Республика, улуус, куорат, Чернышевскай нэґилиэгин Бочуоттаах олохтооҕо, өр сылларга «Бэлэм буол», «Кэскил - Юность Севера» оҕо хаһыаттарын солбуллубат редактора, суруналыыстыка эйгэтигэр Саха Республикатын Государственнай Бириэмийэтин лауреата, Герой огдообото Нина Иннокентьевна Протопопова оҕолорун Петр Николаевич, Елизавета Николаевнаны, сиэнин Алексейы, хос сиэнин Диананы кытта улууска тэриллибит көрсүһүүлэргэ көхтөөхтүк кытыннылар.
От ыйын 13 күнүгэр саха Далбар Хотуна төрөөбүт дойдутугар –Уоттуга киэҥ туттар биир дойдулаахтарын бэйэлэрин баҕаларынан элбэх киһи кэлэн көрүстэ,күһүөрү, аан дойду сэриитэ түмүктэммит кэмигэр сэргэ туруорарга сүбэлэстилэр. Н.И.Протопопова дойдутугар дьон олохсуйан эрэриттэн, саҥа дьиэлэр дьэндэспиттэриттэн санаата көтөҕүлүннэ.
От ыйын 14 күнүгэр Бүлүү куоратыгар Советскай Союз Геройа, саха биир биллиилээх суруналыыһа, Саха АССР культуратын үтүөлээх үлэһитэ Н.А.Кондаковка аналлаах элбэх үөрүүлээх көрсүһүү тэрилиннэ, үтүө тыл бастыҥа этилиннэ.
Олоҥхо дьиэтигэр элбэх киһи ортотугар Н.И.Протопопова «Где же вы, друзья-однополчане?» кинигэтин сүрэхтэниитэ ыытылынна.
Эмиэ ити күн Н.Г.Чернышевскай аат Бүлүүтээҕи педколледж сэрии кыттыылахтарыгар аналлаах скверигэр Н.А.Кондаков бюһугар гирлянда уонна сибэкки дьөрбөтө уурулунна, педколледж директора С.В.Иванов, преподаватель У.Ф.Кондакова уо.д.а. Герой педучилищеҕа үөрэммит кэмин, олоҕун ахтан аастылар. Герой олоҕор сөп түбэһэрдии ырыаһыт Иван Данилов «Мин мантан сэриигэ барбытым» ырыаны толоруутун дьон сэҥээрдэ.
Кыайыы болуоссатыгар үс Геройга аналлаах пааматынньык таһыгар тэриллибит миитиҥҥэ оройуон Сэбиэтин бэрэссэдээтэлэ Г.С.Корякин, Үлэ, социальнай сайдыы министерствотын салайааччытын солбуйааччы З.С.Максимова, Бэчээт, телевидениенэн, радионан биэрии департаменын салайааччытын бастакы солбуйааччы Н.А.Молчанов Герой туһунан истиҥ-иһирэх тыллары эттилэр, пааматынньыкка гирлянда, сибэкки дьөрбөтө уурулунна.
«Алгыс» СК Герой Н.А.Кондаков төрөөбүтэ 95 сылыгар аналлаах Бүлүү улууһун общественноґын үөрүүлээх мунньаҕар Н.И.Протопоповаҕа улуус дьаһалтатын, оройуон Сэбиэтин Махтал суруктара туттарылынна. Улуус дьаһалтатын баһылыгын бастакы солбуйааччы В.Т.Лукин, сэрии кыттыылааҕа, отставкаҕа олорор полковник, Бүлүү дьонугар элбэх үтүөлээх А.И.Николаев уо.д.а. Герой олоҕо эдэр көлүөнэҕэ холобур буоларын, кини олоҕун, үлэтин туһунан үтүө өйдөбүл үйэлэргэ өлбөөдүйүө суоҕун эттилэр.
От ыйын 15 күнүгэр Бүлүү к. «Хомустаах» микро-оройуонуттан оройуон, куорат Сэбиэттэрин депутаттара Н.Н.Иванова, М.П.Томская көҕүлээһиннэринэн Н.А.Кондаков аат. уулусса бырааһынньыга ыытылынна.
Бүлүү дьоно-сэргэтэ бары тэрээһиннэргэ көхтөөхтүк кыттан Герой Н.А.Кондаковы истиҥник саныылларын, Н.И.Протопопованы ытыктыылларын, иккиэннэринэн киэн тутталларын көрдөрбүттэрин, Геройы ахтан-санаан ааһар күннэр өрө көтөҕүллүүлээхтик ааспыттарын ураты тутан бэлиэтиэххэ сөп.
Комментарии
Авторизация на сайте через социальные сети