Ол курдук, Таатта улууһун Боробул бөһүөлэгин олохтооҕо Анна Попова сарсыарда оҕуруотугар уу кута сырыттаҕына, чыычаах кэлэн тула көтө сылдьыбыт уонна тохтоло суох чыбыгыраабыт. Хаһаайка барабыай туохтан эрэ айманарын сэрэйэн, сиэнэ кыыстыын ханна көтөрүн батыспыттар. Онтулара сарайдарыгар тиийэн түспүт уонна кырыыһа анныгар киирэ-киирэ тахсыбыт, төбөтүн кыҥначчы тутта-тутта утары көрөн олорон тугу эрэ этэ сатыыр курдук гыммыт. Онно көрбүттэрэ чыычаахтара уйалаах, оҕолоро чыбыгыраһаллар эбит.
Дьиэлээх хаһаайыттар чыычаах тохтообокко айманарын иһин, тула от-мас быыһын арыйталаабыттар. Итиэннэ сиргэ түһэн хаалбыт биир барабыай оҕотун булан ылан уйаҕа укпуттар. Ол да үрдүнэн, ийэ чыычаах айманара тохтооботох. Эбиитин ыытымаары тула көппүт. Ол иһин, от-мас быыһын иккистээн арыйталаабыттар уонна иккис оҕону булан ылбыттар. Ону уйаҕа угалларын кытта, ийэ чыычаах үөрбүт курдук көтөн тырыбынайбыт уонна уйатыгар кэлэн киирэн хаалбыт, уоскуйбут.
Чыычаах оҕотун киһи илиитинэн туттаҕына, сыта уларыйар. Ол иһин ийэтэ төттөрү ылбат диэни истэн, Анна Ивановна сиэннэринээн хас да күн уйа таһын ээр-сэмээр кэтээн көрбүттэр. Итиэннэ билиҥҥитэ этэҥҥэ курдук диэн үөрэллэр. Оттон кырачаан сиэннэрэ улааттахтарына аналлаах уйа тутуох буолан эбээлэрин үөрдэллэр.
Комментарии
Авторизация на сайте через социальные сети