Бу тэрээһиҥҥэ Нам нэһилиэгиттэн төрүттээх Польша олохтооҕо Күннэй Такааһай(Такасаева) ыҥырыытынан Саха сириттэн биһиги биир дойдулаахпыт, ытык кырдьаҕаспыт, олоҥхоһут Кирилл Никифоров кыттыыны ылан кэллэ.
Бу улахан суолталаах тэрээһин туһунан Күннэй Револьевна интернет ситимигэр баар күннүгэр маннык суруйар:
- Фестиваль сыллата «Grupa Studnia O." ассоциация көҕүлээһининэн Польша Культураҕа министерствотын уонна Варшава куорат мэриятын быһаччы өйөбүллэринэн ыытыллар. Араас норуот кэпсээнньиттэрэ, сэһэргээччилэрэ ыҥырыылаах ыалдьыттарынан буолаллар.
Тэрийээччилэри кытары сүбэлэһэн баран Кирилл НиконовичНикифоровы ыҥырар туһунан быһаарбыппыт. Кинилэр уонна чугас дьонум көмөлөрүнэн докумуоннары кылгас бириэмэҕэ бэлэмнээн, Дьокуускайга, Москваҕа уонна Варшаваҕа ыалдьыттары көрсүү барыта табыллан, суоллара арылынна. Онон бу бырайыакка кыттыыны ылбыт, күүс-көмө буолбут бар дьоммор улахан махталлаахпын»
Ыалдьыттар Варшаваҕа фестиваль буолуон биир күн иннинэ тиийэн, Бельведер дыбарыаһын уонна Королевскай паарка аттыгар Россия посольствотын утары турар «Бельведерскай» гостиницаҕа олохтонон, ытык кырдьаҕас сылдьарыгар олус табыгастаах буолла.
"Польша радиотыгар быһа эфиргэ кыттан бастакы күн олус долгутуулаахтык ааспыта. Киэһээҥи өттүгэр театр саалатыгар дьон толору мустубута. Билиэт барыта эрдэ атыыланан, утары атыылаһар баҕалаах дьон матан, саалаҕа кыайан киирбэккэ хаалбыттара. Саха эпоһын дириҥник өйдүүллэрин туһугар «Хабыр киирсиилээх Хабытта Бэргэн» олоҥхо ис хоһоонун поляктыы тылынан суруллубут тылбааһа эрдэ түҥэтиллибитэ. Олоҥхо кэрэ дорҕоонун тиэрдэр инниттэн бастаан утаа тылбааһа суох истибиттэрэ, онтон салгыы тохтобул оҥоһуллан, тылын-өһүн утары поляктыы тылбаастаан испиппит. Олоҥхо толоруллубутун кэннэ астыммыт биирдиилээн көрөөччүлэр кэлэн махтал тылларын эппиттэрэ.»
Кирилл Никонович олоҥхолуур кэмигэр сценаҕа Александр Дерсу «Саха алааһа» хаартыскатын көрдөрбүттэрэ олоҥхо ис хоһоонун арыйыыга көмөлөстө, киэргэтэн биэрдэ диэн бэлиэтиир.
«Иккис күн «Pod Błachą» дыбарыаска олоҥхону истии буолла. Былыргы тутууга олоҥхо дьиктитик иһиллэн, Кирилл Никоновичка да улахан долгутууну, ураты дьайыыны оҥордо. Бу сааланы кыра тэрээһин аайы арыйбаттарын поляктар бэлиэтии көрдүлэр. Олоҥхо туһунан кэпсэтии киэһэтигэр олоҥхоттон быһа тардыылары, тойугу, хомус тыаһын истэн дьон олус астынна. «Сэһэргээһин түүнэ» диэн фестивалы түмүктүүр тэрээһин бу күн буолла. Манна хас биирдии фестиваль кыттыылааҕа бэйэтин айымньытыттан быһа тардыылары сарсыарда 4 чааска диэри көрдөрдүлэр. Гала-концеры Кирилл Никонович Саха сирин айылҕатын туһунан тойугунан арыйда. Ону таһынан Польша, Германия, Англия, Франция, Ливия, Камерун, Индия уонна Гайана дойдуларыттан кыттыыны ыллылар.
Түмүктүүр күҥҥэ фестиваль тэрийээччилэрэ бэлэх оҥорон, Варшава киин уулуссаларынан анал гидтээх экскурсия тэрийдилэр. Саха сиригэр хаста да сылдьыбыт профессор Эва Новицкей дьиэтигэр киэһээҥи минньигэс астаах остуолугар ыалдьыттаатыбыт.
Фестиваль хас биирдии ыалдьыта, кыттыылааҕа, көрөөччүтэ дууһалыын байан, тэрээһинтэн улахан дуоһуйууну ыллылар».
Бу дневниги аахтахха Польшаҕа сылдьыбыт курдук сананаҕын. Күннэйи кытта ватсап ситимин нөҥүө суруйсан ирэ-хоро кэпсэттим. Польша курдук ыраах сиргэ олорор биир дойдулаахпыт төрөөбүт сирин-уотун санаан туран маннык улахан суолталаах тэрээһиҥҥэ быһаччы кыттыыны ылбытыттан бэйэтэ да олус астыммытын биллэрдэ. Суруйсуубут түмүгэр «Дойдубар привет!» диэн төрөөбүт Намыгар, Үөһээ Бүлүү дьонугар эҕэрдэтин тириэртэ.
Комментарии
Авторизация на сайте через социальные сети