Быйылгы үөрэх дьылыгар үбүлүөйдээх оскуола боруогун 105 кырачаан аан маҥнай атыллаан билии-көрүү сырдык аартыгар үктэммитэ туһугар биһирэмнээх түгэнинэн буолар.
Үйэ аҥарыттан ордук кэм устата Саха сирин биир кырдьаҕас үөрэҕин кыһатыттан куорсун анньынан олох киэҥ суолугар үктэммит тыһыынчанан уолаттар уонна кыргыттар талан ылбыт идэлэринэн норуот хаһаайыстыбатын араас салааларыгар бэйэлэрин таһаарыылаах үлэлэринэн өрөспүүбүлүкэлэрин, улуустарын, тапталлаах Майаларын, оскуолаларын аатырдыбыттара, аатырдыахтара буоллаҕа.
Бүгүн агротехнологическай, политехническэй хайысхалаах оскуолаҕа 32 кылааска 750 оҕо билиигэ-көрүүгэ уһуйуллар. Үөрэнээччилэр, педагогическай кэлэктиип үөрэх кыһатын 105 сыллаах үбүлүөйүн үлэҕэ-үөрэххэ дьоһун ситиһиилэрдээх көрсөллөр. Ол курдук, бу аҕыйах хонуктааҕыта «Ларионовецтар» оҕо түмсүүтэ (салайааччы Л.К. Иванова) биир мөлүйүөннээх граны ылан кыайыы үктэлин эбэн биэрдилэр.
Оҕолор учууталларынаан тапталлаах кыһаларын үбүлүөйүн көрсө быйыл кэккэ тэрээһиннэри тэрийэн үрдүк таһымнаахтык ыыттылар. Олортон сорохторун аҕыннахха, академик Владимир Петрович Ларионовка анаммыт Ларионовскай декада, выпускниктар бириистэригэр көҥүл тустууга республикатааҕы күрэхтэһии, самаан сайыны уруйдуур ыһыах умнуллубат үтүө өйдөбүлү хааллардылар.
Улуу Кыайыы 70 сылынан Аҕа дойду Улуу сэриитин кыттыылаахтара, учууталлар А.И. Аржаковка, В.Н. Афанасьевка, Р.И. Брызгаловка, Н.С. Афанасьевка, М.Г. Громовка, Л.Е. Егоровка, В.Д. Заболоцкайга, И.Р. Захаровка, Е.И. Игнатьеваҕа, В.И. Константиновка, Н.С. Негнюровка, П.И. Никифоровка, Р.Р. Переваловка, И.Н. Рожиҥҥа, И.Л. Сергучевка, С.М. Скрябиҥҥэ, Е.Д. Титовка, В.И. Харитоновка, В.П. Шишигиҥҥэ анаммыт кылаас чаастара ыытыллан, быыстапкалар тэриллэн ыччат дьону аҕа көлүөнэ албан ааттаах олоҕун холобуругар үөрэтиигэ, патриот тыынын иҥэриигэ дьоһун суолталаннылар. Манна даҕатан эттэххэ, кыһа баай устуоруйатын хомуйууга, үөрэтиигэ оскуола түмэлин үлэһитэ Е.С. Попова киэҥ далааһыннаах үлэни ыытар. Ветеран учуутал С.А. Стручкова тэрийбит виртуальнай түмэлэ дьон-сэргэ киэҥ сэҥээриитин ылар.
«Туспа суоллаах-иистээх, үрдүк таһымнаах учууталлардаах оскуола коллектива бүгүн сайдыы-үүнүү суолунан олоҕу кытта тэҥҥэ хардыылыыр. Оскуола педагогтара билиигэ-көрүүгэ тардыһыылаах, үлэҕэ сыстаҕас, инникигэ эрэллээх, төрөөбүт сирдэрин, норуоттарын дьиҥнээх патриоттарын иитиигэ күннэтэ дьаныһан үлэлииллэр. Онно холобур оҥостор киһибитинэн Владимир Петрович буолар,» - диир оскуола дириэктэрэ Светлана Игнатьева.
Комментарии
Авторизация на сайте через социальные сети