Далааһыннаах тэрээһин дьон-сэргэ биир саамай тумулук туттар ытык киһилэрин – Ананий Кононович Андреев төрөөн-үөскээн ааспыт өтөҕөр, Булгунньахтаах алааһын Куонааннар сайылыктарыгар буолла. Ананий Кононович Москваҕа Свердлов аатынан Коммунистар университеттарын уонна Сталин аатынан Бүтүн Союзтааҕы Промышленнай Академияны бүтэрбитэ. САССР ЦИК уонна Совнарком бэрэссэдээтэлинэн, Дьокуускайдааҕы электростанция дириэктэринэн, САССР Коммунальнай хаһаайыстыбатын наркомунан үрдүк таһаарыылаахтык, үтүө суобастаахтык үлэлээбитэ. Бу ураты мындыр өйдөөх киһини бүгүн саха норуота муҥура суох үрдүктүк сыаналыыр, кини аатынан киэн туттар.
Ыһыаҕы «Комсомол” колхуос оччотооҕу ыччатын сыдьаана, Дьохсоҕон орто оскуолатын директорын иитэр үлэҕэ солбуйааччы Татьяна Львовна Попова уонна үлэ бэтэрээнэ Иван Михайлович Бочонин сүүрэн-көтөн тэрийдилэр. Бырааһынньыктыы киэргэтиллибит, саламанан тулаламмыт түһүлгэҕэ 100-тэн тахса киһи муһунна.
Аал уот оттулунна, алгыс тыл этилиннэ. Эдэр кыргыттар, уолаттар уохтаах кымыһынан ытык-мааны кырдьаҕастары айах туттулар. Бастыҥ саламаатчыт Дария Михайловна Бетюнова кутааҕа буһарбыт арыылаах саламаатынан бар дьонун күндүлээтэ. Салгыы ырыа ылланна, хомус дьүрүһүйдэ, үҥкүү-битии ытыс тыаһынан арыалланна. Ол кэннэ эдэрдиин, кырдьаҕастыын өрө көтөҕүллэн туран оһуохайы оройуттан туттулар. Бииртэн биир ураты куоластаах этээччилэр тохтоло суох салгыы тардан иһэллэрэ алааска ньиргийэн олордо, саха киһитигэр ураты тыыны, эрчими биэрдэ. Түһүлгэҕэ «Ахтан-санаан ааһыаҕыҥ” диэн урукку олоҕу-дьаһаҕы, үлэни-хамнаһы көрдөрөр саһарбыт хаартыскалар быыстапкаларын Маргарита Петровна Васильева бэлэмнээбитэ болҕомтону тарта. Ыһыахчыттар хаартыскаларга төрөппүттэрин, өбүгэлэрин буланнар улаханнык долгуйдулар, стендэ таһыгар хаартыскаҕа түстүлэр. Сахалыы ас дэлэччи тардыллыбыт сандалытын тула олорон, тыа сирин дьоно ааспыты ахтыбыттара, уруккуну санатыспыттара эдэр ыччаты улаханнык сэҥээртэ. Маныаха ыччаттар элбэҕи ыйытан, токкоолоһон саастаахтар санааларын көтөхтүлэр. Кэлин кинигэ, альбом да оҥорор баҕа санаа баарын истэн, кырдьаҕастар ордук үөрдүлэр.
Бу күн күрэхтэһии, куонкурус арааһа ыытылынна. Сахалыы ас арааһыгар, маанылаах саха таҥаһыгар дьахталлар, эр дьоннор, оҕолор, оһуокайы этиигэ дьон-сэргэ көхтөөхтүк кытынна. Быһый атахтаахтар сырсыылара, быыппастар былчыҥнаахтар тустуулара, мас тардыһыылара, илин-кэлин түсүһүүлэрэ көрөөччүлэргэ ураты тэтими, тыыны биэрдэ.
Хас биирдии күрэхтэһии, куонкурус кыайыылааҕар дохсун ытыс тыаһыгар доҕуһуоллатан Махтал суруктар уонна бэлэхтэр туттарылыннылар. “Комсомол кыргыттара, ыччаттара”, “Бэрээйилэр” диэн бастыҥ үлэлэринэн суон сураҕырбыт Аҕа дойду сэриитин сылларынааҕы эдэркээн оҕолор ааттара ааттанна, кэлэр кэскилгэ—кэнчээригэ өйүгэр-санаатыгар дириҥник иҥнэ. «Таһаарыылаахтык үлэлээн, бары тэрээһиҥҥэ, курэхтэһиигэ ситиһиилээхтик кыттан дьоммут-сэргэбит барахсаттар ааттарын үйэтитэ туруоҕуҥ», -- диэн эдэрдэр ыһыах түмүгэр баҕа санааларын эттилэр. Өбүгэни кэриэстиир, кинилэр ааттарыгар сүгүрүйэр наадатын ыйдылар.
Комментарии
Авторизация на сайте через социальные сети