Оттон ТНТ ханаалга көстөр «Танцы» биэриигэ кырачаан үҥкүүһүт Диана Егорова Lil Di финалга тахсан баран, салгыы кыттартан аккаастаммыта кини талааныгар сүгүрүйээччилэргэ улахан долгуйууну, мөккүөрү таһаарда. Интернет ситимигэр бары «Тоҕо барда?» диэн таайа сатаатылар.
«Мин Диана эрэ туһуттан «Танцыны» көрөр этим, билигин көрөн да диэн», «Эн кыайыахтаах этиҥ, тоҕо бардыҥ???» – бу курдук ис хоһоонноох суруктар Интернети толордулар.
Диана хас да тыһыынча киһиттэн талыллан бырайыакка киирбитэ. Онтон 200 чулуу үҥкүүһүттэртэн талыллан финалга киирэр 24 киһи иһигэр хабыллыбыта. Кинини бырайыак наставнига Мигель бэйэтин хамаандатыгар ылбыта. Lil Di төһө да улахан дьоннуун тэҥҥэ кииристэр, үгүстэртэн ордор да быһыылааҕа. Бу кэннэ соһуччу, биричиинэтин ыйбакка эрэ, салгыы кыттартан аккаастаммыта наставниктары да, көрөөччүлэри да соһутта, хомотто. Үгүстэр тоҕо барбытын таайа сатаатылар. Сорохтор «Лос-Анжелеска кытта барар үһү», «салгыы кыттарга харчылара тиийбэтэх үһү», «ТНТ продюсердарын кытта этиспиттэр» диэн сурахтар кырдьык-сымыйа икки ардынан Саха сирин тилийэ көттүлэр.
Нюргуяна Яковлева: «Барара эрдэттэн биллэр этэ»
Диана дьарыктанар «Zavod” үҥкүү бөлөҕүн салайааччыта Нюргуяна Яковлева социальнай ситимҥэ бу курдук суруйда:
«Доҕоттор, сабаҕалыы, таайа сатаамаҥ! Барыта судургу, көстөн турар. Көннөрү күүспүтүн холонон көрөргө санаммыппыт, ыҥырыы тутарга сыл устата үлэлээбиппит. Диана бары турдары чэпчэкитик ааспыта, бэйэтин үчүгэйдик көрдөрдө, бастыҥ буоларын дакаастаата. Туох өссө наада? Бириис дуо? Өс киирбэх буолумаҥ... Ол бириистэрин кэлин уон төгүл төлөтөллөр. Финалга киирии – улахан эппиэтинэс, элбэх эбээһинэс, дуогабар. Диана кыра оҕо буоллаҕа, улахан дьоно суох ону уйар кыаҕа суох...
Дианалыын өссө Москваҕа сылдьан бырайыактан барар дуу, барбат дуу диэн буолбакка, хаһан барар туһунан кэпсэтэрбит. Онон эрдэттэн былааннаммыта. Диана бэйэтэ быһаарыммыта. Ийэтэ кинини өйөөбүтэ. Улахан дьон шоуларыгар кыра кыысчаан тугу гыныай? Онон кэмигэр барыы – сөптөөх быһаарыныы. Ханнык да салайааччы төрөппүт сөбүлэһиитэ суох быһаарыныы ылыммат. Диана ийэтэ хаһан да быстахтык быһаарыммат уонна оҕотун санаатын хайаан да учуоттуур.
Диана ситиһиитэ «Танцы» бырайыагынан муҥурдаммат. Аан дойду таһымнаах профессионаллар сыаналыыр күрэхтэһиилэрэ, чемпионаттара бааллар. Дьиҥинэн, бу барыта сайын буолбута. Билигин бэйэбит да умна быһыытыйдыбыт, саҥа былааннар, сыаллар бааллар. Диана саҥа бырайыактарга бэлэмнэнэр. Биир дойдулаахтарбытын тэлэбиидэнньэҕэ кыттыынан үөртүбүт уонна салгыы барабыт!».
Оттон Диана ийэтэ Александра Егорова наһаа элбэх киһи эрийэриттэн, суруйарыттан социальнай ситимҥэ страницатын сабарга күһэлиннэ. Төлөпүөннэрин нүөмэрэ эмиэ арахса сылдьар. Соторутааҕыта: «Я горжусь тобой! Это твой выбор, мое решение» диэн кыыһыгар анаабыт тылларын тарҕаппыттара. Егоровтар үс оҕолоохтор, ийэлэрэ билигин биирин ааспыт кыра кыыһын көрөн олорор.
Кырдьыга да, Диана улахан ситиһиитэ иннигэр буоллаҕа. Оҕону аһара хайҕаан дуу, сэмэлээн, сэтэрээн дуу, быһа этэн кэбиспэккэ, харыстыахха баара.
Ыспыраапка:
Диана Егорова Zavod хамаандатын кытта Hip Hop International Бүтүн Россиятааҕы чемпионакка 3 миэстэ (2013). Эһиилигэр бу чемпионакка 2-с миэстэ.
All Styles Hip Hop International күрэххэ Россия чемпиона (2014).
Корея чемпиона, JUSTE DEBOUT (2014). Францияҕа бу күрэхтэһии аан дойдутааҕы финалыгар кыттыбыта.
Тренерин кытта Лас-Вегаска аан дойдутааҕы чемпионат финалиһа -- Hip Hop International (2014). 200 паараттан 8 иһигэр киирбитэ.
Комментарии
Авторизация на сайте через социальные сети