргэ өрөспүүбүлүкэ уонна судаарыстыбаннай таһымнаах тэрилтэлэр үлэһиттэрэ сырыттылар. Улуус ыытар үлэтин бары өрүттэрин тустаах исписэлиистэр кэпсииллэрин, хаартысканан слайдалар көрдөрүллэллэрин нэһилиэнньэ сэргээтэ.
Нэһилиэктэринэн отчуокка барыта 1000 тахса киһи сырытта. Улахан нэһилиэктэргэ ортотунан 70-80 киһи, орто нэһилиэктэргэ 40-45 киһи кытынна. Ньурба куоракка 100-кэ уонна Убайаан микро-оройуонугар туспа көрсүһүү ыытыллыбытыгар 40 киһи кыттыыны ылла. Ситэриилээх былаас 2015 сыллааҕы үлэтин улуус олохтоохторо 100% биһирииллэрин биллэрдилэр.
Олохтоохтор туруорсар боппуруостара нэһилиэк интэриэһин тула эрэ буолбакка, бүтүн улуус, өрөспүүбүлүкэ сайдыытыгар туһуламмыттарын отчуот кыттыылаахтара бэлиэтээтилэр. Үгүс ыйытыылар тутуу, хапытаалынай өрөмүөн, ОДьКХ, тыа хаһаайыстыбата, үөрэҕирии, доруобуйа харыстабыла, энергетика, сибээс, култуура тула киирдилэр. Үчүгэй кэпсэтиилэр уонна этиилэр буоллулар. Ситэриилээх былаас 2015 сыллааҕы отчуотун түмүгүнэн боротокуолга барыта 200 тахса туруорсуу киирдэ. Боротокуолга киирбит боппуруостарынан эһиилги үлэ торумнанар, туолуута былаас 2016 сыллааҕы отчуотугар иһитиннэриллэр.
Комментарии
Авторизация на сайте через социальные сети