Сүрүн иһитиннэриини тэрилтэ скважиналары бырайыактыыр отделын сүрүннүүр технолог-инженерэ А.О. Федоров оҥордо. Улууспутугар кэлэр 2016 сылга сир баайын көрдөөһүн икки сиринэн ыытыллара былааннанар. Биир скважина Бордоҥ нэһилиэгиттэн 50-ча км тэйиччи сиргэ, иккиһэ Мирнэй улууһун Заря бөһүөлэгин аттыгар, Сунтаар улууһун кыраныыссатыгар буолуоҕа.
Көрсүһүүгэ улуус баһылыгын бастакы солбуйааччы А.В. Никитин, баһылыгы экономикаҕа солбуйааччы М.М. Прокопьев, тэрилтэлэр салайааччылара, общественность кытыннылар. Биһиги дьоммут компания бэрэстэбиитэллэриттэн тустаах үлэҕит тулалыыр эйгэҕэ хоромньуну оҥоруо суоҕа дуо диэн ыйыттылар, дьиксинэллэрин биллэрдилэр. Онуоха хоромньу тахсыа суоҕа диэн эрэннэрдилэр. Үлэ барар сирин лицензиялаабыттар. Нефть, газ көстөр түгэнигэр ону хостооһун үлэтэ 4-5 сылынан ыытыллыаҕын туһунан эттилэр.
Үлэ барар кэмигэр оройуон бэрэстэбиитэллэрэ тиийэн билсиэхтэрин сөп дуо диэн ыйытыыга ыалдьыттарбыт ити боппуруоһу үрдүкү турар салалтабытын кытта быһаарсыҥ диэн эппиэттээтилэр. Ити үгүстэри дьиксиннэрдэ. Ол да буоллар, көстүбүт сир баайа туһаҕа тахсыахтаах. Сүрүнэ - айылҕаҕа хоромньуну аҕалбатар ханнык.
«Сургутнефтегаз» ААО 2015 сыл 6 ыйын түмүгүнэн быһа холоон 30 мөл. 505,7 тыһ. тонна неби хостообут. Биһиги республикабытыгар сыл саҕаланыаҕыттан кинилэр 4 мөл. 138 тыһ. тонна неби хачайдаабыттар. Ааспыт сыл тустаах кэмин кытары тэҥнээтэххэ, ити 11 бырыһыанынан үрдүк. Онон маннык бөдөҥ компания биһиги улууспутугар үлэлиириттэн бэйэбитигэр барыс ылар курдук дьаһаныахтаахпыт.
Комментарии
Авторизация на сайте через социальные сети