Биһигини кытта үөрүүлээх сонунун Уус-Алдан улууһунааҕы киин библиотека директора Варвара Окоемова үллэстэр:
“Куонкуруска түөрт тыһыынчаттан тахса сайаапка киирбит. Саха сирэ эмиэ балачча көхтөөх кыттыыны ылбыта бэлиэтэнэр. Биһиги улууспутуттан, көрөргүт курдук, Найахы библиотекатын-кыраайы уонна нэһилиэк историятын үөрэтэр киин сэбиэдиссэйэ Айталина Семеновна Сивцева бырайыага ситиһиилэнэн биир дойдулаахтарын улаханнык үөртэ.
Кини бырайыага «Ыччат мультимедийнай киинин тэрийии» диэн. Бу үлэтигэр кини аныгы дохсун үйэҕэ ыччат дьону эргиччи сайыннарар усулуобуйаны ханна баҕарар тэрийиэххэ сөп диэн ыйар. Дьүүллүүр сүбэ кини үлэтин сэргээн, сэҥээрэн үрдүк сыанабылы биэрбитэ биһиги, библиотека үлэһиттэрин, сүргэбитин улаханнык көтөхтө, үлэлиир, айар-тутар баҕабытын күүһүртэ”.
Варвара Николаевна бэлиэтииринэн, Айталина Семеновна “Найахы” аатырбыт хорун үбүлүөйүгэр альбом оҥорсубут, билигин нэһилиэгин историятын үөрэтиинэн утумнаахтык дьарыктанар.
Улуус библиотекалара Россияҕа, республикаҕа ыытыллар куонкурустарга, күрэстэһиилэргэ, граннарга куруутун көхтөөхтүк кытталлар. Холобур, хас да сыллааҕыта Уус-Күөл библиотеката «Аҕа уолунуун тыа сирин библиотекатын ааҕааччылара” программанан Бүтүн Россиятааҕы куонкуруска кыттан, уон бастыҥ ахсааныгар киирбитэ. Оттон Бороҕоннооҕу оҕо библиотекатын «Экология уонна оҕолор» программата Евразия фондатын куонкуруһугар үрдүк сыанабылы ылбыта.Варвара Николаевна этэрин курдук, аныгы үйэ библиотекалара – билии-көрүү храмнара, олоххо саҥаттан саҥаны, дьоҥҥо-сэргэҕэ туһалааҕы, үйэлээҕи буларга-таларга, олоххо киллэрэргэ утумнаахтык үлэлэһэр буоланнар, ааҕааччыларын ахсаана элбиир.
Комментарии
Авторизация на сайте через социальные сети