Ресторатордар уонна отельердар федерацияларын президенэ Вадим Прасов, Крымҥа Саха сирин официальнай бэрэстэбиитэлэ Борис Зеленскэй, «Мир без границ» специалиһа Асель Смоляр Дьокуускайга кэллилэр.
Предпринимательство департаменын начальнига Ирина Гаргач бэлиэтээбитинэн, Саха сирин инники сайдыыта туризмтан быһаччы тутулуктанар.
Вадим Прасов Саха сиригэр элбэх ураты, дьикти баарын бэлиэтээн эттэ. Туристар өрөспүүбүлүкэ тымныы киинэ буоларын, ирбэт тоҥун, Өлүөнэ очуостарын, алмааһын, бриллианын, омук аһылыгын, о.д.а олус интэриэһиргииллэрин ыйда. Суол, логистика туруга мөлтөҕө, ресторан, гостиница бизнеһэ ситэри сайдыбатаҕа туризм сайдарыгар мэһэйдэри үөскэтэр.
“Атыттарга ханна да суох кыах Саха сиригэр элбэх. Туризмы былаас өйөбүлэ суох сайыннарар хайдах да кыаллыбат. Туристар кэлиилэрин элбэтэр кыаҕы булар уонна ону сайыннарар наада. Мин билэрбинэн эһиэхэ күһүн “Бриллиант нэдиэлэтэ” ыытыллар. Оҕолору оскуолаҕа хомуйуу, тэрийии кэмигэр бу тэрээһиҥҥэ ким кэлиэй?”, - диир кини.
Асель Смоляр “Махтал” ресторан үчүгэй өйдөбүлү хаалларбытын туһунан эттэ. Омук аһылыга, уопсайынан гастронамическай туризм омук дойдуларыттан дьону күүскэ угуйар буолбутун эттэ.
“Мир без границ” фирма Азия, Чуумпу акыйаан регионнарын ырыынактарыгар (сүрүннээн Соҕуруу Кореяҕа, Японияҕа, Китайга) туризмы күүскэ сайыннарар. Фирма бэрэстэбиитэллэрэ эппиттэринэн, ааспыт сылга Кытайтан омук дойдуларыгар 100 мөл. турист сынньанарын ситиспиттэр. Кинилэр ити дойдулар хааһыналарыгар аҥардас сувениры, араас малы-салы атыылаһан 160 млрд доллары киллэрбиттэр. Россияҕа баара-суоҕа мөлүйүөн эрэ киһи сылдьыбыт. Байкал күөл дьон-сэргэ болҕомтотун ордук тардар. Саха сирэ онтон хаалсыбатын, рекламаны сатыахха, кыайыахха эрэ наадатын чиҥэтэн эттилэр.
Омук дойдулара Саха сирин туһунан букатын билбэттэр. Асель Смоляр этэринэн, Кытай блогердарын манна аҕалыахха, Интернеккэ рекламаны оҥоруохха сөбүн, о.д.а. тустарынан эттэ.
Предпринимателлэр Саха сиригэр туризм сайдарыгар мэһэйдиир өрүттэри ырыттылар. Үрдүк квалификациялаах үлэһиттэр (администратордар, официаннар, гидтар, тылбаасчыттар) суохтарын ыйдылар. Специалист өрөспүүбүлүкэҕэ кэлэн гостиница уонна ресторан үлэһиттэрин үөрэтиитэ ити кыһалҕаны быһаарыан сөп.
Комментарии
Авторизация на сайте через социальные сети