Тараттар биир дойдулаахтара, биллиилээх бөҕөс Роман Цыпандин аатын үйэтиттилэр

Ахсынньы 18 күнүгэр Араҥас нэһилиэгэр бэлиэ түгэн буолан ааста: олохтоохтор өр күүппүт ыралара туолан, биир дойдулаахтара, көҥүл тустууга ССРС спордун маастара, хапсаҕайга СР спордун маастара Роман Цыпандин аатынан саҥа баараҕай спортивнай-культурнай киин аһылынна


Үөрүүлээх тэрээһиҥҥэ улуус баһылыга Николай Старостин, Ил Түмэн депутата Александр Романов, Роман Цыпандин ийэтэ, герой-ийэ Александра Цыпандина, бииргэ төрөөбүттэрэ, оҕолоро ытык-мааны ыалдьыттарынан буоллулар.
Толору хааччыллыылаах аныгылыы оҥоһуулаах сааланы республикатааҕы «Үтүө дьыала» хамсааһын дирекцията үбүлээһининэн тараттар биир дойдулаахтара Владимир Цыпандин салайааччылаах «Стройкомплект» ХЭТ тутан үлэҕэ киллэрдэ.

Бу күн Тарат оскуолатын 50, «Сулусчаан» оҕо саадын 35 сыллаах үбүлүөйдэрэ бэлиэтэннэ. Уон сыл тухары «Олоҥхо кыһата» аатынан биллибит оскуолаҕа Парасковья Лебедева, Светлана Харитонова Саргылаана Михеева олоҥхо педагогикатын иитэр-үөрэтэр үлэҕэ айымньылаахтык киллэрэн үлэлииллэр. Үөрүүлээх тэрээһиҥҥэ оскуола научнай сотрудниктара СР үтүөлээх педагога Любовь Аргунова, ХИФУ преподавателэ Саргылаана Олесова ыалдьыттаатылар.
Кэлбит ыалдьыттар саҥа спортивнай саалаҕа утумнаахтык дьарыктанан элбэх биллэр спортсменнар, араас турнирдар, олимпийскай оонньуулар чемпионнара иитиллэн тахсыахтара диэн баҕа санааларын, алгыстары эттилэр. Арамааскы ийэтэ Александра Цыпандина уонна бииргэ төрөөбүттэрэ долгуйан тураннар сааланы тутууга үлэлэспит бары туттааччыларга истиҥ махталларын тиэртилэр.

Спортивнай саала саҥа көбүөрүгэр Роман Цыпандин бирииһигэр хапсаҕайга бастакы турнирга республика араас улуустарыттан 50-тан тахса бөҕөс кытынна. Эдэр уолаттарга муҥутуур кыайыылааҕынан Тимур Сильвестров (Мэҥэ-Хаҥалас), улахан дьоҥҥо Платон Сивцев (Үөһээ Бүлүү) ааттаннылар. Кыайыылаахтарга мэтээллэри уонна бириистэри улуустааҕы «Урожай» спортивнай тэрилтэ салайааччыта Виталий Пестряков туттартаата.

Тэрээһиҥҥэ нэһилиэк үтүө-мааны, үлэһит дьонугар Ил Түмэн государственнай мунньах бэрэссэдээтэлин, СР Правителсьтвотын бэрэссэдээтэлин, улуус баһылыгын Махтал суруктара туттарылыннылар. Дьоро күн тараттар бэйэлэрин уоллара, Дьокуускайдааҕы культура колледжын директора Захар Никитин илдьэ таһаарбыт талааннаах устудьуоннарын бэртээхэй концерынан түмүктэннэ.