ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
2 октября 2015, 11:04

Бизнес бары эйгэтин таарыйан


Бу күннэргэ өрөспүүбүлүкэ предпринимателлэрэ идэлээх күннэрин көрсө үгэс буолбут форумнара буолан ааста.

Суолталаах тэрээһиҥҥэ бары улуустартан дьоҕус бизнес бэрэстэбиитэллэрэ, араас таһымнаах салайааччылар “төгүрүк остуолларга”, маастар-кылаастарга сырыттылар, үлэ уопутун атастастылар. Предпринимательство уонна туризм миниистирэ Екатерина Кормилицына бэлиэтээбитинэн, тэрээһиҥҥэ 600 киһи кытынна.  Форумҥа быйыл 17 улуустан дьоҕус бизнес бэрэстэбиитэллэрэ кэлэн, бэйэлэрэ оҥорон таһаарар бородууксуйаларын билиһиннэрдилэр. Бу тэрээһиҥҥэ ыалдьыт быһыытынан дойду араас субъектарыттан 67 делегат кытынна. Ол курдук, Приморскай, Хабаровскай кыраайдартан, Иркутскай уонна Калиниградскай уобаластартан, Москва куораттан бизнес салаатыгар үлэлиир хампаанньалар бэрэстэбиитэллэрэ Саха сирин предпринимателлэрин кытта уопут атастылар.

photoByWidth&id=46068&width=1000

 Сүрүннүүр сэбиэт -- былаас далаһата 

Форум чэрчитинэн Ил Дархан Егор Борисов сыл аайы бизнес бэрэстэбиитэллэрин кытта араас таһымнаах салайааччылары мунньан олорон, Сүрүннүүр сэбиэт  мунньаҕын ыытара үгэскэ кубулуйда.

 Мунньахха этиллибитинэн, Предпринимательство сылыгар туһаайыллыбыт былаан 87 пуунуттан 57-тэ, ол эбэтэр былаан 66%-на туолбут. Муниципальнай тэриллиилэр бэрэстэбиитэллэрэ оскуолаҕа киириэн иннинэ саастаах оҕолор тэрилтэлэрин, чөл олоххо, инбэлииттэр олохторун чэпчэтэргэ туһуламмыт хайысхаларга үлэлиир предпринимателлэргэ эбии чэпчэтии көрүллэрин туруорустулар. Ил Дархан Егор Борисов бэлиэтээбитинэн, дьоҕус бизнес доруобуйа харыстабылын, үөрэхтээһин, суол сервиһэ салааларыгар эмиэ сайдыахтаах. Ил Дархан манан сибээстээн тустаах биэдэмистибэлэргэ кэккэ сорудаҕы биэрдэ. Холобурга, промышленность министиэристибэтэ чэпчэки промышленность сайдыытын барылын оҥоруоҕа.

photoByWidth&id=46067&width=1000

            Маны тэҥэ Сүрүннүүр сэбиэт мунньаҕын кыттыылаахтара сир учаастактара тус сыалларыгар туһаныллыбаттарын туруорустулар. Онон сибээстээн аҕа баһылык сир хонтуруолун бэрээдэгин муниципальнай тэриллиилэр оҥорон бүтэрэллэригэр сорудахтаата.  

Хатырык -- сонун технология сүүрээнэ 

            Хаһааҥҥытааҕар да быйыл бэйэ оҥорон таһаарыытыгар сонун сүүрээн үгүс. Ол курдук, Технологическай институт "Айаана" диэн устудьуоннар айар устуудьуйаларын салайааччыта Анна Никифорова биһиги олох да аахайбат хатырыкпытын туһаҕа таһааран, таҥас, миэбэл кырааскатын оҥорон таһааралларын кэпсээн сөхтөрдө. Аныгы технологиянан хатырык кырааскатын бороһуок гына оҥорон, таҥаһы, тириини, туоһу кырааскалыыллар эбит. Бу кырааска  бороһуоктарын Кытайга, Кореяҕа, Японияҕа үөрэттэрэ ыыппыттар.

            -- Кырааска химическэй састааба олус уустук. Бу бороһуокпут үүнээйини үүннэриигэ почваҕа эмиэ туттуллар. Ону ыраастаммыт хатырыгы дьон доруобуйатын тупсарар сыалтан сыттыктары, матыраастары, атах таҥаһын сиигин оборор, атаҕы массажтыыр стельканы, олоппос олбохторун оҥоробут, -- диэн кэпсиир Анна Афанасьевна. 

            Ону тэҥэ  маһынан наҕараада уонна сувенир бородууксуйатын оҥорон таһаарар “Цикл” ХЭТ оҥоһуктара үгүс киһини интэриэһиргэттэ. Айылҕа дьоно буоларбытынан дуу, саха дьоно ордук мастан оҥоһуллубут бэйэ оҥоһугун ордук интэриэһиргиир эбит. 

Кытай бизнесменнэрэ мас олортулар 

            Форум биир интэриэһинэй тэрээһининэн куорат киин сиригэр -- "Апельсин" маҕаһыын аттыгар баар ырааһыйаҕа куорат предпринимателлэрэ мас олордон, "Предприниматель скверэ" диэн сынньанар сири арыйыылара буолла. Бу идиэйэни Дьокуускай куорат предпринимателлэрин Координационнай сэбиэккэ туруорсубуттар эбит.  Тыл эппит бизнесменнэр бастаан мас олордон баран, сыыйа сынньанар ыскамыайкалары, дьону сааратар араас тэриллэри оҥорор былааннаахтарын эттилэр.

            Мин түгэн булан, Кытайтан сылдьар Хэйхэ уокуругун коммерция министиэристибэтин управлениетын салайааччыта Джан Дзунь Пхэнги кытта кэпсэттим.

            -- Биһиги олорор куораппытыгар дьоҕус бизнескэ анаммыт маннык тэрээһиннэри ыыппаппыт. Онон бу буола турар форуму олус интэриэһиргээтибит, уопут ыла сылдьабыт. Эһиилги тэрээһиҥҥэ бэйэбит делегаттарбытын ыытан кытыннарыахпыт. "Предприниматель скверэ" диэн эмиэ бэртээхэй саҕалааһыны олус интэриэһиргээн кытта сылдьабын. Биһиги бизнесменнэрбитигэр бу идиэйэни олоххо киллэрэллэригэр тыл көтөҕүөм. Бэйэм бу сквергэ мас олордон, өйдөбүнньүк хаалларыам, -- диэн санаатын үллэһиннэ кытай бизнесменэ. 

photoByWidth&id=46069&width=1000

Барыта эриэ-дэхси буолбата 

            ХИФУ култуурунай киинигэр буолбут тематическай тэрээһиннэр ис хоһоонноро олус дириҥ уонна баай. Ол эрээри сорох семинардар, кэпсэтиилэр олус уһуннар, ис хоһоонноругар эппиэттээбэттэр, киһини сылаталлар.

            Чурапчыттан сылдьар предприниматель Иннокентий Архипов санаатын маннык үллэһиннэ:

            -- Сорох лиэксийэ ааҕар экспертэр бэлэмэ суох кэлбиттэрэ харахха быраҕыллар. Таһымнара намыһах соҕус. Мин "Сокуоннайа суох бизнес: күлүктэн тахсар суол баар дуо?" диэн бэрт интэриэһинэй, киһини толкуйдатар дии санаан, атастаһар былаһааккаҕа сырыттым. Ол эрээри, хомойуох иһин, бу боппуруоска тустаах эппиэти булбатым. Дьиҥэр сокуоннайа суох бизнеһинэн дьарыктанар, күлүккэ саһан сылдьар дьон үгүс буоллаҕа. Ол онно ханнык сокуоннарга олоҕуран кинилэри бопсуохха, бу хайысхаҕа туох суолу-ииһи чопчу тобулан үлэлиэххэ сөбүн туһунан сүбэни истибэтим. Онон кэлэр өттүгэр экспердэр дьоҥҥо тиийимтиэ гына бэлэмнэнэн, боппуруостарга чопчу хоруйу биэрэллэрэ буоллар диэн санаалаах баран эрэбин.

 Сарсыардааҥҥы чэй -- уопсай тылы булуу көрүҥэ 

            Форум эмиэ биир киһи болҕомтотун тардар сонун сүүрээнэ -- өрөспүүбүлүкэ ааттаах-суоллаах бизнесменнэрэ бэйэ дьыалатын саҥа тэринэн эрэр предпринимателлэри кытта "Сарсыардааҥҥы бизнес-чэй" диэн тэрээһиҥҥэ көрсүһүүлэрэ.

            Дьоҕус бизнес бэрэстэбиитэллэрин СӨ Общественнай палататын салайааччытын солбуйааччы, "Золотое сечение" диэн предприниматель дьахталлар түмсүүлэрин салайааччыта Марина Богословская бэйэтин "Маргарита" рестораныгар мунньан көрүһүннэрдэ. Кини хас биирдии бэйэтин дьыалатын саҕалыыр дьоҥҥо туох ситиһиилээхтэрин, туохха ыарырҕаталларын сайа кэпсииллэригэр кыах биэрдэ. Саҥа дьыалатын саҕалааччы этиммитин кэнниттэн, бизнесменнэр, чэйдии олорон, тута санааларын атастаһаллар, төлөпүөннэрин атастаһаллар. Онон бу маннык тэрээһин саҥа саҕалыыр дьоҥҥо олус туһалаах тэрээһинэн буолла.

            ... Ити курдук быйыгы Предприниматель сылыгар анаммыт дьоҕус бизнес сайдыытыгар туһуламмыт ис хоһоонноох форум бэрт интэриэһинэйдик ааста, ыраахтан-чугастан мустубут предпринимателлэри дириҥ ис хоһооннооҕунан бэркэ астыннарда.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 717 Источник: ЯСИА Автор: Елена Потоцкая Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ