- Уон икки квартиралаах саҥа дьиэ «Хаарбах дьиэ» федеральнай программанан тутуллар. 1990 сыллаахха үлэҕэ киллэриллибит икки мэндиэмэннээх уопсай дьиэ олохтоохторо саҥа толору хааччыллыылаах дьиэҕэ көһөөрү күүтэ сылдьаллар.
- Федеральнай программаҕа хабылларга олохтоохтортон сүүрбүт-көппүт киһинэн уруккута культура үлэһитэ, үлэ ветерана Альбина Баишева буолар. Кинини кытта көрсөн, саҥа тутулла турар дьиэ таһыгар туран кэпсэттибит.
- ‒ Билигин олорор дьиэбит 25 сыл анараа өртүгэр тутуллубута эрээри, маҥнай киириэҕиттэн итэҕэстээх, онуоха эбии ыһыллыы-тоҕуллуу саҕана докумуона суох буолан, өрөмүөн диэни төрүт билбэтэҕэ. Онон киһилии усулуобуйаҕа олорботубут, тоҥон-хатан, өр кэмҥэ эрэйдэннибит.
- 2012 сыллаахтан дьыаланы-куолуну эккирэтиһэн туруоруммут сыалын олоххо киллэрэн эрэриттэн олус үөрэр.
- ‒ Дьиэбитин бэйэ бас билиитигэр көһөрүүгэ 2008 сыллаахтан элбэх сыраны-сылбаны көрсүбүтүм. Дьиэбит докумуона, техническэй пааспара суох буолан, Майаҕа хаста эмэ кырыммытым. Онуоха архыыпка үлэлэһэн, дьоннору атахтарыгар туруоран, дьиэбит докумуоннанна, ‒ диэтэ Альбина Семеновна, ‒ Улуус баһылыгар Николай Прокопьевичка тус бэйэтигэр туруорсубутум. Баһылык эппит тылын толорон, икки нэдиэлэнэн дьиэни көрө диэн специалистар кэлэннэр, ирдэниллэр акт диэни оҥорбуттара уонна дьиэ 70 бырыһыаннаах хаарбах туруктаах диэн быһаарбыттара итиэннэ онно төрдүттэн өрөмүөн үлэтэ табыллыбатын эппиттэрэ. Онно тирэҕирэн, аны «Хаарбах дьиэ» федеральнай программаҕа анньыһарга соруммуппут. Онуоха бастаан маһынан тутабыт диэбиттэрин, таас дьиэни туттарарга көрдөспүппүт.
- Дьиэ бырайыагын улуус дьаһалтатын тутууга управлениетын специалиһа, Хаптаҕай ыччата Наталья Суходольская оҥорбут, тутуутугар Петр Никифоров салайааччылаах «Арктика -строй» ХЭТ үлэһиттэрэ үлэлии сылдьаллар. Хас биирдии мэндиэмэн 4-түү квартиралаах буолар.
- «Арктика - строй» тэрилтэ прораба Дмитрий Егоров 20-тэн тахса киһи үлэлии сылдьарын, тутууну олунньу ыйтан саҕалаабыттарын уонна сэтинньи ыйга туттарар былааннаахтарын кэпсээтэ. Тэрилтэ уопуттаах маастара Николай Осипов кэмигэр матырыйаалынан хааччыллалларын, «Арктика - строй» ХЭТ нэһилиэк иһинээҕи суолу оҥорторон, билигин суолга-иискэ кыһалҕаны көрсүбэппит диэн кэпсээтэ. Тутааччылар Альбина Семеновнаҕа үлэһиттэргэ үлэлиир кэмнэригэр дьиэ-уот булуутугар көмөлөспүтүн иһин махталларын эттилэр.
- Онон Хаптаҕай нэһилиэгэр «Хаарбах дьиэ» программанан тутуллубут дьиэ олохтоохторо 2016 сылы саҥа таас сылаас, сырдык дьиэҕэ көрсүөхтэрэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети