Бу сыллар тухары санаторий хаарбах тутуулаах эргэ мас дьиэҕэ үлэлээн кэллэ. Идэлэригэр бэриниилээх, ыарыһах оҕолор үтүөрэллэригэр олохторун анаабыт эмчиттэрдээх кэлэктиипкэ соторутааҕыта үөрүүлээх уонна олус долгутуулаах күн үүннэ.
Бэс ыйын 12 күнүгэр Покровскайдыыр айан суолун аттыгар Т.П.Дмитриева аатынан оҕо сэллигин эмтиир өрөспүүбүлүкэтээҕи санаторий саҥа дьиэтэ үөрүүлээх быһыыга-майгыга аһылынна.
Медицинскэй үлэһиттэри, санаторий дьиэтин тутааччылары СӨ бырабыыталыстыбатын бэрэссэдээтэлэ Галина Данчикова, бырабыыталыстыба бэрэссэдээтэлин солбуйааччы Алексей Дьячковскай, доруобуйа харыстабылын миниистирэ Александр Горохов, архитектура уонна тутуу комплексын миниистирэ Вера Кузакова, баайга-дуолга уонна сиргэ сыһыан миниистирэ Евгения Григорьева, Дьокуускай куорат баһылыгын солбуйааччы Евдокия Евсикова, быыбар киин хамыыһыйатын бэрэссэдээтэлин солбуйааччы Александр Власов, «Якутпроект» дириэктэрэ Иван Шишигин, «Востокцемент» УК генеральнай дириэктэрэ Владимир Пушкарев эҕэрдэлээтилэр.
Барыта 6 400 кв. м. иэннээх саҥа комплекс үс мэндиэмэннээх икки корпустан турар. Манна оҕолор сытар балааталара, 100 оҕо үөрэнэр кылаастара, доруобуйаны чөлүгэр түһэрэр кабинеттар уо.д.а. бааллар. Ону сэргэ сынньанар, концертыыр былаһааккалар оҕолору сэргэхситиэхтэрэ.
Т.П.Дмитриева аатынан оҕо сэллигин өрөспүүбүлүкэтээҕи санаторийа билигин оҕону эмтиир тэрилтэлэртэн биир улаханнарынан буолар. Санаторий 250 куойкалаах, оскуолаҕа киириэн иннинээҕи саастаах уонна үөрэнээччилэргэ аналлаах отделениелардаах.
Санаторий куорат таһыгар бэс чагда быыһыгар турара кырачааннар түргэнник үтүөрэллэригэр, сибиэһэй салгынынан дуоһуйа тыынансынньаналларыгар көмөлөһүө. Ону тэҥэ оҕо сэллигинэн ыалдьааччылар ахсааннара биллэ аҕыйыаҕар эрэл үөскээтэ.
Комментарии
Авторизация на сайте через социальные сети