Аҕыйах сыллааҕыта үөрэнэ олорбут оскуолаларын саахалланар туруктаах диэн сабан кэбиспиттэр. Ол оннугар таас оскуола тутуллуоҕун эрэннэрэн, спортивнай саалаларын көтүрбүттэр. Бу сайын «Стройлогистик» ХЭТ көмөтүнэн, олохтоох уолаттар Егор Неустроев, Василий Неустроев, Степан Борисов, Дмитрий Жирков уонна да атыттар биригээдэ тэринэн, саҥа тутуу акылаата түһүөхтээх сирин бэлэмнээбиттэр. Уопсайа 2600 куб миэтэрэ буору куппуттар.
Амма улууһугар ыытыллыахтаах Саха сирин норуоттарын спортивнай оонньууларыгар уонна Бөтүҥҥэ ыытыллыахтаах паралимпиадаҕа сөп түбэһиннэрэн, 2018 сылга саҥа үөрэх дьылын көрсө оскуола үлэҕэ киллэриллиэхтээх. Үбүн-харчытын боппуруоһа СӨ Экономикаҕа министиэристибэтигэр кэлэр сыл олунньутугар быһаарыллыахтаах. Үп-харчы көрүлүннэ даҕаны, тутуу ыытыллан барыахтаах. Бырайыак быһыытынан, 220 миэстэлээҕин таһынан, толору хааччыллыылаах, икки куорпустаах буолуохтаах.
Билигин үөрэх кыһата «Күөх ыллык» реабилитационнай киин урукку куорпуһугар санаторий салалтатын кытары дьукаахтаһан олорор. Ону даҕаны аҕыйах эрэ хоһу куортамҥа биэрбиттэр. Кабинеттар кыараҕастарын таһынан, үөрэнэргэ табыгаһа суохтар. Биирдии кабинекка аҕыйах паарта нэһиилэ кыбыллар. Усулуобуйа суоҕунан сибээстээн, үөрэнээччи ахсаана лаппа аҕыйаабыт. Урут 200-тэн тахса эбит буоллахтарына, билиҥҥитэ 188 оҕолоохтор. Сорохтор ыаллыы сытар нэһилиэктэргэ баран үөрэнэргэ күһэллибиттэр.
– Спортивнай саалабыт суох буолан, кулууп фойетын куортамнаһан, онно кыра кылаас оҕолоро дьарыктаналлар. Үөһэ кылаастарга физкультура уруога Чапчылҕан саалатыгар ыытыллар. Сэтинньи ыйтан саҕалаан маннык ньыманан үөрэнэ сылдьаллар, – диэн оскуола үлэһитэ Алексей Стручков кэпсиир. Онон кыһалҕаттан массыына көрдөһөн, оҕолорун чугастааҕы нэһилиэккэ үөрэттэрэ ыыталлар эбит.
Бөтүҥ оскуолатыгар эбии үөрэхтээһиҥҥэ болҕомто күүскэ ууруллар. 2013 сыллаахха агро-оскуола статуһун ылан, тыа хаһаайыстыбатынан дьарыктанар буолбуттар. Сайынын оҕуруот аһа үүннэрэллэрин сэргэ, сүөһү туталлар. 12 сүөһүлээхтэриттэн, алтата ынах. Үлэһиттэр бары көмөлөөн хотон туппуттар. Өссө хоруолук иитэллэр эбит.
Бүгүҥҥү туругунан оскуола 56 үлэһиттээх. Мантан 35 -- педагог. Оҕолор өрөспүүбүлүкэтээҕи, улуустааҕы таһымнаах олимпиадаларга куруук миэстэлэһэллэр. Биир кэлим эксээмэн, үөрэххэ киирии көрдөрүүтэ да сирдэрбэт.
Комментарии
Авторизация на сайте через социальные сети