Маннык күрэс дойду үрдүнэн кинигэ таһаарар искусство уонна полиграфия тиһэх ситиһиилэрин, саамай бастыҥ үлэлэрин бэлиэтиир, кинилэри өйүүр, ааҕыыны көҕүлүүр, киэҥ эйгэҕэ кинигэ оруолун үрдэтэр сыалтан ыытыллар. Итинник уһулуччу наҕараада дьиҥ чахчы ураты, хатыламмат кинигэни таһаарбыт, сонун бырайыагы олоххо киллэрбит бастыҥтан бастыҥнарга бэриллэр.
Быйыл бу күрэскэ дойду бары муннугуттан уонна национальнай республикалартан 120 кыһа 600 үлэтэ киирдэ. Итиччэ элбэх кинигэттэн сүүмэрдэнэн, күүстээх тургутууну ааһан, «XXI үйэ учебнига» диэн түһүмэххэ «Бичик» кыһа 1-4 кылаастарга таһаарбыт «Литература ааҕыыта» үөрэх методическэй кэмпилиэгэ бастаата! Ааптардар Лариса Захарова, Ульяна Флегонтоватөрөөбүт норуотун тыынын иҥэриммит, атын норуоттар култуураларын сэргиир, айымньы нөҥүө олоҕу, дьону, тулалыыр эйгэни сыаналыыр айымньылаах ааҕааччыны иитэн таһаарарга туһуламмыт үөрэх кинигэтин оҥорон таһаарбыттара дойду үрдүнэн үрдүктүк сыаналанна. Үөрэх кинигэтин тутула оҕо ааҕар уонна суруйар, аахпытын сатаан кэпсиир, бэйэтин санаатын холкутук этэр дьоҕурун сайыннарар, төрөөбүт тылбыт ойуулуур-дьүһүннүүр тылын баайын, сүмэтин иҥэрэр.
Маннык үрдүк ситиһии кыһа СР Үөрэҕин министиэристибэтин кытта өр кэмнээх таһаарыылаах үлэтин түмүгүн туоһулуур. «Саха оскуолата» ситиминэн уонна хотугу аҕыйах ахсааннаах омуктар тылларынан, тылбаас учебниктар оҕолорго сыллата оҥоһуллан, аныгы кэм ирдэбилинэн тупсарыллан иһэллэр.
Сахабыт сирин оҕолоро бүтүн Россия үрдүнэн «Сыл бастыҥ кинигэтэ» үрдүкү наҕарааданы ылбыт бастыҥ учебнигынан үөрэнэллэрэ өрөспүүбүлүкэҕэ үөрэх таһыма үрдүгүн кэрэһилиир. Бу учебник 1 кылаастан төрөөбүт тыл кэрэтигэр оҕолору иитэн таһаарыа, өбүгэ төрүт үгэһин, итэҕэлин, култууратын ытыктыырга уонна тутуһарга үөрэтиэ. Үөрэх кэмпилиэгин атыылаһарга дуогабары өссө түһэрсэ илик оскуолалар сайаапкаҕытын маннык электроннай аадырыска: book@bichik.ru ыытарга тиэтэйиҥ. 8 800 250 1338 нүөмэринэн босхо эрийэн билсиэххитин сөп. Оҕолоргутун XXI үйэ бастыҥ учебнигынан үөрэтэргэ дьулуһуҥ!
Комментарии
Авторизация на сайте через социальные сети