Вероника, кыра дохуоттаах ыал үһүс оҕото төрүүрүгэр бэриллэр судаарыстыбаннай социальнай көмө туһунан уураахха сөп түбэһэн, ыра гынан илдьэ сылдьыбыт баҕа санаатын толорор дьолломмут. Ол курдук, кырачаан оҕолорго, кинилэр төрөппүттэригэр анаан бэртээхэй альбом бэчээттэтэн эрэр эбит. Ол туһунан Вероника бэйэтэ маннык кэпсээннээх буолла:
– Бу альбом 1-3 саастаах оҕо хаартыскаларын сыһыарарга, төрөппүт оҕотун туһунан тугу баҕарбытын күн аайы суруйан иһэригэр аналлаах. Бэйэм холобурбунан эттэхпинэ, түөрт оҕом тухары төһөлөөх элбэх хаартысканы бэчээттэппэккэ сүтэрбитим буолуой? Ол иһин, маннык альбому толкуйдаатым. Чараас эйгэни ылан көрдөххө, хаартыска киһи энергиятын илдьэ сылдьар. Онон кырачааныҥ хаартыскатын бу альбомҥа уган кэбистэххинэ, харысхаллаах курдук буолар.
Мин оҕоломмуппар ийэм Лазарь Афанасьев-Тэрис 1994 сыллаахха тахсыбыт «Һоп-паа» диэн кинигэтин булан биэрбитэ. Ийэм бэлэҕэ оҕону иитиигэ олус өйдөнүмтүө тылынан этиллибит сүбэлэрдээх буолан соһуппута. Өбүгэлэрбит кыра оҕону хайдах иитэллэрэ барыта сурулла сылдьар этэ. Бу иннинэ мин оҕону иитиигэ төһөлөөх литератураны хаһыспытым буолуой? Бенджамин Спок, Монтессори, Гэри Чепмен «Пять путей к сердцу человека» кинигэтин оҕолорбун көрөн олорор кэммэр аахпытым. Кинилэр туттар ньымалара, теориялара барыта Тэрискэ бэрт судургутук сурулла сылдьарыттан бэйэм да соһуйбутум уонна үөрбүтүм. Өбүгэлэрбит олус да мындырдар эбит. Кинилэр оҕо майгытын аан бастаан сылыктаан көрөллөр. Холобур, бытаан, нэс оҕону хамсатарга, эмоциятын биллэрэ үөрэнэригэр биһиги боростуойдук этэр «А» дорҕооммутун араастык этиэххэ сөп эбит. Холобур, ийэ иһитин сууйа туран «Аа-аа» диэтэҕинэ, оҕо соһуйар уонна тута ийэтигэр сүүрэн кэлэр. Ол аата, эн оҕоҥ болҕомтотун тартыҥ, оҕо эмоциятын хайдах көрдөрөрүгэр үөрэттиҥ. Эбэтэр омуннаахтык, күүскэ ытыыр оҕону бэйэтин туттунарга эмиэ үөрэтиэххэ сөп. Ити курдук судургу эрээри, дириҥ суолталаах сүбэлэри булбутум. Ол иһин, Тэрис сахалыы ньымаларын төрөппүттэргэ билиһиннэриэххэ наада диэн санааттан «Куо» сурунаалга суруйа сылдьыбытым. Онтон билигин бэйэм оҥоро сылдьар альбоммар киллэрдим.
Онон бу альбому илиитигэр ылбыт төрөппүт хас да куобаҕы бииргэ охторуо дии саныыбын. Оҕотун хаартыскатын үйэтитэр, кинини иитиигэ туһалаах сүбэлэри хаһан баҕарар ааҕа сылдьар уонна оҕотун хас хардыытын суруйар. Оччоҕо оҕото улаатарыгар, кини ийэ-аҕа, эбэ-эһэ да буоларыгар күндү бэлэҕи оҥорор.
Сахалыы үгэстэрбитин, култуурабытын илдьэ кэллибит уонна ону салгыы тарҕатарга араас үлэ барар. Ол гынан баран, ол үгэстэрбитин аныгы халыыпка киллэрэн, саҥардан, ситэрэн биэриэхтээхпит дии саныыбын.
Ааптар аҕыйах хонугунан күн сирин көрүөхтээх альбома хас да түһүмэхтэргэ араарыллыбыт. Оҕо үс сааһыгар диэри олоҕо барыта сырдатыллыахтааҕын учуоттаан, ааптар кинигэтин халыҥ, 150 страницалаах оҥорбут.
Альбом сахалыы открыткалары оҥорон дьон сэҥээриитин номнуо ылбыт Мира Аргунова уруһуйдарынан киэргэтиллибит. Вероника Мираны талан ылбыта мээнэҕэ буолбатах эбит. Сахалыы оһуору-мандары анаан үөрэтэр Мира Аргунова саҥа альбом оҕолорго ананарынан, өссө дириҥник үөрэтэн, оҕо эйгэтигэр сөптөөх уруһуйдары талбыт. Кинигэ таһыгар Айыыһыт олорор. Биллэрин курдук, Айыыһыт оҕоҕо кут биэрэр. Оҕону үс сааһыгар диэри Айыыһыта арыаллыы сылдьар.
Айыыһыттаах альбом күндү дьоҥҥутугар үтүө санаа илдьитэ буолуохтун!
Комментарии
Авторизация на сайте через социальные сети