Ол курдук, түүн аайы күлсүү-салсыы, холуочук дьон айдаана-куйдаана бу күнтэн ыла туох эрэ "кнопканы" баттаабыт курдук тохтоон хаалла. Онон куорат олохтоохторо бэйэбитинэн бу сокуон туһатын биллибит. Ол эрээри сабыллыбыт маҕаһыыннарга уора-көстө арыгы атыылааччылар син биир бааллара чахчы. Ол ону уодьуганныырга уопсастыбаннай түмсүүлэр кимиилээхтик турунан эрэллэр. Ордук биллэр-көстөр үлэни "Антиконтрафакт 14" уонна "Агент" уопсастыбаннай түмсүүлэр ыыталлар. Кинилэр кимнээҕий? Бу арыгы атыытыгар сокуону кэһиини бопсор бырайактардардаах киин куорат ыччаттара бэйэлэрэ тэрийбит бөлөхтөрө. Онон өрөспүүбүлүкэ улуустарын уопсастыбынньыктара бу түмсүүлэр холобурдарынан арыгы атыытын сокуонун кэһиини утары маннык үлэлэһиэхтэрин сөп диэн бу ыстатыйабын кинилэргэ аадырыстыыбын.
Эдэр дьон хас биирдии рейдэлэрин видеоҕа устан, "Youtube» "Антиконтрафакт" Интернет саайтыгар таһааран, бэрт көдьүүстээх үлэни ыытан эрэллэр.
"Манна сокуону кэһэллэр..."
Соторутааҕыта Интернеккэ «Антиконтрафакт14» уопсастыбаннай түмсүү актыбыыһа Роман Юдин салайар бөлөҕө Дьокуускай куорат кэккэ маҕаһыынын бэрэбиэркэлээбит роликтарын көрдүм. Софронов уулуссатыгар баар "Лесной" маҕаһыыҥҥа аадырыстанан тиийэн, түмсүү актыбыыстара 18 сааһын туола илик уолларын арыгы атыылаһыннара ыыталлар. Сотору буолаат, эдэр киһи "Белая береза" диэн водканы туппутунан тахсар. Уолаттар массыына иһигэр олорон, акцизнай маарканы бэрэбиэркэлиир аппарааттарын хостоон, бытыылканы үөрэтэн көрөллөр. Бэрэбиэркэ кэнниттэн арыгы "контрафактнай" диэн сыанабылы ылар. Эдэр дьон тута маҕаһыыҥҥа сүүрэн киирэллэр. Атыыһыкка тиийэн: "Эн сибилигин биһиги түмсүүбүт чилиэнигэр көҥүлэ суох арыгыны атыылаатыҥ. Арыгы атыытын сокуонугар сыһыаннаах итирдэр утахтары атыылыыр анал отдел бу маҕаһыыҥҥа суох. Эһиги ас эрэ бородууктатын атыылыыр көҥүллээххит. Маҕаһыыҥҥа арыгы баара көстүбэт. Аны бу атыылаабыт арыгыгыт акцизнай маарката суох, ол аата лицензията суох атыылыы тураҕыт. Хантан ылан бу арыгыны атыылаатыгыт?" -- диэн Роман ыйытар. Бу манныгы эрэ күүппэтэх харытыттан харбаппыт атыыһыт мух-мах барар, онтон өй ылаат, куруубай баҕайытык: "Эһиги бу кимнээхтэргитий? Докумуоҥҥутун көрдөрүҥ!" -- дии түстэ. Уопсастыбаннай түмсүү чилиэннэрэ буолалларын билэн, эмиэ ах барда. Сотору кэминэн полиция үлэһиттэрэ кэллилэр. Кинилэр бу маҕаһыыны нэҥньийэн, 74 "контрафакт" дэнэр көҥүлэ суох кистээн атыылыы турар арыгыларын булан ыллылар. Боротокуол толорулунна.
Иккис түгэн. «Антиконтрафакт14» уопсастыбаннай түмсүү актыбыыстара аны атын күҥҥэ бэрэбиэркэлээбит видеоларын көрөбүн. Сарсыарда 11 чаас. Аэропорт оройуонугар турар "Можайка" маҕаһыыны бэрэбиэркэлээһин түгэнэ. Биллэрин курдук, арыгы атыыта күнүс 14 ч. саҕаланыахтаах. Мин испэр: "Эс, тугун сүрэй, арыгы атыытын болдьоҕун бары билэллэр ини. Манна ким түбэһэр үһү", -- дии саныыбын. Суох, сотору буолан баран, эдэр киһи "Жигулевскай" (2,5 л) пиибэни туппутунан тахсар. Уолаттар киирэн, сураһан барбыттарыгар атыыһыт "Смена уларыйыыта буолла, пиибэни атыылаабыт дьахтар дьиэлээтэ" дии охсор. Эчи, хоруйдара да бэлэмэ. Уолаттар эмиэ полицияны ыҥыраллар. Роман Юдин пиибэ кыстанан турар ыскаабын ыйа-ыйа: "Итирдэр утаҕы атыылыыр отделга туспа каасса баар буолуохтаах дии. Ол ханна баарый?" -- диэн ыйытар. Суох суоҕа биллэр буоллаҕа, атыылааччы "Билбэппин", -- диэн баһын илгистэр. "Бу эмиэ арыгы атыытын ирдэбилин кэһии буолар. Боротокуолга киллэриҥ", -- диэн суруна турар полицейскайтан көрдөһөр түмсүү актыбыыһа.
Ити курдук, «Антиконтрафакт 14» түмсүү чилиэннэрэ Чайковскай уулуссатыгар баар 32 "а" "Сфинкс", куорат ортотугар турар "Трапеза" маҕаһыыннары бэрэбиэркэлээтилэр. Сылдьыбыт сирдэрин тухары --- арыгыны уоран атыылааһын араас түбэлтэлэрэ. Өскө бу биир күн иһигэр эрэ тахсар түбэлтэ буоллаҕына, күн аайы уора-көстө төһө арыгы сокуоннайа суох атыыланарын, ааҕааччы, бука, мин курдук сэрэйэргэр эрэ тиийэҕин.
Үлэлэрин түмүгүн быһыытынан, эдэркээн уолаттар рейдэ оҥороот, арыгы атыытын сокуонун кэспит маҕаһыыннарга "Манна сокуону кэһэн, ыччаттарбытын арыгыга умса анньаллар" диэн киһи суобаһын уһугуннарар плакаттары ыйыыллар. Бу суругу аахпыт киһиэхэ араас толкуй, санаа мөккүөрэ дууһатыгар "хоноро" чахчы.
"Сокуон барбытыгар биир. Ону чиэһинэйдик тутуһуохтаахпыт. Биһиги саастарын ситэ илик оҕолорго анаан арыгыны атыылааһыны, итирдэр утахтары атыылааһын болдьоҕун кэһиини, акцизнай маарката суох арыгыны уоран атыылааһыны бопсобут. СӨ Ил Дархана Егор Борисов арыгы атыытын сокуонун кэһиини утары үлэлээһиҥҥэ ордук уопсастыбаннай тэрилтэлэргэ эрэнэрин биллэрбитэ. Ил Дархаммытыгар өйөбүл буолаары биһиги, ыччаттар, бэйэбит уопсастыбаннай түмсүү тэринэн, бу маннык хайысхалаах үлэни ыыта сылдьабыт", -- диэн санаатын үллэстэр Роман Юдин.
Күн аайы -- рейдэҕэ
Арыгыны сокуоннайа суох атыылааһыны утары үлэлиир өссө биир уопсастыбаннай тэрилтэ баар буолла. Бу "Биир ньыгыл Россия" партия иһинэн үлэлиир Бүтүн Россиятааҕы "Эдэр гвардия" диэн уопсастыбаннай тэрилтэ Саха сиринээҕи региональнай салаата тэрийбит "Агенты" түмсүүтэ. Федеральнай бырайыак иһинэн үлэлиир тэрилтэ буолан, ыыра киэҥ, далааһыннаах. Бу тэрилтэ пресс-сэкирэтээрэ Лена Сорокина бэлиэтииринэн, "Агенты" уопсастыбаннай түмсүү тустаах хонтуруоллуур тэрилтэлэр үлэһиттэрин кытта күн аайы рейдэлэргэ сылдьаллар. Ол курдук, атырдьах ыйын 8 күнүнээҕи рейдэҕэ Ушаков уулуссаҕа баар "Кружка" кафеҕа арыгы атыытын графигын тутуспакка, көҥүл атыылыы сылдьаллара ыйыллыбыт. Бэрэбиэркэ бу тэрилтэҕэ атыыланар пиибэ болдьоҕо номнуо ааспыта ырааппытын быһаарбыт. Итирдэр утах холодидьнига түүнүк сытынан тунуйбут. "Кружкаттан" 870 литр итирдэр утах тутуллубут.
____________________________________________________________________
Арыгы атыытын сокуонун кэспит түбэлтэни бэлиэтии көрдөххө ханна биллэриэххэ?
-
89681613333 -- "Антиконтрафакт 14" уопсастыбаннай түмсүү "итии линията"
-
8914-299-66-25 -- "Агенты" уопсастыбаннай түмсүү "итии линията"
-
89148214277 -- "Агенты" уопсастыбаннай түмсүү пресс-сулууспатын салайааччы Лена Сорокина.
_______________________________________________________________________________
Эксперт санаата:
Юрий ЖЕГУСОВ, социологическай наука кандидата:
- "Антиконтрафакт 14" уонна "Агенты" уопсастыбаннай түмсүүлэр арыгыны утары үлэлиир общественниктарга төһүү күүһүнэн буоллулар. Аны улуустар общественниктара бу маннык хамсааһыҥҥа актыыбынайдык кытталларыгар эрэнэбит. Кинилэр үлэлэрин көдьүүһэ бу күһүҥҥүттэн биллиэҕэ. Бу тэрилтэлэр "Итии линияларыгар" куораттан эрэ буолбакка, улуустартан кытта 60-ча арыгы атыытын сокуонун кэһээччилэр тустарынан иһитиннэрии киирдэ. Үөһээ Бүлүү, Абый, Ленскэй улуустарыттан ордук элбэх иһитиннэрии киирдэ.
Комментарии
Авторизация на сайте через социальные сети