Үс сыллааҕыта улуус баһылыгынан талыллаат, Михаил Захаров Омуктар сэбиэттэрин тэрийбитэ. Биллэн турар, салайааччыга бу сэбиэт бары ыытар үлэтигэр-хамнаһыгар төһүү күүһүнэн буолар.
Норуоттар сомоҕолоһууларын күнүн интернациональнай оройуон биир эрэ күнүнэн муҥурдаммакка, сыалай Декаданан бэлиэтээтэ. Ол курдук, тэрээһини улуус депутаттарын Сэбиэтэ киэҥ ыҥырыылаах мунньаҕынан саҕалаабыта. Манна улууска омуктар сыһыаннаһыыларыгар уонна сомоҕолоһууларыгар туһаайыллыбыт боппуруостар эмиэ көрүллүбүттэрэ.
Өймөкөөн ГУЛАГ лааҕырдарын дойдутун быһыытынан биллэр буолан, репрессия сиэртибэлэрин кэриэстээһин эмиэ норуоттар сомоҕоһууларын күнүн чэрчитинэн барбыта. Кыраайы үөрэтэр музейга репрессия сиэртибэлэригэр анаммыт экспозиция саалатыгар оскуола оҕолоругар анаан аһаҕас уруоктар ыытыллыннылар, Таҥара дьиэтигэр молебен буолла.
Үһүс сылын тахсыылаахтык үлэлиир Омуктар сэбиэттэрэ Норуоттар сомоҕолоһууларын күнүгэр үөрүүлээх мунньаҕы тэрийэн ыытта. “Бу -- биһиги бырааһынньыкпыт. Тымныы полюһугар олорор дьон эйэлээх олох, доҕордоһуу, бэйэ-бэйэни өйөһүү диэн тугун эппитинэн-хааммытынан билэбит. Өрүү да маннык иллээх, бэйэ-бэйэбитигэр ытыктабыллаахтык сыһыаннаһа олоруохпут, онуоха эн, баһылыкпыт, биһиэхэ бүгүҥҥүҥ курдук дурда-хахха буола тур!” – диэн муниципалитет баһылыгар Михаил Захаровка Өймөкөөҥҥө биир дьиэ кэргэнинэн олорор араас омук дьоно баҕа санааларын тиэртилэр.
Комментарии
Авторизация на сайте через социальные сети