Егор Судьаай салайааччылаах хаарчахтаммыт эппиэтинэстээх тэрилтэ тутааччылара кылаабынай бэдэрээччит быһыытынан үлэлээбиттэрэ. Кинилэргэ улуус дьаһалтата уонна тэрилтэлэрэ, тутуу матырыйаалын тиэйиигэ паромщиктар улахан көмөнү оҥорбуттара. Онон туох да тохтобула суох үлэлээбиттэрэ, 2 ый 10 хонук иһигэр дьиэни тутан бүтэрбиттэрэ.
14 мөл. тахса суумалаах 14 квартиралаах икки этээстээх мас дьиэ германскай технологиянан аныгы матырыйаалларынан (евротүннүктэр, сылааһы эбэр-кыччатар кырааннардаах радиатордар уо.д.а.) тутуллубута, итиинэн уонна уунан хааччыллыыта кииннэммит, хас биирдии квартираҕа суунар ванна, туалет, балкон баар. Контракт быһыытынан дьиэ биэс сылга мэктиэлэнэр, лаборатория чинчийиитин түмүгүнэн 60 сыл туруохтаах.
Квартира ылбыттар ортолоругар Саһыл, Мэҥэ Алдан, Байаҕантай, Охотскай Перевоз нэһилиэктэрин уонна Хаандыга бөһүөлэги олохтоохторо бааллар. Улуус 14 тэрилтэтэ, ол иһигэр Хаандыгатааҕы нефтебаза, Нэһилиэнньэ үлэлээх буолуутун киинэ, геология, сбербанк салаата, социальнай харысхал салаата уо.д.а. сыаналаах бэлэхтэри саҥа дьиэлээхтэргэ барыларыгар биэрбиттэрэ.
Быйыл 6 квартиралаах дьиэ тутуута саҕаланыахтаах. Бу күннэргэ тендер ыытыллыаҕа. Бу дьиэ 2016 с. үлэҕэ киириэхтээх.
Комментарии
Авторизация на сайте через социальные сети