- Биһиги тутулла турар хотоҥҥо сырыттыбыт. Манна икки биригээдэ иһирдьэнэн-таһырдьанан үлэлии сылдьара. Кыстык иннинэ, балаҕан ыйын 1 күнүгэр диэри, бүтэрэн үлэҕэ киллэриэхтээхтэр.
- «Бөртө» сылгы собуотун үлэһитэ Александр Львов хотон үлэтин билиһиннэрдэ:
- - Биһиги манна бэһиэбит. Хотон муостатын, от киллэрэр түннүктэри, күкүрү оҥоруохтаахпыт. Үлэ элбэх. Матырыйаалбыт тиийэр, наада буолары дириэктэрбит А.В.Павлов аҕалтара турар.
- Быйыл 11 кылааска үөрэнэ киириэхтээх Харитон Харитоновтан сайыны хайдах атаарбытын туоһуластым.
- - Бэс ыйыгар өрөспүүбүлүкэтээҕи анал оҕо спортивнай оскуолатын дириэктэрэ М.А.Куприянов тэрийбит лааҕырыгар сылдьыбытым. Дьокуускайга биһиги улуус уонна Кэбээйи эдэр боксердара, барыта 20 буолан дьарыктаммыппыт. От ыйыгар бааһына күрүөтүн тутустум. Билигин манна үлэлэһэ сылдьабын, онон сайыммын бары өттүнэн туһалаахтык атаардым, - диэн сонунун үллэһиннэ Харитон.
- Хотон салгыытын Сергей Белолюбскай салайааччылаах биригээдэтэ тута сылдьар.
- - Быйыл бу иккис хотоммутут. Саас ити утары турар, ситэрэ сылдьар хотоннорун туппуппут. Матырыйаалбыт баар, бүгүн-сарсын сэндвич-панеллары туруортаан бүтэриэхпит. Онтон сарайбытын ылсыахпыт. Үлэһиттэрим Иванов Валентин уола Павеллыын, мин уолум Станислав уонна тырахтарыыспыт Лукин Эмиль буолан үлэлии сылдьабыт. Үлэ-хамнас туох да харгыһа суох үчүгэйдик бара турар, - диэтэ биригэдьиир Сергей Филиппович, кэмигэр тутууну бүтэрдэрбит диэн туран.
- Ааспыт үйэҕэ тутуллубут хотоннор эргэрэн, сиҥнэн туһаттан тахсыбыттара быданнаата, сорох хотоннору сылын ахсын өрөмүөннээн дьылы туорууллара. Бу тутуулар силиктэрэ ситтэҕинэ, үлэ-хамнас , үүт-эт дьэ өссө дэлэйиэ буоллаҕа.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети