Биһгини кытта, улуус тыатын хаһаайыстыбатын департаменын кылаабынай агронома сырытта уонна быйылгы үүнүүнү маннык сырдатта. "Быйылгы дьылга биһиги 862 тн хортуоппуй, 171 гектартан оҕуруот аһын хомуйуохтаахпыт. Бүгүҥҥү күҥҥэ хортуоппуй хомуура бүттэ уонна үүнүүтэ гектартан 66 центнер диэн буолла, сорох хаһаайыстыбалар 100-120 центнери ыллылар, оттон хаппыыста быһыыта буолан эрэр. Билигин, бурдук хомуура уопсайа 70 % хомулунна. Биһиги улууспутугар 20-чэ сыл бурдук үүннэриитинэн дьарыктанар Р.М.Куприянов сыллата үлэлиир техникатын тупсарар, саҥаттан саҥа хайысханы көрдүүр", - диэтэ Александра Васильевна.
Эбиэс быйылгы кураан дьыл диэтэххэ, бэркэ тахсыбыт бааһынатыгар муора хараабылларын курдук икки «Вектор» комбайннар долгуһута усталлар, бурдук хомуйаллар. Санаабыт санаатын туруорутунан этинэр, үлэҕэ-хамнаска бииргэ үлэлиир дьонун түмэ тардар Роман Михайлович быйылгы дьыллаах үүнүү туһунан санаатын маннык үллэһиннэ: "Бурдук сорох дьыл үүнэр, сорох дьыл үүммэт, түһүүлэр-тахсыылар куруук бааллар, -диэн саҕалаата. Быйыл курааннаан, нэчимиэним гектартан 6-7-лии эрэ центнер буолла. Арай эбиэһим арыый үүнэн, хараҕым уутун соттор үүнүүбүн ыла сылдьабын, ортотунан 12-лии кэлэ турар гектартан. Онон, санаам арыый көнньүөрэн сылдьар. Дьэ, ити курдук үлэ бара турар. Ардахтар мэһэйдээбэтэхтэринэ кэмигэр бүтүөхпүт, барыта эбиэс хаалла.
Бырабыыталыстыба уонна Тыа хаһаайыстыбатын уонна аска-үөлгэ бэлиитикэтин министиэристибэтин көҕүлээһиннэринэн аныгы техниканан сэбилэнии бырагыраамматыгар киирэммит, саҥа техникалары ыламмыт үүнүүнү ылыы таһыма үрдээн турар. Онон, ити кураан да дьылларга үүнүүнү ылыахха сөп эбит. Агротехническай нуорманан, ирдэбилинэн үлэлээтэххэ киһи үүнүүнү ылар эбит. Манна өр, 30-тан тахса сыл үлэлээбит Владимир Егоровичтыын биһиги иккиэбит. Сүрүн үлэһиттэр биһиги алтабыт эрэ. Атын үлэлэргэ ыскылаакка бурдук ыраастааһыныгар, кууллааһыҥҥа дьону дуогабарынан ылан үлэлэтэбит".
Үлэ дьоно сып-сап эбиэттээт, бары анал үлэлэригэр баран сүтэн-оһон хааллылар. Хас биирдии чаас, күн былдьаһык, халлаан туран эрэ биэрдэр бурдук хомуура харгыһа суох түмүктэниэ.
Комментарии
Авторизация на сайте через социальные сети