ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
19 октября 2015, 17:48

Паромҥа уочарат тоҕо суоҕуй?


Алтынньы ортотуттан, халлаан тымныйда даҕаны, паромунан Дьокуускайтан Аллараа Бэстээххэ туорааһыҥҥа эбэтэр онтон кэлиигэ хастыы да килимиэтирдээх массыына уочарата буолааччы.

Быйыл балаһыанньа хайдаҕый диэн бээтинсэҕэ уонна өрөбүлгэ анаан-минээн Даркылаахха киирэ  сырыттым. Киһи соһуйуох,  уочарат суоҕун кэриэтэ, уу-чуумпу. Бэрт аҕыйах массыына  паромнарга  киирэн турунан иһэллэр. Расписаниеларын бириэмэтин кэспэккэ, ааллар кытылтан хоҥнон Аллараа Бэстээх диэки  айанныыллар.  

   

 

 

Бэйэбит да сөҕөн олоробут

 

 

 

 Паромҥа киирээри турар массыынаалаах дьону кытта кэпсэттим.

      Виктор Пестерев, Чурапчы улууһа (иномарка микроавтобустаах) :

--Уочарат суоҕуттан олус диэн сөҕөн олоробун. Бу кэмҥэ  манна халыҥ халҕаһанан субуруһуу кытаанаҕа буолааччы этэ. Баҕар,  өссө эрдэ буолуон сөп. Уонна  ити аҕыс  паром тэҥҥэ сылдьар  диэбиттэрэ.

    Юрий Енохов, Алдан оройуона (дьиэ кэргэнинээн дойдуларыгар бараары туораан эрэллэр):

-- Дьокуускайга соторутааҕыта кэлбиппит уонна бу дойдубутугар баран эрэбит. Соһуйуох иһин, паромҥа уочарат  адьас суох.  Көрдөххө элбэх паром үлэлиир эбит. Ол иһин, арааһа, уһун уочарат суох быһыылаах.

     Уочарат тоҕо суоҕар   айанньыттар бэйэлэрэ хоруйдаатылар.   Ааспыт өрөбүллэргэ аҕыс паром  («Якутск» СК, «Новэк» СК  уонна   «АЯМ» ХЭУо-лар ааллара) сайыҥҥы расписаниенан үлэлээн, уҥуор даҕаны, бэтэрээ даҕаны айдааннаах уһун уочарат суох. Оннооҕор бээтинсэ киэһэ  анньыһыы-үтүрүһүү суоҕа.

    Дьиҥэр, эрдэтээҥи былаан быһыытынан алтынньы 16 күнүттэн  биир эрэ паром сылдьыахтаах этэ, өскөтүн, халлаан тымныйан,  Өлүөнэ өрүскэ муус киирдэҕинэ. Халлаан тымныйбата биллэн, тустаах министиэристибэ паромнар сайыҥҥы расписаниенан үлэлииллэрин алтынньы 18 күнүгэр диэри уһатан биэрбитэ.  

  

 

 

 

Оттон бүгүн

 

 

     СӨ Транспорка министиэристибэтин пресс-сулууспата иһитиннэрбитинэн,  бэҕэһээ (алтынньы 19 күнэ)  Даркылаах  Аллараа Бэстээх икки ардыгар  7 паром  үлэлээтэ ( «Якутск» СК түөрт  парома, «НОВЭК» СК икки парома уонна «АЯМ» ААУо биир парома).

 Бүгүн  (алтынньы 20 күнэ)  «Якутск» СК түөрт паромуттан иккитэ (ПАРОМ-4, ПАРОМ-9) тохтоото. Ол оннугар баржалаах буксир үлэҕэ таҕыста.  Салгыы өрүскэ муус киириитэ  хайдаҕыттан көрөн,  хаалбыт икки паром сырыыта тохтуоҕа. Көмөҕө тахсыбыт буксир өрүс туруор диэри  үлэлиэҕэ.

 «НОВЭК» СК икки паромуттан биирэ эмиэ тохтоото. Хаалбыт паром өрүскэ  муус аһара киириэр диэри үлэлиэҕэ.

Онтон  дьону тиэйиигэ «Рукавишников» теплоход уонна сымнаҕас олбохтоох суудуналар сылдьаллар. Өлүөнэ өрүскэ муус туруута саҕаланна даҕаны теплоход сырыыта тохтуоҕа. «Полярные авиалинии» ААУо икки Ми-8 вертолета   дьуһуурустубалаан, Маҥан авиапордуттан көтүөхтэрэ. 

      «Өлүөнээҕи холбоһуктаах пароходство» ААУо пресс-сулууспата иһитиннэрэринэн, бу нэдиэлэ бүтүүтүгэр ол эбэтэр муус киирэн, өрүс   туруута саҕаланнаҕына,  биир парому буксирдаах сырытыннарыахтаахтарын туһунан иһитиннэрдилэр.  ОТ-2046 буксир уонна «Жатай-1» баржа  Жатай  – Төхтүр маршрутунан үлэлииргэ бэлэмнэр. Кинилэри «Бородкин» ледокол арыаллыаҕа. 

     СӨ сыана политикатыгар кэмитиэтин   пресс-сулууспата  паром өҥөтүн туһаныы  сыанатын үрдэтиини быһаарыы бара турарын  туһунан иһитиннэрдэ. Бу күннэргэ быйыл атырдьах ыйыгар бигэргэммит сыананан тимир көлө хаһаайыттара төлөһүөхтэрэ. 

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 687 Источник: ЯСИА Автор: Александр Тарасов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ