Бу соторутааҕыта Дулҕалаах нэһилиэгин баһылыга, суруйааччы Виктор Стручков-Дьуулаҕа Дьуһаал ыҥырыытынан «Бичик» кинигэ кыһатын салайааччыта Август Егоров уонна сүрүннүүр редактор Валерий Луковцев бу ыраах хоту сытар нэһилиэккэ Литература сылын түмүктүүр тэрээһиҥҥэ кыттан кэллилэр. Дулҕалаах – Саха сирин бастакы үрдүк үөрэхтээх юриһа, Саха АССР Төрүт сокуонун төрүттэспит Г.С. Ефимов, СР народнай поэта Моисей Ефимов төрөөбүт дойдулара.
Кинигэ кыһатын үлэһиттэрэ ааҕааччылары кытта көрсүһүүгэ, ордук тыа сиригэр ыраах-чугас улуустарга өрүү сылдьан, дьон санаатын билсэр идэлээхтэр. «Тыа сирин олохтоохторо кинигэни ааҕар, кэрэни кэрэхсиир үтүө үгэстэрин ыһыкта иликтэр. Төһө да түргэн тэтимнээх дьалхааннаах олох кэлбитин иһин, саха кинигэтин тыа сирин дьоно сэргииллэр», — диэн Август Васильевич диэн бэлиэтээн этэр.
Бу киэһэ дулҕалаахтар биир дойдулаахтара, ураты суоллаах-иистээх, уостан түспэт элбэх ырыа ааптара Василий Дедюкин төрөөбүтэ 75 сылыгар анаан кини хоһооннорун аахтылар, истиҥ-иһирэх ахтыылары оҥордулар. «Эчий» литературнай түмсүү кыттыылаахтара уонна олохтоох мелодист Раиса Чирикова кэлэн, хомоҕой хоһоон, ылбаҕай ырыа түһүлгэтин тэрийдилэр. Ол иһигэр 86 саастаах кырдьаҕас бэйэтин хоһоонун аахпыта, санаатын үллэстибитэ дьон сэҥээриитин, биһирэбилин ылла.
Виктор Стручков баһылыгынан үлэлиэҕиттэн ыла нэһилиэк олоҕо сэргэхсийбитин, саҥа тутуу барбытын олохтоохтор киэн тутта кэпсээтилэр. Ол иһин даҕаны, кини ааспыт сылга улууска бастыҥ үлэлээх нэһилиэк баһылыга буолбута элбэҕи этэр. Оннооҕор куораттан чугас сытар киин улуустар кинигэни ылан бэйэлэрэ тарҕаппат буоллахтарына, хоту дойду хонноҕор олорор дьон «Бичиги» кытта ситимнэрин быспакка, саҥа кинигэлэри ылан кытыы нэһилиэккэ тарҕата олороллор.
Талааннаах поэт В. Дедюкин литературнай нэһилиэстибэтин чөмчөтөн, араас матырыйааллары хомуйан олохтоох музейга туттарарга, кини аатын үйэтитэргэ кэскиллээх этиилэр этилиннилэр.
Маны сэргэ Дулҕалаах орто оскуолатын үөрэнээччилэрин кытта көрсүһүүгэ саха тылын учуутала Светлана Сыромятникова салалтатынан оҕолор сылын аайы таһаарар айымньыларын хомуурунньугун көрдөрдүлэр. Киин сиртэн төһө да тэйиччи олордоллор, таас хайалаах Дьааҥы дьоно саха тылын ойуулуур-дьүһүннүүр баайын, сүөгэйин-сүмэтин, ис кыаҕын оҕотуттан кырдьаҕаһыгар тиийэ эттэригэр-хааннарыгар иҥэринэ сылдьалларын итэҕэттилэр.
Комментарии
Авторизация на сайте через социальные сети