Кэлбит ыалдьыттары «Айыллыы» бөлөх далбар хотуттара айыы аһынан - уохтаах кымыһынан, арыылаах алаадьынан, буспут сыалаах этинэх айах тутан көрүстүлэр.
- Үөрүүлээх түһүлгэбитигэр түҥ былыргы өбүгэлэрбит барахсаттар үйэлэргэ ситии быалыы ситимнээн хаалларбыт олоҥхотун үс көлүөнэ толорбутун иһиттибит. Ол курдук, Мэҥэ–Хаҥалас улууһун тарбахха баттанар олоҥхоһуттарын, өрөспүүбүлүкэҕэ ыытыллар олоҕурбут ньыманан олоҥхону толорууга күөн көрүүлэр кыайыылаахтарын Захаров Аркадий Михайловиһы, Григорьев Иван Алексеевиһы, Олоҥхо тыйаатырын артыыһын, биллииллээх, туспа суоллаах - иистээх олоҥхоһуту Исаков Валентин Гаврильевиһы, орто көлүөнэттэн олоҥхоһут Степанов Николай Иванович – Ноорой сиэнин, удьуор олоҥхону толорооччуну, улуустааҕы Олоҥхо дьиэтин фольклорга исписэлииһин Степанова Аксинияны сэҥээрдибит уонна кырачааннарбытыын, Аллараа Бэстээх оҕо уһуйаанын дьиэтин иитиллээччилэрин Аммосова Мусяны, Тарабукина Сандаараны иһиттибит.
- Ситии быа курдук ситимнэнэн олоҥхобут барахсан күн бүгүҥҥэ диэри тиийэн кэлбитин туоһулаан Мэҥэ-Хаҥалас улууһун дьокутааттарын сэбиэтин бэрэссэдээтэлэ Андрей Михайлович Находкин, Өксөкүлээх Өлөксөй аатынан Норуоттар доҕордоһууларын дьиэтин информационнай-маркетинговой салаатын салайааччы Любовь Егоровна Шишигина, Хотугулуу-Илиҥҥи федеральнай университеттан Олоҥхо салайааччыта Варвара Валерьевна Обоюкова, Мэҥэ-Хаҥалас улууһун култуураҕа уонна духуобунаска сайдыы управлениетын начальнигын солбуйааччы Надежда Афанасьевна Максимова, үөрэх управлениетын начальнигын солбуйааччы Вера Аркадьевна Тимофеева эҕэрдэ тыл эттилэр. Олоҥхо дьиэтин дириэктэрэ Евдокия Николаевна Иванова уруйдаах Олоҥхобут нэдиэлэтэ саҕаламмытынан эҕэрдэлээтэ.
- Олоҥхобут барахсан үгүс үйэни уҥуордаан кэлэр кэнэҕэски ыччаттарбыт кэскиллэрин кэрэһилии сайда-чэчирии турдун, дьоллоох олох тускута буоллун!
- Өксөкүлээх Өлөксөй аатынан Норуоттар доҕордоһууларын дьиэтэ
Комментарии
Авторизация на сайте через социальные сети