-- Академик Борис Неустроев-Мандар Уус биир сүрүн соругунан саха тимир оҥоһуктарын -- батастары, кылыстары, батыйылары - аныгылыы эттэххэ, “реконструкциялаан” бииргэ мунньуу буолар. Биһиги Баайаҕаҕа Уус музейын тэрийээри сүүс сыллааҕыта тутуллубут дьиэни саҥарда сылдьабыт. Акылаатын уларыттахха, өссө да уһуннук туруоҕа, -- диэн кэпсиир Мандар Уус "уҥа илиитэ" Николай Егоров-Баайаҕыын. -- Өрөспүүбүлүкэҕэ соҕотох Уус музейа Үөһээ Бүлүүгэ Кэнтиккэ баар. Оттон Илин эҥэргэ Таатта Баайаҕатыгар баар буолуохтаах диибит. Ол иһин өрөспүүбүлүкэ тимир уустарыгар ыҥырыы таһаарбыппыт: тимир ууһа музейын Мандар Уус төрөөбүт түөлбэтигэр Баайаҕаҕа көмөлөөн тэрийиэҕиҥ диэн.
Мандар Уус сорудаҕынан Николай Иванович өрөспүүбүлүкэ музейдарыгар сылдьан хаартыскаҕа түһэрэн, видеоҕа устан тимир уустар үлэлэрин анаан үөрэппитэ. Ону куоппуйалаан Уус ыһыаҕар оҥорон аҕаларга баайаҕалар улуустарынан сорудах биэрбиттэрэ.
-- Олору ыһыах кэмигэр Баайаҕаҕа аһыллыахтаах "Тимир ууһа" музейга харайарга Мандар Ууска үөрүүлээх быһыыга-майгыга туттарыахтара, -- диэн кэпсиир Николай Егоров-Баайаҕыын.
-- Икки сылы быһа “ыанньыйан”, кэмэ кэлэн, убайбыт Мандар Уус 70-нун туолар үбүлүөйдээх сылыгар үлэтин түмүгүн көрдөрөөрү Уус ыһыаҕын ыһан эрэбит. Убайбыт Борис Неустроев-Мандар Уус дууһатыгар илдьэ сылдьар ырата -- төрөөбүт Баайаҕатын нуучча аатырар "Гжелин" маастардарын, Дагестан Кизлярын курдук тимир уустарын, уран маастардарын түөлбэтин курдук аатырдыы, суон сураҕырдыы. Кини ыра санаата олоххо киирэн эрэриттэн үөрэн саха тэҥэ суох сананан сылдьар. Ол курдук, академик төрөөбүт түөлбэтиттэн 15 норуот маастара үүнэн таҕыста. Саамай кылаабынайа, Мандар Уус тустаах өҥөтүнэн өрөспүүбүлүкэҕэ “Баайаҕа уустара” диэн өйдөбүл үөскээтэ, -- диэн санаатын үллэстэр норуот маастара.
Кэрэхсэбиллээҕэ, удьуору утумнаан нэһилиэк ыччаттара тимир ууһугар уһулуннулар. Баайаҕаҕа 19 ааттаах-суоллаах тимир ууһа баарыттан 11-рэ – ыччат дьон! Ол курдук, “Мандар Уус кыһата” киин салайааччыта Прасковья Бурнашева бэлиэтээбинэн, кинилэртэн Юрий Неустроев -- Дьэһиэл Уус, Федор Неустроев – Сойуппат Уус сыдьааннара. Оттон эһэтин уонна аҕатын удьуордаан 15 саастаах Феликс Шамаев 2-с кылаастан уһанар. Баайаҕа ыччаттара ааттаах-суоллаах куонкурустарга өрүү бириистээх миэстэлэри ылаллар. Ол курдук, Москваҕа олорор Баайаҕа ыччата, дизайнер-ювелир идэлээх Гаврил Мохначевскай быйыл “Россия бастыҥ ювелира” бочуоттаах аакка тигистэ. Эмиэ быйыл “УУС-ЭКСПО” быыстапкаҕа кыттан, “Сытыы кылаан” номинацияҕа Степан Пахомов – бастакы, Федор Неустроев иккис миэстэлэри ылаттаабыттара. Оттон 15 саастаах Феликс Шамаев – “Кэскиллээх Уус” номинациянан бэлиэтэммиттэрэ.
Ити курдук, Таатта Баайаҕатын тимир уустара туйах хатарааччыларын үөрэтэн-такайан, сотору кэминэн өрөспүүбүлүкэҕэ, дойдуга эрэ буолбакка, аан дойдуга тиийэ "Баайаҕа уустара дуо?" дэтэр кыахтаныахтара.
Комментарии
Авторизация на сайте через социальные сети